¹ A abowa Mbali wetungese melondo si eyo yoose, wa ena na baeki, ² beli mbe Pasaka uka n'nkati ya n'su ibe, ke mbele Mana Moto o ko abelekai mo kokpa mo liyeka.

³ Mo n'nyanga si eeyo baabi ba mafaefi ba kio na bakolo bato ba motanga besongani mo obandja ya mokota ya moabii wa mafaefi wa kio owa wa etekanga Kayafa; ⁴ Ke be n'ngbesanei oni namuna ko bundesa Mbali na tchibengo, mbe baiye we. ⁵ N'ndi beenei: "Yobua koika n'nyanga ya tcheombe, mo kotina iyeeya ko bato."

⁶ M'mba boa Mbali wa ikanga Betania, n'nkati ya lumba ya Simona moto wa Suli, ⁷ Amokali omo we ba kameyei we, mbe webunde tchupa, owa wa ikanga na malasi ma iyota yaema; ke, n'nyanga ya ikanga we ko mesa, wa iteleya malasi ko motchwe. ⁸ Baeki, ko mona boobo, besonei ke beemei: "Tchei tchephoe mo koseya boobono? ⁹ Aengamangai ko olesa malasi mano na iyoli ya ema iboka, ke beeya ba akeseleka touwe."

¹⁰ Mbali we n'ngbei, wa ena na bo: "bondia tchei bo ko angaisa amokali si o noo? Watakei bondi ono ya phfowa isina yane; ¹¹ Isina mbe bika n'su yoose na touwe, n'ndi bo buwa bino nane n'su yoose. ¹² Mo ko iteleya noo malasi ko mobe yane, wata kei yo mo ko endjeka mobe yane. ¹³ Na enake nino liti, kowa koose mosao asaali si o no'o yo olondoleka, mo tchese tchetondondo, ekatondeka kai mo koengelea eya amokali si o no wete.

¹⁴ N'nyanga si omo wa baa ikomi na babe, wa etekanga Yuda Iskaliote, wayangai ko baabi ba mafaefi ba kio. ¹⁵ Ke wa ena: Tchei beeme ko akesa noo, ke no koabaiwe koa kino? Ke belipei we beeya n'kama isato. ¹⁶ Ko linga n'nyanga si eeyo, waphanangai namuna omo wafoa mo koaba Mbali.

¹⁷ Botu ya boso ya mekati ya buwa kowa, baeki ba ebesa Mbali, mo ko ena na nde: "Kookoni keeme owe mbe teendjekeye owe moleli ya Pasika?"

¹⁸ We sumbolei: "Yaai ko motanga, ka oni moto, ke beeni na nde: Mokolo mbe: "N'nyanga yane ya engamake yo osusa; nootai kowa kabe Pasika na baeki bane." ¹⁹ Baeki betei eya Mbali weakese bo isosa, ke beendjekei Pasika.

²⁰ Iyo na ko engama, weikei ko mesa na baa ikomi na babe. ²¹ N'nyanga si eya ya anganga bo, wa ena: "Na enake nino liti, omo wino wokoolesai noo."

²² Beikei na lisomi iboka, ke o mona omo wa ena: "Ikai noo, mokolo?"

²³ We sumbolei: "Owa waphongake asima amo nane n'nkati ya saani, wei wokoolesa noo. ²⁴ Mana Moto okiyai ko opesana na eya eandekeleke mo isina yande. N'ndi tchombo ka moto si owa Mana moto o ko oleseleka. Inaiki bosaali ka moto si o oyo mbele ute bo tekangi."

²⁵ Yuda, owa we olese we, na ko ena: "Ikai nooi, Labbi?", Mbali na ko sumbokea we: "Wa enakei."

²⁶ N'nyanga ya anganga bo, Mbali wa bunda mokati, ke, maili ya ko sumbola kelekele, wa nungowa yo, ke wa akesa yo ko baeki, na ko ena: "Bundai, angai; eeno ikai mobe yane. ²⁷ We bundei maili kilauli tchemo, ke, maili ya kosumbola kelekele, weakesei bo, na ko ena: "Mai bane boose; ²⁸ isina mbe eenoi ika mokiya yane ya ilonga, oowa ya itekake bondia bato ba buwa, mo ko meseleka ko beya. ²⁹ Na enake nino, n'tooma kae ephe ya kauma ka kate si kano, bena botu si owa nekama ya eneeke nino mo bokota ya Tata."

