Chaandano 45
Yamupati wabasikwiimba. Intembawuzyo yabana balombe baKkola. Malembe. Lwiimbo lwa luyando.
1
Moyo wangu ulafwasuka amakani mabotu; ndiyoobala chakoompolola majwi angu ngindakabambila aatala amwami; lulimi lwangu nchilembyo chamulembi uulibambilide.
2
Uleebeka kwiinda bana bamisyobo yoonse; luzyalo lulitilidwe amilomo yako; abobo tulizi kuti Leza wakakulongezya kwalyoonse.
3
Bika panga lyako kulubazu, sintaze, mubulemu amubupati bwako.
4
Munguzu zyako koyabuzunda akaambo kakusyomeka kwako, kulibombya amubululami; janza lyako lyalulyo liyooyisya zintu ziyoosya.
5
Tuvwi twako tulabosya; bantu balawa munsi lyako; tuvwi twako tuli mumyooyo yabasinkondonyina bamwami.
6
Chuuno chako, Leza, nchalyoonse alyoonse; mufunko wabululami mufunko wabwami bwako.
7
Wayanda bululami alimwi wasula bubi; aboobo Leza, Leza wako, wakunanika amafuta aalukondo kwiinda benzinyokwe.
8
Zikobela zyako zyoonse zinunkilila mu mili, ma alo ama akkasiya; kuzwa mumaanda abwami bwa ayivoli, tuntimbwa twakubotezya.
9
Bana basimbi baBami bali aakati kabanazi balemekeka; kujanza lyako lyalulyo kuliimvwi mwami mwanakazi uuzweete ngolide yaOfe.
10
Swiilila, yomwana musimbi, langisisya akuchenjekezya kutwi kwako; koluba bantu bakulindinywe aluzubo lwawuso.
11
Mulieeyi nzila mwami uyoyandisya kweeba bubotu bwako; ngusimalelo wako; mulemeke.
12
Mwana musimbi mwaTaya unoliwo azipo; bavubi aakati kabantu bayookumbila luzyalo lwako.
13
Mwana musimbi wamwami mung'anda yamwami wazula bulemu; zizwaato zyakwe zyakachitwa angolide.
14
Uyotolwa kumwami kali muchizwaato cheebesi chamibala iisiyene; banakalindu beezinyina bamutobela, bayoyetwa kulinduwe.
15
Bayozulwidwa alukondo akubotelwa; bayoonjila mung'anda yamwami.
16
Mubusena bwamawuso kuyooba bana bako, aabo mbotakachite bana babami mjunyika yoonse.
17
Ndiyoochita zina lyako kuti likayeeyegwe kumazyalani woonse; aboobo bantu bayokupa kulumba lyoonse alyoonse.