¹ Israel ttö̧ja̧ ji̧nä̧ ttu̧ru̧hua̧rö̧ ttu̧ju̧nä̧rö̧ juiyäi, leví ahuaruhuättö ya̧tȩ Efraín mö̧ä̧'quiyuttömä̧ otonä̧nö̧ jo̧mȩ a̧'u̧cu̧nä̧tä̧ mo̧ro̧ ki̧nö̧. Ja̧u̧mä̧ Belén ötahuiyä, Judá rȩjȩ ttö̧ja̧ isajuru irecua päi'önä̧ ȩmi̧nö̧'ca̧, juȩnȩtä̧ kä̧hua̧tö̧mä̧ pa̧ja̧cuä̧nö̧ huotö jo̧mȩnö̧ ki̧nö̧. ² Ja̧'hua̧nö̧ ja̧'a̧nä̧ irecuattö ta̧ju̧ päi'önä̧ ö̧jä̧cua̧mä̧ adiumä̧ kö̧jo̧co̧cupinö̧: jahuäjumä̧ jaropi'ö kä'o ojusodera̧'a̧, judattö Belén ötahuiyänä̧ kä̧nö̧ 'chi̧nä̧ju̧. Jahuäjumä̧ juȩnȩmä̧ kä̧hua̧tö̧ huä̧mȩtu̧cuä jo̧mȩnä̧ ki̧nä̧ju̧. ³ Ja̧hua̧nö̧ jä̧ji̧ oca'a kirecuomä̧ ä̧rä̧mä̧chö̧, ko'ca'anä̧ ru'i'ö pä'äjita'anö̧ ppa̧jä̧chi̧ya̧rö̧ pä'ö o'ö i̧'chi̧nä̧cua̧. Ja̧'hua̧nö̧ o'ö 'chä̧nö̧mä̧ u̧mu̧huä̧ya̧ ya̧tȩcu̧, ja̧'hua̧ta̧nö̧ burro-tö̧ ta̧ju̧ru̧ o'ipinö̧. Jähuäjumä̧ kä'o ojusodenä̧ dojädinä̧cu̧. ja̧'hua̧nö̧ dojäda'a topö jahuäju kä'omä̧ rö̧ȩnä̧ esehuinö̧. ⁴ Ja̧'hua̧nö̧ ja̧'a̧ i̧mi̧ya̧ jahuäju kä'omä̧ ojusodenä̧ doädinä̧cu̧ huäbodäcuä mo̧ro̧ jo̧mȩnä̧ ö̧ji̧ya̧rö̧ pä'ö. Ja̧'hua̧nö̧ ja̧'a̧ cuä̧nö̧'i̧nä̧ cuinä̧tö̧, au'i̧nä̧ ahuinätö̧ ja̧'hua̧ta̧nö̧ juȩnȩtä̧ a'ecuinä̧tö̧. ⁵ Ja̧'hua̧nö̧ jä̧ji̧ o'ca'a pa̧ja̧cuä̧nö̧ mo̧ro̧ päia'a, pä'ö mo̧ro̧ juoa'a ttö'orächiäja'a, i̧hui̧'a̧ pä'ö boreäcuähua'a topö, i̧mi̧ya̧mä̧ 'chä̧hui̧'ö̧ päinä̧cu̧: Cui̧hui̧'ä̧cua̧'a̧ ä'canä̧, pan-ppa̧tä̧'i̧nä̧ cui'i'opo'i, cujurucu cui̧huä̧cua̧'a̧nö̧. ⁶ Ja̧'hua̧nö̧ pä'attö̧ jahuätö ta̧ju̧mä̧ ji̧nä̧ yo̧mȩtȩ pȩjä̧mu̧ au kä̧nö̧, cuinä̧tö̧. Ja̧u̧nu̧ o'ca'a isaju kä'omä "jua̧u̧ yodomä̧, ji̧nä̧ juȩnȩtä̧ ä'i'a päinä̧cu̧, ja̧'hua̧nö̧ eseäcuäu 'cuättopa pä'ö." ⁷ Leví ahuaruhuättö ya̧tȩmä̧ porächi'ö i̧hui̧'a̧ pä'ö jȩi̧yä̧cu̧, mö̧ä̧yaju kä'omä̧ i̧hui̧'ö̧ juiyönä̧tä̧ päinä̧cu̧. ja̧'hua̧nö̧ ja̧'a̧ttö̧ ja̧u̧mä̧ a̧mu̧cuädäjimä pärotö icu