21
1
जब येशू और बाके चेला यरुशलेमके जौने जैतुन डाँगाको बेथफागेमे आए पुगे, तव येशू दुई चेलनके अइसे करके पठाई,
2
"तुम जौन गाउँमे जाबओ। हुवाँ पुगतए तुम एक गदहा और बाको बच्चा बाँधो पएहौ। बाके खोलके मिर ठिन लाबओ।
3
कोइ तुमसे कुछ कैहंए तव, “प्रभुके जाकी जरुरत हए कहीके कहिओ और बा तुरुन्त तुमरसँग बाके पठाए देहए।”
4
अगमवक्तासे बोलो बचन पुरो होबए करके जा भओ रहए,
5
सियोनकी लौड़ीयासे कहा, देखओ, तुमर राजा तुमरे ठिन अए रहोहए, नम्र हुइके गद्हाक उपर सबार हुइके, गद्हाक् बच्चा औ एक बछ्ररा उपर।”
6
तव चेला गए, और येशू बिनसे कही जैसो करीँ।
7
बे गद्हा और बच्चा लाईं, और बाके उपर अपन लत्ता कपणा बिछाईं, और येशू बा बाके उपर बैठो।
8
भीण बहुत अपन लत्ता डगरमे बिछाइँ, और रुखाको हाँगा काटके डगरमे बिछाएदईं।
9
बाके अग्गु और पिच्छु लागि भीड अइसे कहीके चिल्लात रहँए, “दाउदको पुत्र होसन्ना! धन्य हए बा, जो परमप्रभुके नाउँमे आओहए! परमधाममे होसन्ना!”
10
जब बा यरुशलेममे घुसो सबए शहेरमे हलचल मचगओ। आदमी पुछन लागे, “जा कौन हँए?”
11
भीडके आदमी जबाफ दईं, “जा गालीलके नासरतसे अओ भओ अगमवक्ता, येशू हए।”
12
येशू मन्दिरमे घुसो। और बा मन्दिरमे किनबेच करन् बारेक् सबके भजाएदै, और पैसा बद्लन बारेक् टेबुल, और कबुतर बेचन बारेक् समान पल्टाएदै।
13
बा बिनसे कही, “अइसो लिखोहए, 'मिर घर प्रार्थनाको घर होबैगो।' पर तुम जाके डाँकुको अड्डा बनाए हओ।'
14
अन्धरा और लंगड़ा मन्दिरमे बाके ठिन आए, और बा बिनके अच्छो करी।
15
जब मुखिया पुजारी और शास्त्री बाको अचम्मो काम देखीँ और लौड़ा लौड़ीया मन्दिरमे “दाउदको पुत्र होसन्ना” करत् चिल्लात सुनी, तव बे क्रोधित भए,
16
और बे बासे कहीं, “सुन्तहओ, जा का कहेरहो हए?” तव येशू बिनसे कही, “हाँ, सुन्तहऔं, का तुम पढे ना हओ, छोटे बच्चा और दुध-खानबारेनके ओठसे बा पुरा प्रशंसा लई हए?”
17
तव बिनके छोणके बा शहेरसे निकरके बेथानियामे गओ हुवाँ रात बैठो।
18
सुबेरे शहेरसे घुमत पेती बा भुखानो रहए।
19
"डगर किनारे बा एक गुलरको पेड़के देखी। बा पेड़के जौने आओ, तव बामे पत्तासे अलाबा और कछु नापाई। तव बा बासे कही, “अब तिर मे कबहू फरा ना फरए” तव बा गुलरको रुखा तुरन्त सुखगओ।
20
जाब जा देखके चेला अचम्मो मानके कहीं, “जा गुलरको रुखा कैसे तुरन्त सूख गओ?”
21
येशू जबाफ दैके बिनसे कही, “नेहत्य, मए तुमसे काहत् हओं, तुमरमे विश्वास हए और कबहू शङ्का न करहओ तव, गुलरको रुखामे जो करो गओ, यित्कए इकल्लो ना हए, पर जा डाँगा फिर उखणके समुन्द्रमे गिरजा' कएहओ बा हुइजए हए।
22
विश्वास करके प्रार्थनामे जो कुछ मँगे हओ बा तुम पाबैगे।”
23
बा मन्दिरमे घुसो, और बा शिक्षा देतपेती मुखिया पुजारी और जनताके धर्म-गुरु बाके ठिन आए, और कहीं, “कौन अधिकारसे तुम जा काम कर रहेहओ, और कौन तुमके जा अधिकार दओ?”
