20
1
“स्वर्गको राज जमिनको एक मालिक जैसो हए, जो भुकभुको सुबेरे अपन दाखबारीमे खितहरानके दिहाड़ीमे काम लगान बाहिर निकरो।
2
खितहरानके एक दिनमे पानबारो दिहाड़ी तोकके बा अपन दाखबारीमे पठाई।
3
जब बा नौ बजे घेन बाहिर निकरो, बा और कामदारनके बजारमे खालिमुली ठाणे देखी,
4
और बा उनसे कही, 'तुम फिर दाखबारीमे जाओ, और जो ठीक हए बा मए तुमके देमङ्गो।' तव बे फीर काम करन गए।
5
फिर बे बाह्र बजे और तीन बजेघेन बाहिर निकरके उइसी करी।
6
बा पाँच बजेघेन बाहिर निकरके औरनके ठाणो पाई, और बिनसे कही, ‘तुम काहे बिना कामके ठाणेहओं?’
7
“बे बासे कहीं, 'कोइफिर हमके दिहाड़ीमे न लगाईं हए।’ “बा बिनसे कही, ‘तुम फिर दाखबारी (आँगुरकि बारी) मे जाओ।’
8
“जब संझा हुइगओ, तव दाखबारीको मालिक अपन कर्मचारीनसे कही, 'खितहरानके बुलाएके पच्छु आनबारेनसे लैके अग्गु आनबारेनके सबके बिनकी दिहाड़ी देबओ।’
9
पाँच बजे काममे लागन बारे आए, और बे सबय पुरो दिनको दिहाड़ी पाईं।
10
जब पहिलिसे दिहाड़ीमे लागनबारे आए, तव बे जद्धा पाएहएँ कहिके सोंचीं, पर बे सबय फिर एक दिनकी बारबर दिहाड़ी पाईं।
11
दिहाड़ी पाएके पिछु जमिनको मालिकके विरुध्दमे बे बर बरान लागे।
12
बे काहन लागे, जे पिच्छु बारे एक घण्टा काम करीं, पर हम दिन भर काम करे, पर तुम ऊनके हमरी कता बनाए हओ, हम त सारो दिन काम करके घामुमे मरे।'
13
“तव बा बिन मैसे एक जनीके जबाफ दई, ‘सँगी, मए तुमरे उपर कुछु अन्याय न करोहओं। का तुम मिरसँग पुरो एक दिनकी दिहाड़ीमे काम करहौ कहीके कबुल न करे रहओं?
14
तुमरी पानबारी दिहाड़ी लैके जाबओ। जे पिच्छु आनबारेनके फिर मए तुमके दौव बरोबर देन चाँहत् हओं।
15
का अपन सम्पत्तिके मए चाहो जैसो ना करपात हओं? मिर उदारतामे तुमरी आँखी काहे जरत हए?’
16
अइसीय पिच्छु बारे अग्गु हुइहँए और अग्गु बारे पिच्छु हुइहँए। बुलाय भए बेढम हँए पर चुने भए कमए हँए।”
17
जब येशू यरुशलेम घेन जात रहए बा बाह्र चेलनके अलग लैजाएके डगरमे बिनसे कही,
18
"हम यरुशलेम घेन जात हँए अब आदमीक् पुत्र मुखिया पुजारीनके हातमे सौंपो जएहए, और बे बाके मृत्युदण्डको दोषी ठैरय हँए|
19
बाकी खिल्ली कर हँए, कोर्रा लगाए हँए, और क्रुसमे टाँगनके ताँही बे अन्यजातिनके हातमे सौपङ्गे, और तीन दिनमे बा जिन्दा हुइके उठ जएहए।”
20
तव जब्दियाक लौड़ाकी अइया अपन दुई लौड़ाक् संगमे लैके येशूके जौने आएके घुँटो टेक्के बासे बिन्ती करी।
21
बा बिनसे पुँछी, “तुम का चाँहत् हओ?” बे बासे कही, “आज्ञा करओ और तुमरे राजमे मिर जे दुई लौड़ा मैसे एक जनी तुमरे दहिना हातघेन, और दुसरो तुमरे दिबरा हातघेन बैठन पामँए।”
22
तव येशू बिनसे कही, “तुम का मगत् हओ सो न जानत् हओ, जौन कटोरा मए पिनलागो हओं, का बा तुम पि पएहओ।”
23
बा कही, “मिर कटोरा तुम पिहओ, पर मिर दहिना और दिबरा बैठन देनबारी बात मिर हातमे ना हए। जा ठाउँ बिनके ताँही हए, जौनके ताँही मिर पिता तयार कर डारी हए।”
24
जा सुनके दसओं जनी बे दुई भैयानसे दिक्काए गए।
25
तव येशू बिनके अपने ठिन बुलाएके कही, “तुमके पता हए, कि अन्यजातिके शासक बिनके अधीनमे रखात हँए, और बणेबणे बिनके उपर अधिकार जमात हँए।
26
तुमरे बीचमे अइसो ना हुइहए, पर जौन तुमर बीचमे बणो होनको इच्छा करत् हए, बा तुमरो सेवक होन पणैगो।
27
जौन तुमर मैसे पहिलो होन इच्छा करत् हए, बा तुमरो कमैया होन पणैगो,
28
जैसी आदमीक् पुत्र फिर सेवा पानके ना पर सेवा करन् और बहुतनको छुटकाराको मोल स्वरूप अपन प्राण देन आओ हए।”
29
बा यरिहोसे जातपेती, एक बहुत भारी भीड बाके पिछु लागी।
30
डगरके किनारे दुई जनी अन्धरा बैठे रहँए। येशू बा डगरसे जात रहए बे जा बात सुनके अइसे कहिके चिल्लान लागे, “हे प्रभु, दाउदको पुत्र, हमरे उपर दया करओ।”
31
भीड बिनके चुप लागैं कहिके डांटी, तव बे अइसे कहीके और जोड़से चिल्लाइँ, “हे प्रभु, दाउदको पुत्र, हमरे उपर दया करओ।
32
तव येशू रुकिगओ और बिनके बुलाएके कही, “तुम का चाँहत् हओ? मए तुमरे ताँही का करदेओं?”
33
बे बासे कहीँ, “हे प्रभु, हमर आँखी खोलदेबओ।”
34
येशू डाहा करके बिनकी आँखी छुइदै और तुरन्त बे देखन लागे और बे बाके पिच्छु लग गए।