¹ Ku bindi mutuba, Yesu atolagha Petelo, Yakobo nu Yoani mwisakwabo endagha nabo kwitunda gha ntonga gha mwinduko mulai. ² Aghalukagha chaso ghabeli. Chaso chaghe chasanagha anga musi nu nshulu sage sengagha anga chengeshi. ³ Nu lola, Musa nu Elia bamupamukilagha nu kutenda ghamoi nawe. ⁴ Petelo mukutenda abulagha Yesu: Mukota, bwaswagha twikale ghano; Ndi washima, nobake ghano nusu isatu, lumoi lobe, lungo lwa Musa nu lumoi lwa Elia.

⁵ Anga bwabagha echeli atenda, lubhu lwenga lwababukilagha, nu lola ishuku longwibwagha ko likutuku mu lubhu na bino bitondo: Ghono u Mwana wani, unashima, muuwe u munabika lutundo lwani: mu mwongwilile! ⁶ Mu kwongwa kwelyo ishuki, begheshibwa bawagha bukukumasha nu kukatwa na boba bunene.

⁷ Tondo Yesu mu kushighelela abakatagha ko nu kubabula: Mwimaluke ta mukwe boba. ⁸ Bimaluchagha miso, nu balolagha ku Yesu w'inene u mpanga.

⁹ Mukukumba mushighulo, Yesu abakakishagha: Tamusambalilaghe muntu bi mwamona ko kwikila busi bukatuka Mwana wa muntu ku bakui.

¹⁰ Begheshibwa bamubushagha: Kichasula bansashi bakutenda buno Elia u kalinga kushwa?

¹¹ Inga abakula: Bulili Elia akika, nu kulongomanya bitondo binsai. ¹² Tondo nababula buno Elia ikile kalai, tabamumanilinde, nu bamukitinde bubashima. Kubuno Mwana wa muntu akanubwa nabo. ¹³ Begheshibwa bamanagha buno akubabula ku bitondo bya Yoani Mupatishi.

¹⁴ Mu kwika bwighi na kikembe, mulume moyi akomelagha Yesu mashwe nu kutenda: ¹⁵ Mukota, kwila mwana wani lukogho, ite luungu akubabalwa bubibu; akuwila mu kaya, nu ali mu lusi. ¹⁶ Namwekelagha begheshibwa bobe nu tabakoshishe ku mulamya.

¹⁷ Inga Yesu ababula: Kibuti kitekatisha nu kibi, mpina nki sinkikala na benywe? Mpina nki sin'kabakatilila? Munekele we ghano. ¹⁸ Yesu asughilagha musumbu bubibu atukagha muwe, nu mweso nkungu mwana alamagha.

¹⁹ Agho begheshibwa bashighelagha kweli Yesu, nu kumubula w'inene: Ki chasulagha twalibanwa kutibita uso musumbu?

²⁰ Yesu ababulagha: Kubushi bwa kwinda kutakatisha kwinu. Nababula bulili, ndi munabinde na lukatisho anga mubibo wa Haladali, munatendile n'oso mwinduko: Tuka ghano nda kuko, nu u nendile; Takuli kinabalibanilwe. ²¹ Tondo musumbu weli'anga whoso ntanatibitwa ndi ta kutingila masegho nu kwinan'india.

²² Mukutabanga mu Galilaya, Yesu ababulagha: Mwana wa muntu akesanwa mu maboko ma bantu; ²³ bakamwita nu mubindi bisatu akatuka ku bakui. Babagha na bongwa bunene.

²⁴ Mu kwika ku Kapelenaumu, balighi ba bichele bibili bya mpalata bendelagha Petelo, nu kumubula: Mwegheshi winu ntanaligha ibyo bichele bibili? ²⁵ Naki, atendagha. Nu mu kwingila mu numba, Yesu atangagha kumubula: Buni buwalola e Simoni? Bami ba kisi bekweleshwagha mitulo nu mpalata na nai? Na bana babo, ali bagheni?

²⁶ Amubulagha: Na bagheni. Nu Yesu amwakulagha: Bana tabalighe. ²⁷ Tondo, kubuno tunashwa kubakitasha, nda ku kitatenge, lekela kalobo, nu kisonga kiwalinge kuloba, kyasule kanywa, nu wasange kakulo munda. Tola ko, ligha byo byani nu byobe.