¹ Bilina Jisas te warsea ndaa nionte tonok te ma ka maene san disaipol niosi ka, ² "Kam kowilye na wembung lo mon koun te ka wi passover, te swa ma ka wa sengene Neti Vianten vian te ka yap tokate yan le mbuowo." ³ Te jif prist meane elda nio yam me sakvi sukuo yan pales se hai prist na san is mi Caiaphas. ⁴ Yam soro sukuo na ka yap ngumkate jisas or tuswa na vianten nio saka yan kole, te ka yap tiye nge. ⁵ A yem ka, ka, "Saka ran ngene yen taem ane festival, Katite ka wi mbah an tuane vianten nio." ⁶ Te bilina Jisas be Bethany kuane Simon na ti lie leprosy te Jisas me ngene ma mesa, ⁷ ka yet tas ndu yan tebol ndu hen, viaven swa meme meane mbeh ne oil swa na mbuon muwuten, te ma livine yan mbeti Jisas. ⁸ A ka san disaipol nio yat esi, yio miyia te yam ka, "Tevian sewe sa ma mawane sientak? ⁹ Entak tewese ka yap puos ane te ngene vior tuswa wi towo te sengene meane ngingivetu an nio." ¹⁰ Jisas mo kole sewe sa yem ndu ka te me sene te ka, "Tevian sewe sa kasim ndu mawane niornioran se viaven entak? Nge me ngene siswa muwu seaten ne nie. ¹¹ Ngingivetu an nio ka yap ndu meane kimim wuk wakite, a nie saka nan ber meane kamsi nemep. ¹² Ka nge te pias ane tawilinbiek, nge me ngene ente tevian sok mieran. ¹³ Petenan nam ka meane kimim, arve sa ndaa na muwu husili nie ka te vian aran kikio tanapian, sorousian se viaven entak mon kawe ber na vianten nio ka yam ndu sorousili.'' ¹⁴ Disaipol niosi na songavi a lo, niosi swa san is mi judas Iscariot, me vian esi jif prist nio. ¹⁵ Ma husi ka, ''Akip sengene sewe meane nie kanat liye Jisas me lingi yan vihe mim?'' Nio yam pulukte 30 pis ne silver te sengene meane nge. ¹⁶ Tembesie yan wembung ente nge mbe teeane seli tuswa na ka wa liye Jisas vian tevia. ¹⁷ Te ka te me yan wembung na mimo na yam ndu hane bred na ist midianka yen [unleavened bread] disaipol niosi yeme teve Jisas te ka, ''Kop ka arve sa kom ndimiane ka kop hane Passover aran te ka kisi vian naknak ane?'' ¹⁸ Nge ma ka meane niosi, ''Ka vian yen siti akawesi vianten swa ate, kap ka meane ka, 'Tija maka, ''Sok taem meme. Kanap ngomu Passover kuane ngok meane sok disiapol niosi.'' ¹⁹ Disaipol niosi yem ngene ma ngimiane na Jisas ma ka meane niosi, te yem vian naknak ane mes ne Passover. ²⁰ Ka or te me i biavep, jisas ma tas ka we hen meane disaipol niosi na yemi songavi a lo. ²¹ Ka yet ndu hen, Nge ma ka meane niosi ka, ''Petenten nam ka meane kamsi, kamsi swa maka wu puosane nie.'' ²² Disaipol niosi yem hongane ma sangaten. Niosi sea swa monok te swa yem tavea te husi ka, ''Yapu, toi nie?'' ²³ Jisas ma ka meane niosi ka, swa na ka wa sasa meane nie yen mbeh, nge sa maka wu puosane nie. ²⁴ Ka Neti Vianetn ka we vian wa ngimeane na yat tis uisili nge. A kienkien na towo ka wi san vianten na maka wu puosane! Tuwu ne nge saka wa saor.'' ²⁵ Judas na maka wu puosane nge ma tavea te ka, ''Toi nie, Tija?'' Jisas ma ka meane ka, ''Kom ka kuonte.'' ²⁶ Ka yet ndu hen, Jisas ma liye bred, ma husi nkunkunean tevian te mbirkote. Ma sengene meane disaipol niosi te ka, ''Ye liye te hane. Ente mi tawilin mbiek.'' ²⁷ Nge ma liye cap te ka sipa tevian tonok te ka meane niosi ka,'' Ye min, kamsi kevene. ²⁸ Teviana ente mi