³⁰ Maili ya koemba ongembo, biyei ko mokondi ya Olivié. ³¹ Ke Mbali wa ena na bo: "No ko ikai kae nino bane boose botu si o no, ephembe ya kokuka; bondia eandekeleke: "Noolubeyai motchungi, ke mekoko yo obalanganai." ³² N'ndi, maili ya koimoka kane, nokiyai boso wino mo Galilaya.

³³ Petele, wa bunda looki, wa ena nande: "Ango waika ko bato boose ephembe ya kokuka, utekaikaabe kowa kane."

³⁴ Mbali wa ena nande: "Na enake nabe liti, botu si ono lika, boso mbe n'koko inaakayi, o olingowa noo mila isato."

³⁵ Petele wa sumbolea we: "ango aengama kokpa nabe, n'to olingowa ane owe. Ke baeki boose ba ena kae boobo.

³⁶ Kio na aowo, Mbali wiyei nabo boikaneo omo owa watekanga mbe Getesemane, ke wa ena na baeki: "Tchumanai ase a abono, niye kpa aya mo kosombola." ³⁷ Wa bunda Petele na baana babe ba Zebedeo, ke wa andja ko n'ngba lisomi na obaba. ³⁸ Weeni nabo: "Mosombo yane ika na lisomi bena mo kokpa; Siyai a abono, ke kesai nane. ³⁹ Ke waya kambu boso, wakeya na tchondi tchande, ke wa sombola boobono: "Tata, m'mba yeengame, mbele kilauli si tcheno tchaphfangeye noo! Mo yooi, buwa eeya yeeme noo, n'ndi eya yeeme owe. ⁴⁰ Ke wala koa ko baeki, wesangeli bo mbe belame, ke wa ena Petele: "Bitekokole bino kokesa ango n'nyanga emo nanei? ⁴¹ Kesai ke sombolai, mbele bitekeyangi mo koendjeka; Mosombo yeengame bosaali, n'ndi mobe yeeyeeye." ⁴² Wephangi mula wa ibe, ke we sombolei boobono: "Tata, m'mba iteengame mbele kilauli si tcheno tchaphange buwa noo koma tcho, koema kabei kateleke! ⁴³ Wala, ke wa sangela bo mbele belame; isina mbe ma iso mabo malitowangai. ⁴⁴ Wesulei bo, ke, wa phanga, we sombolei mila wa isato, ko sumbokeya maoki maa maenanga we boso. ⁴⁵ Ke we na kia kowa ko baeki bande, ke wa ena na bo: "belame enekeke, ke beomone! Monai, n'nyanga yaengamake, ke Mana Moto wa oleselekake omaako ma bati ba kobeya. ⁴⁶ Imanai, tiyei, monai owa wokoolesa noo, wokula.

⁴⁷ N'mba boa aemanga we ephe, monai, Yuda, omo wa baa ikomi na babe, wilei, ke asima amo nande motuka omo ya bato mbe bika na tobusu bena tote, betomekei na baabi ba maphaefi ba kio bena bakolo bato ba motanga. ⁴⁸ Owa we oleseye bo we, we ebesei bo mbe mbele owa si owa no ko bakameya we, we oyo, bu ndesai we. ⁴⁹ Ao-ao, wa bakamea Mbali, wa ena: kalibo, labon! Ke waakesa besi.

