Chaandano 46
Yamupati wabasikwiimba. Intembawuzyo yabana balombe baKkola; kuli Alamoth. Lwiimbo.
1
Leza nchiyubilo anguzu zyesu, lugwasyo luliwo muchiindi chamapenzi.
2
Aboobo tatukoyooyowa, nikuba nyika yasanduka, nikuba zilundu zyazungaanisigilwa aakati kalwizi,
3
nikuba maanzi aalo avuuma akukopana, alimwi nikuba zilundu zyateketa akufutumuka kwazyo. Sela
4
Kuli mulonga uuli aatulonga tubotezya dolopo lyaLeza, busena busalala ooko Simajulu nkwakkala.
5
Leza uli aakati kawo; tuukoyoozunganisigwa pe; Leza uyowugwasya alimwi uyozichita eezyo kumachedo.
6
Masi akateketa alimwi maami akazungaanisigwa; wakanyampula jwi lyakwe, alimwi nyika yakayeemuka.
7
Jehova wamakkamu uli aandiswe; Leza waJakkobu nchiyubilo chesu. Sela
8
Muboole, mubone nchito zyaJehova, lunyonyooko ndwaachita aanyika.
9
Uchita kuti nkondo imane kusikila kumamanino aanyika; ulatyola kavwi akutyoloola sumu muzibbimfu; ulatenta ntibi.
10
Amuumune muzibe kuti ndime Leza; ndiyoonyampulwa aakati kamanyika; ndiyoonyampulwa aanyika.
11
Jehova wamakkamu uli aandiswe; Leza waJakkobu nchiyubilo chesu. Sela