bura ne nie ne kontrak wiwi na ka wi lip te kieswasa vianten ya pis tevian sininduan na masanga. ²⁹ A nam ka meane kimim, saka nan yet min yan weh ne leh entak, sikia na kanap min wiwi tetes meane kamsi yen Kingdom se sok Dada.'' ³⁰ Bilina ka yet kolir ane biye swa tonok, yem sovilie te bunguo vian yan wohu ne Olives. ³¹ Te Jisas ma ka meane nio, kamsi kevene akasip kuo motone nie ndoma yen meaik, tevian mi tis ber ka, 'kanat ngene yat tiye shepherd, te an sipsip nio ka yap kuo swaswa.' ³² Ka nap tavea tetes te vian wimo ne kamsi yan vilye kalili.'' ³³ Pita ma ka neane nge ka, ka kevene yat kuo swaswa motone ngok, nge saka nan kuo.'' ³⁴ Jisas ma ka meane nge, ''Petenten nam ka neane ngok, ndoma yen meaik, wimo ne na ka jio wa tokora, akop ka wi vea sii na ngok koto kowilye nie.'' ³⁵ Pita ma ka meane nge, ''Ka te me ne na ka nie na merr meane ngok, saka nan ka na nato kowilye ngok,'' Te disaipol niosi kevene yem ka ndaa ente. ³⁶ Te Jisas meane disaipol niosi yem vian arna yam ka mi Gethsemane te ma ka meane niosi ka, ''kap tas atak a nie ka na vian murswa te temtemiap.'' ³⁷ Nge mi kie Pita meane neti Zebedee nia yem husili nge, yene nge be hongane masangaten te. ³⁸ Te ma ka meane niosi, ''Nam hongane yenemane nge mi kienkien ten, ma ngemiane na ka na merr. Ye tas atak te ndu tete meane nie.'' ³⁹ Nge me sa vian murswa, me sinkti vian yan tan te temtemiap. Ma ka, ''Sok Dada, kot esi te mior, ngene cap entak wu kuo nane nie. A saka ni sok ndimiane an, a wa ngimiane san ndimiane an.'' ⁴⁰ Ka te kiuli me te esi na disaipol niosi yem ndu bermeaik, te ma ka meane Pita, ''Mangivi, kato wese kap tete meane nie wi hawa tuswa kuon? ⁴¹ Ye ndu tete a ndu temtemiap tevian na saka kan mur vian yen kienkien an. Kam ndimiane a kap ngene, a mbye mermer an mi towoten.'' ⁴² Nge mu kiuli vian mi via lo an te temtemiap tetes, Ma ka, ''Sok Dada, a kot esi saka te mior na ka kop liep kuwu cap entak wu kuo nane nie, a ka nie na mas min yen, te Dada, wa ngimeane sam ndimiane an.'' ⁴³ Ka te kiuli me tetes te esi na yem ndu bermeaik, meta sii nio me meapten ane mearniop. ⁴⁴ Nge ma lingone niosi te kiuli vian vea mi sii an te temtemiap ngimeane na mimo kuon. ⁴⁵ Yene Jisas mu kiuli me teve disaipol niosi te ka, ''Kasim ndu bermeaik a ndu ngapngap kukuone kamsi ngambak? Mi taem tangete na ka yap puosane Neti Vianten vian yan viyan vianten nio ne sini nduan sangsanga. ⁴⁶ Ye tavea te si vian. Kawesi, swa na mu puosane nie sa be me besili monok.'' ⁴⁷ Ka nge te be soro ngambak, Judas, disaiplo niosi swa me me. Vianten yam pis yam husili nge, jif prist meane elda nio sa yam sengene nio me. Yam me meane ehyie meane mbor ne wilis an. ⁴⁸ Swa na ma ka wu puosane Jisas ma sengene emiarmiar swa meane nio, ma ka, ''Ka nat vian kis meane tuswa, te vianten an sangete. Kap ngomu nge.'' ⁴⁹ Kuon te Judas mu kuo vian teve Jisas te ka, ''Halo, Tija!'' te nge mi kis meane. ⁵⁰ Jisas ma ka meane nge, ''Bivian, kom kole kop negene sewe na kom me ne.'' Te nio yam me ngomu nge te piskate. ⁵¹ Katikitak, te niosi swa na yem ndu meane Jisas ma sekuwu an heyie, te towane vian yan hepepeso se hai prist, te siepkote ngelingian. ⁵² Kuon te Jisas ma ka meane ka, ''Kop