¹ Makura Jesusa a ghamba kumbunga ntani kuvarongwa vendi. ² A ghamba ashi," Valirongi matjangwa ntani Vafalisayi vana shungiri pashipuna sha Mosesa. ³ Mpo ngoli kehe vino vamupangera ashi murughane, virughanenu vininke vino ntani nakuvikengera. Ano ngoli kapishi muhonene virughana vyavo, vavo kughamba vininke ano ngoli nakuvirughanashi. ⁴ Nhii, vavo kumangayika dimurongero dadinene odo dadiditopo kudishimba, ntani makura vavo kuditura pavipepe vyavantu. Ano ngoli vavo naghumwavo kapi vashwenitako nyara mukudishimba. ⁵ Vavo kurughana vininke vyavo navintje vavamone vantu. Vavo kurughuna maruvya ghavo ghamanene, ntani kunenepeka ghuhura wa vikoverero vyavo. ⁶ Vahora mavango gha vampititi pavipito ntani vipuna vya vampititi mushinagoge. ⁷ Ntani makundo ghamawa ku mavango ghakughulitira, ntani nakuva kugha vantu "Rabb." ⁸ Ano ngoli kapishi vamukughe 'Rabbi', morwa anwe mushongi ghumwe tupu mwakara naye, ntani namuntje muvakuru navamughuni. ⁹ Ntani kwato mukafumu ogho ngamu kugha pano palivhu ashi shenu, anwe kwakara tupu nashenu ghumwe, ntani ghuye muliwiru anakara. ¹⁰ Narumweshi ngava mukugha ashi 'Mushongi', anwe kwakara na mushongi ghumwe tupu, Kristusa. ¹¹ Ano ngoli wamunenepo mukatji kenu kwakara mukareli wenu. ¹² Keho ghuno wakukuyerura mwene ngava kamudidipita, ntani wakukudidipita mwene ngava kamuyerura.

¹³ Ano ngoli nane anwe, valirongi matjangwa ntani vafalisayi vakuvilipa! Anwe kugharera vantu ghuntungi wa liwiru. Anwe nakungenamoshi naghumwenu, ntani anwe kapi muna kupulitira ovo vana shano kungena vavirughane. ¹⁴ Nane anwe, Valirongi vamatjangwa ntani vafalisayi, vakuvilipa! Anwe kulyapo makende ghakundjugho, pashirugho osho anwe kuna kuraperera ndapero dadire. Anwe ngamu kawana mpanguro yenu yayinene.

¹⁵ Nane anwe, valirongi matjangwa ntani Vafalisayi, vakuvilipa! Anwe kuvindakana lifuta ntani9 shirongo mutezwilitepo ghumwe, ntani apa akara ghumwe, anwe kumumutura akare pavili amupitakane anwe mulivango lya kudjonauka.

¹⁶ "Nane anwe, vapititili vavatwiku, anwe vakughamba," Kehe ghuno wakughana ntembeli, navimweshi. Ano ngoli kehe ghuno wakughana ngorodo yakuNtembeli, ndje anatikitomo mughano.' ¹⁷ Anwe magova vatwiku! Vinimbyo vyavinenepo, ngorodo ndi oyo yarenkitango ngorodo yipongoke? ¹⁸ Ntani, 'Kehe uno wakukughana sidjambero, navimweshi. Enne ngoli kehe uno wo kuhana uswi owo una karapo, ndje ana tikitomo muhano.' ¹⁹ Anwe vantu vavatwiku! vinke vyavinenepo, uswi ndi sidjambero oso sa renkitango uswi upongoke? ²⁰ Mpo ngoli, wakughana shidjambero kushighana ntani nanavintje vina karopo. ²¹ Wakughana ntembeli kuyighana ntani nogho atungo mwayo. ²² Ntani ogho wakughana liwiru kughana shipuna shaghuHompa sha Karunga ntani naye wakushingiripo.

²³ Nane anwe, valirongi matjangwa ntani Vafalisayi, vakuvilipa! Anwe kutapa mpandu mumwaka lividi lyakutovetita, ano ngoli mwashuva mwahana kumana vyavinenepo muveta-ghuhungami ntani ghuna nkenda ntani ghulimburukwi. Ano ngoli munakona kumana ntani kapishi kushuva mwahana kumana. ²⁴ Anwe vapititili vavatwiku, anwe kudindako ndi ano ngoli kumina ntonga!

²⁵ "Nane anwe, valirongi matjangwa ntani Vafalisayi, vakuvilipa! Anwe kukenita pantunda yankinda ntani yashisha, ano ngoli munda kwayura vyavakorokotji na madoho. ²⁶ Anwe Vafalisayi vavatwiku! Kenitenu pamuhovo munda yankinda ntani yashisha, mposhi pantunda napo pakene.

²⁷ "Nane anwe, valirongi matjangwa ntani vafalisayi, vakuvilipa! Anwe kuna kara yira mbira valimbaghura, yaku moneka ghufughuli pantunda, ano ngoli munda mwayura vifupa vyavantu ntani navintje vyanyata. ²⁸ Mundjira yakukufana, nanwe nka pantunda kumoneka muvahungami kuvantu, ano ngoli munda yenu kwayuramo kuvilipa ntani nakudira kutikitamo veta.

²⁹ "Nane anwe, valirongi matjangwa ntani na vafalisayi, vakuvilipa! Anwe kutunga mbira davaporofete ntani nakudiwapayika mbira davahungami. ³⁰ Anwe kughamba, "Ntjene twa tungire mumayuva gha vashetu, ndi kapi twakalire vahameni mwavo mukutura ndjo muhonde davaporofete." ³¹ Mpo ngoli anwe kutapa ghumbangi kwana ghumwenu ashi anwe vana vambovo vadipaghire vaporofete. ³² Nanwe nka tikitenumo ovyo vakalire vashenu. ³³ Anwe mayoka, anwe vana vavambaroka, weni omo mutjira mpanguro yalidjonaghuko? ³⁴ Mpo ngoli, kengenu, kuna kumutumina vaporofete ntani vakafumu vavakotoki ntani valirongi matjangwa. Vamwe vavo ngamu vadipagha ntani nakuvapampara kushikuruse, ntani vamwe ngamu vatoghona mushinagoge denu ntani nakuvatjida-tjidira kutunda shitata yenda shitata. ³⁵ Vitundwamo ashi papenu vinakara ngayiya honde yayihungami nayintje oyo yatekero mughudjuni, kutunda kuhonde yaAbel yaghuhungami, dogoro kuhonde yaSakariya mona Berekiya, owo mwadipaghire pakatji ka ntembeli na shidjambero. ³⁶ Vyaghushili naku mutantera, vininke navintje vino ngaviya pa ruvharo runo.

³⁷ "Jerusalema, Jerusalema, ngamu dipagha vaporofete ntani kutona mawe ovo vatuma kwendi! Shirugho shakuuhura kuni napongikire vana venu kumwe, yira moomo apongekenga litende tutjiyo tjiyo munda yamavava ghendi, ano ngoli anwe kapi mwavipandire! ³⁸ Kengenu, ndjugho yenu maghoko-ghoko ngayikara. ³⁹ Mpo ngoli nakumutantera, kapi ngamu nkenga ame kutunda pano dogoro ngamughambe, 'Muna lirago ndjegho wakuyera mulidina lya Hompa.'