¹ "Kapisi mupangure, na nwe nga va dire ku mupangura, ² Kumpanguro oyo mupangulita, ndjo ngava kamu pangulita, ntani maseteko owo mwa setekitanga, ngo ngava kamu setekita na nwe. ³ Nke ukengera ku karuvambi ko kadidi kana karo mu lintjo lya unyoye, enne ngoli mukudira kudimburura mukambo owo una vindamo pa lintjo lya naumoye? ⁴ Weni omo ughamba kwa unyoye, 'Tanko ni kuwupe nkambo oyo yina vindamo pa liontjo lyoye,' pasiruwo so nkambo mu lintjo lyoye yina kara? ⁵ Ove vo kuvipa! pa muhovo upa nkambo oyo yina kara palintjo lyana umoye, ntani umona nawa mukuupa nkambo oyo yina karo mu lintjo lya unyoye.

⁶ Kapisi kutapa ovyo vya pongoko ku Mbwa, ntani kapisi kuvukuma makwarara henu kumeho yo vinguru. Ndi mpo si vavo nga va vhura ku vilyaterera kuntji yo mpadi, no ku mupiruka no ku mutavaura ugcene-ugcene.

⁷ "Rombenu, nga va vi mupe. Paparenu, ntani ngo mu viwane. Ngongorenu, ntani ngava muharwira nwe. ⁸ Kehe uno a rombango, ku mupa; kehe uno a paparango, ku wana; ntani muntu owo wo ku ngongora, ku muharura.

⁹ Are umwe wenu, ntjene monoye a rombe muntje wa mboroto, umupe liwe? ¹⁰ Ntjene asi a rombe ntjwi, umupe liyoka? ¹¹ Mpo ngoli, ntjene anwe vo vadona yivenu asi weni omo mutapa mauswi wo mawa ku vana venu, vingapi simpe nga vhura kumupa senu wo mu liwiru kwa tapanga vininke vyo viwa ko vo vamu rombango uye?

¹² Mpo ngoli, kehe vino vininke mwa sananga va muruwanene vantu, nanwe mu nahepa ku vi varuwanena vavo, oyino ndjo veta ntani ndjo nka va profeta.

¹³ "Ngenenenu mulivero lyo lididi. Livero lyo kugwanyunuka no ndjo livero lya Kutwaredera ku lidjonauko, ntani vantu vo vangi vapitirangomo. ¹⁴ Enne ngoli livero lyo lididi ntani nka ndjira yo yidito ya ku twalidira ku liparu, yayo vasesu va yiwanango.

¹⁵ Vangarenu kuva porofete vo vipempa, ovo vana kuyo mudi mudwato do ndjwi enne ngoli hahwo usili mambungu wo ndjara. ¹⁶ Ku nyango yavyo nko nga mu vayivira. Vantu kunyanga mandjembere ku miya ndi walye Ukuyu ku unyanga ku kandjata? ¹⁷ Mundjira ndjo yo nka, kehe sino sitondo so siwa kuyita nyango yo yiwa, enne ngoli sitondo so sidona kuyima nyango yo yidona. ¹⁸ Sitondo so siwa nokuyima si nyango yoyidona, sikare sitondo so sidona naso nakuyima si nyango yo yiwa. ¹⁹ Kehe sitondo sakudira kuyima nyango yo yiwa ku siteta ntani kusi vukumena mu mundiro. ²⁰ Mpo ngoli, nga mu vhure kudimburura ku nyango davyo.

²¹ Kapisi kehe uno wo kughamba kwande asi, 'Hompa, Hopma,' nga vhura kangena mu untungi wo liwiru, enne ngoli nkwandi mbovo tupu varuwanango mapangero ha va vava ovo vana karo mu liwiru. ²² Vantu vo vangi ngava kaghamba kwande mu liyuva lyo, "Hompa, Hompa, kapisi mu lidina lyoye katu porofetanga, mu lidina lyoye katu tjidanga mpepodona, ntani kapisi mu lidina lyoye katu ruwananga vitetu vyo vingi?' ²³ Makura ame ntani ngani vhura ku vadukwira vavo, 'Ame kapi na muyivire nwe! Tundenuko kwande, anwe vo mwa ruwanango vyo kupira veta!'

²⁴ "Mpo ngoli, kehe uno wo kuyuva nkango dande ntani no ku dilimburukwa nga kara yira mukafumu wo mukotoki a dikiliro ndjuwo yendi pa Liwe. ²⁵ Mvhura a yiya, ruhandjo aruya, ntani likundungu ali yungu no ku kutowona pa ndjuwo yinya, enne ngoli kapi ya rundumukire, mukonda si kwayi dikilire pa Liwe. ²⁶ Enne ngoli kehe uno wo kuyuva nkango dande a dire kudi limburukwa nga kara yira mukafumu wo mugova a dikiliro ngjuwo yendi pa museke. ²⁷ Mvhura ayiya, ruhandjo aruya, ntani likundungu ali yungu no kutowona mundjuwo, ayiwu ntani ya yungurukire po.

²⁸ Apa amanine Jesusa kughamba nkango dino, mbunga yatetukire unene ku masongo hendi, ²⁹ Mbyo vyo si uye ava songire no nkondo, ntani kapisi yira valirongi vo matjangwa vavo.