¹ Haho lusugu lwa ulihocha haluhwile, buliyeshe lusugu lwa lutangi lwa yinga, Maliamu Magadalena na Maliamu guya bubili, bagile ulilola sinda. Na ² ulola, habele ititicha ya sii yata, yulu malaika gwa Mlume gusalile uhuma hegulu guchwile na uumbagacha liya liwe na ulishamina. ³ Na yenyi yage ibele nahi ahenyu - henyu na bisanjwa biake bibele bihaha nahi imundimundi. ⁴ Baya basolokoto yulu ya boba badandile babele nahi babu.

⁵ Malaika gugaile na ubasambila baya baachana. Benywe nangu usina, bululi nigidi muli hummenga Yesu nine kususulwe. ⁶ Gushi iyaka hano, yulu gwachwa nahi bieli ganine. chuwe ulola helilachichwe.

⁷ Benywe gidakwe abilo ubasambila bakikiwa bake gwachwa uhuma ubabu. Lolwe gwabangwa ugia Galilaya, no wamwimmona. Bibyo nahuhwa umsambila.

⁸ Baya baachana bahume haya hasinda nukia abilo wa iduba na saso lingi, na ubasambila bagigiwa bage mwano. ⁹ Haho Yesu gusambene nabo gubahele, moyo! Bashemine na um'muda umagulu na um'bungila machwi. ¹⁰ Hanyuma Yesu gubasambile, nangu uba na bobaa giwe ubasambila bashi wetu babangwe Galilaya ubo noo wabimona.

¹¹ Nabaya baachana hababele hukia, lola baya basolokoto bagingile mmbuga, babasambile bibuli byata mwano gwa byose byene bigiliye. ¹² Basumbile hamwechi na baulu, bahungile mlango babahele baya basolokoto bumona bwingi. ¹³ Babaganine mugane bagigiwa bachwile mpusuku bangiba hatwaba balachu. ¹⁴ Na ino inywa ishihulichiwe wa liwali, beswe tuidokoma nagee, na benywe tii mmuminya iduba. ¹⁵ Basolokoto bakuhile buya bumona, na wita nahi byabasambilwe na iyo inywa isambalele u Bayahudi bose nda na lino.

¹⁶ Na baya bakikiwa umi na gumwechi bonugiya Galilaya, uluya loono luelibalagile Yesu. ¹⁷ Nabo habammonine, bambungile machwi hawingi habo bamwe babele na mashaka. ¹⁸ Yesu guchwile wabali gudogomine nabo, gubasambile, nihelwe uoma ose hekulu na hano hasii. ¹⁹ Bibyo, giiwe, ugiita mioga giose uba bagigiwa, m'bachunde wa china lia tata, mwana na wa mtima guhaha. ²⁰ Na ubagigia na uwita biose biandi msambile benywe na lolwe, nene nihamwechi nenyu masuku mose, ndaa na isula ya ibaloo.