¹ Bibio Bafalisayo na Bakochi bachuile wa Yesu uhuma Yelusalemu. Na uukana, ² Yulu ya ii bakikiwa bali hubela mihano kia bauulu, yulu ya ii bashihulisua maboo habali huya iliwa.

³ Yesu kubakaile na udokoma, na benywe ati nuli hubela m'bindo kwa Abeca Pungu yulu ya mihano kienyu? ⁴ Yulu Abeca Pungu akanine, “Nyemia sobe na mnobe; mine kuitua sake au mnake uwa na kawe.

⁵ Benywe mwakana; Kuisambila sake au mnake, yoyose ilingie uwatilichiwe na nene ii ibakulue ⁶ Wa bibio kushinyemia sake a mnake. ⁷ Benywe ba Lububa umeso, ii bibenju bieli buile Isaya wa miano kienyu, kukanine, ⁸ Bano batu bali huunyemia wa milomo; mitima kiabo kili koo nanyi. ⁹ Nabo bali huutambikila maboo hululu. Bali hukikia lukikio, Ii alako a balanga batu baebalo.

¹⁰ Kukishile ihichi ya batu na ubasambila, ¹¹ Hulichiwe, maanywe, ishi iya ilihukingila mmanywa ili humkita badoku, ila iya yine iliihuhuma mmanywa noo yii mmita uba mdoku.

¹² Bakikiwa bamkilile, na udokoma na Yesu, uhumana nambo Bafalisayo habahuliche iya inywa bachikililwa? ¹³ Kubakaile, yose ishiuninywe na Tata kwa hekulu yiichulua. ¹⁴ Balewe; babo ii tulombwe bihobu bia bihobu. Na ihobu ibe lombolela inge nake ihobobu, biose bibili byi kuila mmiina.

¹⁵ Pedelo kumkaile na uukanina, Tusambilekuko mlingilisho.

¹⁶ Yesu kudokomine, ata mano mengo na benywe mushinaba na lwenyi? ¹⁷ Mushi na mana ukana biose biine bilihukingila mmanywa uhitila mnda, isutelwa uumtambo? ¹⁸ Biose biine biliihuhuma mnanywe, bihuhuma mnda mwa mtima; nabio noo bili hummita mtu uba mdoku. ¹⁹ Yulu mnda mwa mtima noo musuuhuma malanga mabii, uhaka, lusengu, masei, bweeba, udokomena lulimi, na misobo; ²⁰ Bibio, noo bili humita mtu udoka na uya hambele ha ulikoka maboo bishi huummita mtu uba mdoku.

²¹ Yesu kuhumine ubo, nuukia lubi lua Tilo na Sidoni. ²² Lola, kumwe mmachana Mkananayo kua ulukumba kuchuile, kuumtele lubila nuukana, undeelele, Mlume, Mwana kwa Daudi; msiha kuanyi kuawaswa na miha.

²³ Yesu kushimkaile atu. Bakikiwa bake, bamkilile na umsambila ukana, mleekalikile lwake, bululi kulihuita mdodo uu nyuma wetu.

²⁴ Kukaile na udokoma, nishituminywe yulu ya miyoo kia nndu kia Isilaeli.

²⁵ Nake kuchuile na umpungila machui, nukana, Mlume, umbwatiliche ²⁶ Kumkaile na udokoma, Bishi bisoka eelewa ya baana na wiitelela awa, ²⁷ Kumkaile, Ehe, Mlume, ata tuwa tusuuya biolocho bisuukwa ubulilo bwa balume babo.

²⁸ Haho Yesu kumakaile na udokoma, Mako, buwasha bobe ii bwata; na bibe oli biolihubenja. Msiha kuake kuhonine moka maya mengo.

²⁹ Yesu kuhumine uya, nukiya mibamba mwa ichiba ya Galilaya; kuchimine loono, kushamine ubo. ³⁰ Ihichi yata ya batu ikilile na uswalila, bitende, bihobu, tumeme, bilema, na bange beengi, bababiile uumakulu make kee nuubahonya. ³¹ Na ihichi yose ikakilwe, habamonine tumeme, tuli hudokoma, bilema bisele poo, bitende bilehukiata, na bihobu bili humona; bamtonine Abeca Pungu a Isilaeli.

³² Yesu kubakishile bakikiwa bake na ukana. “Ihichi nihuimonena kene, masili masuku matatu bashama hamwechi nanyi, naba bashina biuwa; nishihubenja ubasambila kidakwe uumadu menyu, banachwa uwila mmadila.”

³³ “Bakikiwa bake bakanine, tuimona hii mikati kia ulisha ino ibalo ya batu mno mkala, na ubakiusha bano bose?” ³⁴ “Yesu kubabudiche mwina mikati keenga? Bamsambile mikati njwii na swii chicho cha mianda kia bana.”

³⁵ Kusambile ibalo manda ishame hasii. ³⁶ Kukuhile kiya mikati njwii na kia mianda, kuheleleche, na ubinoka, na ubaha bakikiwa bake, na bakikiwa bahele iya ibalo manda. ³⁷ Bose balile na ukyuuta; batolile bihindi byose biine bishikele huya bikilule bitanga njwii. ³⁸ Na balumiana bose bene balile babele mauki mana, nangu ubala baachana na baana.

³⁹ Kee nuulakana na iya ibalo manda, kuchimine buato nukia lubi lwa Makedonia.