lingtase ham heyie vian yan milisie, nio na yam viose heyie ka ya merr bian heyie. ⁵³ Ngok kom ndimie ka towese ka nie nap kie sok Dada, te nge ka wa sengene mbu engel wa save songavi a lo? ⁵⁴ A katikite, te saka ne me ngimeane na ndio Yapu ma ka.'' ⁵⁵ Bili ente Jisas ma ka meane vianten nionte ka, ''Mangivi, kim me meane heyie a mbor ka kip tiye nie wa ngimeane vianten ne yasan swa? Wembung kevene nam tas ber bian hem yio be husiane vianten nio, a kito ka kin ngomu nge. ⁵⁶ A kim me atak tevian kuon na akip mowuntene sewe sa provet nio yat ndu tis husili.'' Te disaipol niosi kevene yem lingone nge te kuo swaswa. ⁵⁷ Nio na yam ngomu Jisas yam liye nge vian teve Caiaphas na mi hai prist, teviana scribe nio meane elda kevene yam ndu sukuo ate. ⁵⁸ Pita ma husili nge vian yen yad se hai prist a mber sioten kuon. Nge me vian bianem te tas meane soldia nio te ka we esi ka ya masewe ne nge. ⁵⁹ Yene jif prist nio meane yapu kevene na ten kaonsil yam ndu tee sorousian nkenkeres tevian na ka yap siokiline rong an tuswa te lingi nge yen meran. ⁶⁰ Vianten yam pis yam me ka sorosian nkenkeres woswa a yato esi ka nge we ngene sie tuswa wa sanga. ⁶¹ Toi merin te nia lo yem me te ka, ''Vianten entak ma ka, 'Nie nam wese ka nap jiopkuwu hem yoi me Yapu te ka nap motase yan wembung sii.''' ⁶² Hai prist ma dinio te ka meane Jisas ka, ''Saka kon ka ndaa tuswa? Sewe sa nia yem ndu ka husili ngok tak?'' ⁶³ A Jisas mu wuon kuon ber to ka ndaa tuswa. Hai prist ma ka meane ka, ''Nam ka meane ngok yen is se God na me meu ber, kop ka meane kiniem ka ngok koti kraes, Neti God.'' ⁶⁴ Jisas ma soro vian ane nge te ka, ''Ngok kom warsione kuon te. A nap ka meane ngok, ndoma vian ka kowesi Neti Vianten kawa tas yan viya meato ne yiasan se san Dada, te ka we seling yen metenier ne tongtong.'' ⁶⁵ Kuon te hai prist ma jiotai sukuon te ka, ''Nge ma ka ndaa na towu, ka nge ti God! Ram ndu teeane sewe mon? Yene kim yongkate na nge ma ka ndaa na towu kio yapu na towo. ⁶⁶ Kim ndimie mangivi? Te kevene yam ka, ''Mawese ka nge we merr.'' ⁶⁷ Kuon te yam kusve se nion te tu nge, woswa yam hevia nge. ⁶⁸ Yam ka, ''Ngok komi Krais, kop ka meane kiniem, ka si sa ma hevia ngok?'' ⁶⁹ A Pita be tas ber viliye yen yad, te temili viaven swa na be nkies ate me me te ka, ''Ngok mon komi swa na kom ber meane Jisas na ten viliye Kalili.'' ⁷⁰ A nge ma ka tuane nio ka, ''Nato kowilye sewe sa kom be ka.'' ⁷¹ Ka te vian tinio yan mbolor, temili viaven an swa mon na mi nkies ate me esi nge te ka meane nio na yam ndu ate ka, ''Vianten entak mon me ber meane Jisas ne Nazareth.'' ⁷² Tetes mon nge ma ka, ''Nam petenten, nato kowilye vianten ente!'' ⁷³ Yam ndu murswa mon kuon te nio na yam ndu tinio besili yam me te ka meane Pita ka, ''Mi peten, ngok komi nio swa, kiniem yong kole yen sam soroan kuon na ngok kome sioten.'' ⁷⁴ Te nge ma tembesie na be ka ndaa nio na masanga, te be soro yasyas ka, ''Nato kowilye vianten ente,'' Bili ente kuon te jio ma tokora. ⁷⁵ Pita mu niornior lili vian yan ndaa na Jisas te ka meane nge, ''Wimo na ka jio wa tokora, ngok a kop ka via sii na koto kowilye nie," Kuon te nge mu kuo vian viliye te nteng yen hongane masanga an na towo.