¹ Yan bili ente, Herod yapu na towo ne viliye ate ma hongane nda usili Jisas. ² Nge ma ka meane san hepepeso nio ka, "Ente mi Jon Baptis; Nge ma tavea lili nane mer an. Betiten na ma liye yas an ka we ngene kies an nionte." ³ Herod sa te ka te yam nkomu Jon, yam piskate nge, te lingi nge yen presin tevian Herodias, viaven se Philip,bivian se Herod an. ⁴ Tevian na Jon te ka meane ka, "To mior na kom liye viaven ente mi sam." ⁵ Herod ka ne tiye Jon wuk bili na te be ka nda ente, ah honmenek ane vianten nio teviana nio yam kolwiliye na Jon mi provet swa. ⁶ Te ka wembung na Herod te saor yan te me, te temili viaven se Herodias me me te sap mo ne Herod te nge me esi muwuseaten. ⁷ Te ma lingkate nda entak, ka nge ka we ngene sie sewe na temili viaven ente ka wa husi. ⁸ Ka te vian husi meane yasen te yasen ma ka sewe sa nge ka we me te husi meane Herod, me me te ka meane Herod ka, ''Nam ndimeane ka mbeti Jon we ber yan mbe tuswa te yap liye me teviok.'' ⁹ King ma hongene ma sanga yan sewe sa temili viaven ente ma husi, ah tevian na nge mi linkate ndion monok, ah viantten noi mon yam buo ndu yan san henan, ma tavea te ka ka yap ngene wa ngemeane na viaven an ma husi. ¹⁰ Ma ka te yam vian siebkote biandio Jon yen presin. ¹¹ Te yam lingi mbaten yan mbe swa towo te viose me sengene meane temili viaven an te nge me vian sengene meane san nana. ¹² Te disiapol se Jon nio yam vian viokuwu tawilin biyen yen presin te vian tevini, ka te nok te yam vian ka meane Jisas. ¹³ Ka Jisas te hongene, nge me vian meya yan bot te nio yam vian ar na mi or wiwi. Bilina vianten nio yam hongane, yam likone kuane nio yen taon te ndu hoko biakiliye nio vian. ¹⁴ Ka Jisas te me or te esi mbang vianten na towo. Nge ma hongane ma sanga tevea te me ngene nio na yam mese yam meu. ¹⁵ Ka or ti biavep, disaiplo nio yam me te ka meaneJisas ka, "Atak mi or wiwi, a wembung be me ka wo nok, kop senge kuwu vianten niontak ya vian yen mbilitenem nio na mi besili te ka yap nkiliye mes tiso wi ah.'' ¹⁶ Ah Jisas ma ka meane nio ka, ''towese ka nio yan vian. Kap siokiline mes tuswa te sengene meane nio. ¹⁷ Nio yam ka meane ka, ''Yapu, miya lim kuon ah mesio lo sa ngatak.'' ¹⁸ Jisas ma ka, ''Ye tiliya me teviok.'' ¹⁹ Jisas ma ka te vianten nio yam tas vian yan tan yan mbarvinie. Ma tilya miya na lim meane mesio na lo te, me tee vian milye yen tongtong te ka sipa meane Yapu tevian, tonok te ma mbirkote miya nionte te sengene miane disaipol nio, te disaipol nio yam bibine neame vianten nio na yam tas. ²⁰ Kevene yam hen te henkob. Te disaipol nio yam bakuli ndiri mes na yam hen lingi, yam sungane atuwuo mi songavi a swa mubuo. ²¹ Vianten kevene na yam hen bili ente, yapu nio yami faiv tausen, ah yato pulukte viapmeato nio meane temili nio. ²² Ka tonok te Jisas ma ka meane disaipol nio, ka ya vian yan bot te vian tastene nge tevesie orr, bilina nge be senge kuwu vianten nio. ²³ Ka nge te senge kuwu vianten nio tonok te ma punguo suwuon vian milye yan wohu ka we temtemmiap. Ka or ti biavepten na yia be sio, nge ma tas ber ate suwuon. ²⁴ Ah abialo kekei me vian sioten wuk motene or, be viose tevia teviana yeng be wuwup mi yas. ²⁵ Be vian besili na ka or wi yiop, Jisas ma hoko yan tes te vian tevea. ²⁶ Bilina disaipol nio yam esi na be hoko yan tes vian tevea, homenek ten te yam ka, ''Demiar sa ngete,'' yam his yen honeknek. ²⁷ Viaswa kuon Jisas ma soro vian ane niosi te ka, ''Teminiosi! Nie kuon sa ngatak! Saka homsi nenek.'' ²⁸ Pita ma senekuon te ka, ''Yapu, kati ngok peten, kop ka te na me hoko yan tes meane ngok.'' ²⁹ Jisas ma ka, ''Me.'' Pita ma meya nane abialo te be hoko yan tes te be vian teve Jisas. ³⁰ A ka Pita te esi na yeng mi yasten, nge hon menek. Ka te be ndion vian bian, viaswa kuon mi kie ka, ''Yapu kop sakuwu nie!'' ³¹ Mamanga ten kuon Jisas ma sasa vian, ngum ane vihe pita te sakuwu nge, kuon te ka, ''Sam mbiangru ma kekei ten, tevian sewe sa koto niorkate nie?'' ³² Te ka Jisas ten Pita yet vian yan abialo, yeng me vian yan tan. ³³ Kuon te disaipol nio yan abialo yam tevia te memio ne Jisas te ka, ''Petenten ngok komi Neti God.'' ³⁴ Bilina ka yet akote vian tevesie, te yemi or Gennesaret. ³⁵ Ka vianten nio na ate yet teekole Jisas, yam sengene daa vian kikio viliye ente, te yam tilya vianten kevene na yam mese me tevian. ³⁶ Vianten nio na yam mese yam husi ka yam ndimiane ka yap sikia san nkili sesearan kuon, te yam pis na yam sikia san sesearan yam me meu tetes.