24
येशू बिनके जबाफ दैके कही, “मए फिर तुमसे एक प्रश्न पुछ्तहओं। मोके बाको जवाफ देहओ? तव मए कौन अधिकारसे जा काम करत् हओं, सो तुमके बातएहओं।
25
यूहन्नाको बाप्तिस्मा कहाँ से भओ? स्वर्गसे कि आदमीसे?” बे आपसमे अइसो काहत बहस करन् लागे, “स्वर्गसे कैहँए तव, बे कैहँए तुम उनके काहे विश्वास ना करे?'
26
तव आदमीसे कैहँए तव, हमके आदमीसे डर हए। काहेकी सब यूहन्नाके अगमवक्ता हए कहिके काहत हँए।
27
जहेमारे बे येशूके जबाफ दईं, “हमके पता ना हँए।” बा बिनसे कही, “मए फिर कौन अधिकारसे जा काम करत् हओं, सो तुमके ना बतए हओं।”
28
"तुम क बिचार करत् हओ? एक आदमीके दुई लौड़ा रहएँ बा पहिलो लौड़ासे कही, 'लौड़ा, जाएके आज दाखबारीमे काम कर।’
29
“बा जबाफ दै, 'मए ना जैए हओं।' तव पिच्छु पछताएके गओ।
30
“दुसरो लौड़ा ठिन जाएके बासे बहे बात कही, बा जबाफ दै, 'मए जामङ्गो।' पर बा न गओ।
31
अब जे दुईमे कौन बा दौवाको इच्छाके पालन करीँ?” बे जबाफ दईं, “शुरुबारो।” येशू बिनसे कही, “नेहत्य, मए तुमसे काहत् हओं, कर उठानबारे और वेश्या तुमसे अग्गु परमेश्वरके राजमे प्रवेस करेहँए।
32
काहेकी यूहन्ना तुमरे ठिन धार्मिकताको डगर दिखानके आओ, पर तुम बाके उपर विश्वास ना करे। पर कर उठानबारे और वेश्या बाके उपर विश्वास करीँ। तुम जा देखके फिर पश्चात्ताप ना करे, और उनके उपर विश्वास ना करे।
33
“दुसरो कहानी सुनओ। कोइ एक जनी घरबारो रहए, जौन एक दाखबारी लगाई, और बाके आसपास बेढा लगाएके हुवाँ दाख पेरानके एक कोलु धरीँ, और एक मचान बनाई औेर किसाननके ठेंका दैके बा परदेश गओ।
34
जब फसलको समय आओ, बा किसाननके ठिन अपन हिस्सा मागन नोकरनके पठाई।
35
तव किसान बाके नोकरके पकणके एकके पिटीँ, दुसरेक मारडारीं, और तीसरेक पत्थरसे मारीँ
36
फिरके बा अग्गुसे जद्धा नोकर पठाई, और बे यिनके सँग फिर उइसीय व्यवहार करीँ
37
मिर लौड़ाके त बे आदर करेहँए कहीके सोंचके अन्तमे बा अपन लौड़ाके बिनके ठिन पठाई।
38
"तव किसान लौड़ाके देखके आपसमे कहिँ, जा त उत्तरधिकारी हए। आबओ, बाके मराएँ, और बाको उत्तरधिकारके लेमए।'
39
तव बे बाके पकणके दाखबारीसे बाहिर लैजाएके और बाके मार डारीं।
40
अगर जब दाखबारीक मालिक आएहए, तव बा बे किसानके का करेहए?”
41
बे बासे कहीँ, “बे दुष्टनके सर्वनाश करेहए, और दाखबारी दुसरे किसानके ठेंकामे देहए, जौन बाके फसलको हिस्सा समयमे दे हएँँ।”
42
जौन पथराके भवन बनान् बारे रद्द करीं रहयँ बहे कुनैठोको खासपत्थर बनो, जा परमप्रभुसे भओ हए, और हमरे नजरमे जा अचम्मो हए। येशू बिनसे कही, “का तुम कबहु धर्मशास्त्रमे ना पढे हओ?'
43
"जहेमारे मए तुमसे काहत् हओं, परमेश्वरको राज तुमसे छिनो जएहए, और एक अइसो जातिके दओ जएहए, जौन बाको फरा फराबैगो।"
44
जा पत्थर उपर गिरनबारो चकनाचूर हुइ जएहए, पर जौन उपर बा पत्थर गिरैगो, बा बासे चिबद जएहए।”
45
जब मुखिया पुजारी और फरिसी बाकी कहानी सुनी, तव बे जा हमर बारेमे कहि हय कहिके समझीं।
46
बे बाके पकणन ढुँड़ी, तव बे भीडसे डराए गए, काहेकी आदमी बाके एक अगमवक्ता हए कहिके मानत् रहएँ।