⁵⁰ Mbali wa ena nande: "Munakane, eya yalake kota owe, ta yo." Ke bato babo ba susa, bata maako kio na Mbali, ke ba kandja we. ⁵¹ Ke monai, omo wa baa baikanga na Mbali, wenanowei kaako, ke we omoli kabusu kande, wa lubeya moto wa mokambo wa moabi wa mafaefi wa kio, ke wa buka itu yande. ⁵² Ke Mbali wa ena nande: "Sumbola kabusu kabe asima ande; isina mbe boa boobunda kabusu bekakpai na kabusu. ⁵³ Weengeleyei m'mba n'teengame koeta Tata, waakese noo enekeke metuka ya bakitomo ikomi na babe? ⁵⁴ Oni namuna iki okoiyana maandikio, aika m'mba iteteleke boobono? ⁵⁵ Mo n'nyanga si eeyo, Mbali wa ena na motuka ya bato: "Baalakei aiso m'mba maili ya moeta, na tobusu bena tote, mo kobunda noo. Neiki n'su yoose baka nino, mbe noo nangola n'nkati ya lumba ya bosonganeo, ke bita bundanga bino noo. ⁵⁶ N'ndi eeyo yoose yalakei mbele maandiko ma balondoi maiyane, ke baeki boose ba tchitchana we, ke ba phata abeo.

⁵⁷ Bowa bebunde Mbali biyei nande ka moabi wa maphaephi Kayafa, kowa batoli oso bena bakolo bato ba songananga. ⁵⁸ Petele wa ondesanangai na bo maili iboka kowa ka moabi wa mafaefi wa kio, wen'ngeyei, ke waika asima amo na bato ba mekambo, mo komona bowa yo otunga bondi. ⁵⁹ Mekota ya baabi ba mafaefi ba kio na bato boose si baa bo koikanga mo ikumbe baphanangai maondi ma ko enea Mbali olanga, ya ko engama mo koiya we. ⁶⁰ N'ndi bite mone ango omo, ango boa n'nguma ya bato ba n'nanga ba ikanga, bondiya liti itaikanga bande. Mo kotungesa, babe bilei, ke ba ena: ⁶¹ "O no weenei: "Neengame komuna lumba ya Mokonga, ke yaimana mo n'su isato."

⁶² Moabi wa mafaefi beimanei, ke wa ena nande: "Uto ko sumbola tchesimai? Tchei tcheno bato si bano bo ko ena mo isina yabe? ⁶³ Mbali wa bibana ke moabi wa mafaefi wa kio na kobunda looki, wa ena nande: "Na bolaki mbele olape mo lina Mokonga si owa uka, weebese base m'mba ukai Klisto, Mana Mokonga."

⁶⁴ Mbali na ko sumbolea we: "Wa enake yo. Ke ephe, na enake nino, bo omonai kolinga moono botu Mana Moto Koika mo ilome ya tchekamba tcha Mokonga, ke nabe okula kio na obowa."

⁶⁵ Na boobo, moabi wa mafaefi wa kio wa asowa n'tulu yande, na ko ena: "Wa phendake! To ophanakei bani baphe bato?" ⁶⁶ Besumbolei: "Weengamei kokpa." ⁶⁷ Kio na eeyo, betufeyei we mata mo tchondi, ke belubeyei we mangumi na tokibo mbe bo ko ena, ⁶⁸ "Klisto, londoa; ebesa base nani walubeyake owe."

⁶⁹ N'nyanga si, Petele wa ikangai ko andja, amokali omo wa mokambo wesusei baka nande, ke wa ena: "Owe kae, waikangai na Mbali Mogalilai."

⁷⁰ N'ndi welingowei boso wa boose, ko ena mbe: "N'teli yane tchea tcheeme ko ena owe."

⁷¹ Bowa aikanga we kiya ko molango, amokali ophe wa mokambo we monei we, ke wa ena na baa baikanga a awo; oono waikanga kai na Mbali mo Nazarete.

⁷² Wa lingowa we ephe, na kolapa: "N'nteli yane moto si ooyo!"

⁷³ Maili kambu, baa ba ikanga aowo, besusei, ba ena na Petele: "Liti asa, owe kae ukai wa bato si ba abo, isina mbe boeneleli ya be yo ko ebekanesa owe."

⁷⁴ Na boobo weandji ko tona bena kolapa: "N'teli yane moto si oyo." Aowo aowo n'koko na koakaya.

⁷⁵ Ke Petele na ko engeleya maoki maenanga Mbali: "Mbe n'koko itina akayi, o olingowai noo mala isato." Ke wa omoka, waeya iboka.