pä'äjita'anö̧ ja̧u̧ yodomä juȩnȩtä̧ ä'inö. ⁸ Cinconö̧ mo̧ro̧ päi'omȩnä̧, porächi'ö i̧hui̧'a̧ pä'ö jȩi̧yä̧cu̧, isayaju kä'omä päinä̧cu̧, cuiti cujuru cu̧ju̧nä̧rä̧cua̧'a̧nö̧, ja̧'hua̧nö̧ jahuätö ta̧ju̧mä̧ ttucua'anä̧tä̧ ni̧pä̧chi̧na̧'a̧. ⁹ Leví ahuaruhuättö ya̧tȩmä̧ Irecua̧mö̧ttö̧ ta̧ju̧ päi'önä̧ ö̧jä̧cua̧'i̧nä̧ ja̧'hua̧ta̧'a̧nö̧ u̧mu̧huä̧ya̧'i̧nä̧ tti̧hui̧'a̧ pä'ö ttö'orächi'äja'a, isaju kä'omä́ päinä̧cu̧, "topi täcö ni̧pä̧cha̧'a̧. Ä'ötä ä'i yo̧i̧mo̧ro̧tä̧ cui̧huä̧cua̧'a̧nö̧ pä'äjita'anö̧ adiu 'cuäcuopa. Yo̧i̧mo̧ro̧tä̧ mo̧ro̧ päi'a porächi'ö ppa̧cuä̧cha̧ja̧ cuoju isodera̧'a̧mä̧. ¹⁰ Ja̧'hua̧nö̧ pä'anä̧, Leví ahuaruhuättö ya̧tȩmä̧ pä'äjita'anö̧mä̧, juȩnȩtä̧ ä'ö jui'ö. Porächi'ö i̧hui̧nö̧ Jebúsra̧'a̧cu̧ juȩnȩmä̧ Jerusalén ja̧'a̧, ja̧u̧mä̧ burrotö̧ ta̧ju̧ru̧ pä̧cuä̧huä̧ ocä huȩjä̧u̧ru̧ ku̧nä̧ri̧nö̧ ja̧'hua̧ta̧'a̧nö̧ irecuamö̧ttö̧ ta̧ju̧ päi'önä ö̧jä̧cua̧'inä ja̧u̧tä̧cu̧ ki̧nä̧ju̧. ¹¹ Jebús ötahuiyä ttötö'köhuächi'o̧mȩnä̧ kä̧hua̧'i̧nä̧ mo̧ä̧cha̧'a̧ u̧mu̧huä̧ya̧mä̧ u̧ru̧hua̧ru̧ pä'inö̧: "Ichi, Jebús ttö̧ja̧ ttötahuiyäcu kä̧'i̧pä̧chu̧ ti̧'cha̧ pi̧yȩ yodomä juȩnȩtä̧ tä'ecuäcua'anö" ¹² Päcu, u̧ru̧hua̧mä̧ ädätinä̧cu̧: "Ko̧ro̧jä̧ttö̧ ichäcuähuotö Israel ttö̧ja̧ pocotö ttidepiyunä̧mä̧ kä̧mä̧do̧co̧tö̧jä̧. Guibeá-bö ti̧'chä̧tu̧cua̧." ¹³ Leví ahuaruhuättö ya̧tȩmä̧ u̧mu̧huä̧ya̧ mö̧ä̧ya̧rö̧ pä'inö, "Ichihuä ti̧'cha̧ juhuoröttömä yȩnȩtȩ tä'ecuäcua'anö Guibeá ötahuiyänäcö̧, Ramá ötahuiyäcö̧." ¹⁴ Ja̧'hua̧nö̧ pä'attö 'cuä'o'ä'cotö, kä̧hua̧mä̧ täcö ma̧ä̧cha̧'a̧, Gabaa, Benjamín ahuaruhuä'cotö ttidepiyunä̧ ¹⁵ ka̧cuä̧mi̧nä̧tö̧ juȩnȩtä̧ Gabaanä̧ ttä'ecua pä'ö. ´Chä̧jä̧'co̧tö̧mä̧ ötahuiyättö ttu̧cuȩ iyähuome pȩjä̧mi̧nä̧tö̧, ja̧'hua̧nö̧ ttö̧'ȩjä̧ma̧'a̧ ya̧tȩ'i̧nä̧ oju'isodenä ttä'ecua pä'ömä oipoco̧u̧ pinätö̧. ¹⁶ Päjuriyänä̧, täcö yodo päi'äja'a, ya̧tȩ bö̧o̧sa̧ i'ättara̧'a̧ aditö i̧huä̧ji̧'ca̧ ppa̧'ä̧chi̧nö̧. Jua̧u̧ bö̧o̧sa̧mä̧ Efraín mö̧ä̧'quiyu i̧sa̧ ja̧'a̧nä̧, juȩnȩtä̧ Guibea ötahuiyänä ö̧ja̧'a̧mä̧ juitomä recuoca'a ji̧na̧'a̧. ¹⁷ Jua̧u̧ bö̧o̧sa̧mä̧, ötahuiyättö ttu̧cuȩ ttiyome kara'a'chä̧nö̧ pȩjä̧tö̧rö̧ topö jä'epö ä̧ju̧cui̧nö̧: ¿To cui̧'chä̧tu̧cuä̧? ¿Tottö cuichäjätucuä? ¹⁸ Levíta i̧sa̧mä̧ pä'inö̧,"Cuä'opö kä̧nö̧ pȩjä̧tö̧jä̧. Judá rȩjȩ, Belén ötahuiyättö ichäjätöjä̧, Oto Efraín mö̧ä̧'quiyura̧'a̧cu̧ 'chä̧tu̧jä̧, juȩnȩ ja̧'a̧ chidepiyumä̧. Judá rȩjȩ, Belén ötahuiyära̧'a̧ i̧u̧ i̧huä̧ji̧sä̧ Ja̧'hua̧nö̧ ja̧'a̧ TU̧RU̧HUA̧ oju'isodera̧'a̧ 'chu̧sä̧, ja̧'hua̧nö̧ chi̧'cha̧'a̧nä̧ ya̧te'i̧nä̧ tä'a pä'ömä̧ huettoco̧u̧jä̧. ¹⁹ Jua'acumä̧ tä̧ji̧mö̧ Burro-tö̧ ttucuä'cuamä̧ ku̧nä̧rä̧tö̧jä̧, ja̧'hua̧ta̧'a̧nö̧ ka̧'a̧ ta̧huȩ vino'i̧nä̧, pan'i̧nä̧, cumö̧huäyaju ku̧cuä̧cuȩmä̧, ja̧'hua̧ta̧'a̧nö̧ pide mö̧ä̧ya̧ u̧mö̧huäyotucu u̧cuä̧cuȩmä̧. Täcö recuärö̧jo̧ca̧'a̧ ko̧ro̧mä̧. ²⁰ Päiyäcu bö̧o̧sa̧mä̧, päinä̧cu̧: Eseusä cuichäja'amä̧. "Ucutunämä huȩnȩ juiyönä kä̧cuä̧huä̧tä̧ ka̧'a̧" Ucuturu recuä rö̧jö̧mä̧ o'cajuiyötä ppädädäcua̧sä̧. Ja̧'hua̧nö̧ ja̧'a̧nä̧ ötahuiyättö ttu̧cuȩ iyähuomemä cuä'ecuätucuamä pädoco̧u̧jä̧. ²¹ Ja̧'hua̧nö̧ pä'ö bö̧o̧sa̧mä̧ ojusodera̧'a̧ Levitarö ȩpä̧ji̧'ca̧ tti̧jä̧pi̧yä̧ ttötöcäu̧nä̧, tta̧huȩ'i̧nä̧ au kä̧nö̧ ttucua'anä̧, ä̧ji̧mö̧ Burro-tö̧rö̧ ttu̧cuȩ iyiniyä̧cu̧. ²² Ja̧'hua̧nö̧ adiu 'cuättopomȩ, öyähuiyä ttö̧ja̧ttö̧ yotute surojönä̧ kä̧tö̧ isode tto'epö äpatenä̧ cuä'ö kä̧nö̧, isode u̧ru̧hua̧ bö̧o̧sa̧rö̧ pä'inätö̧: "Cuojusodenä̧ do'ächö ichäjirö rä'epiyitö! ¡Jua̧u̧cu̧ tö̧ttä̧mu̧hua̧ pä'ätöjä̧" ²³ Ja̧u̧ isode u̧ru̧hua̧mä̧ u̧mi̧cu̧ rä'o'ö jahuätörö pä'inö̧: Isocö̧, chi̧jä̧hua̧tö̧ ja̧'hua̧nö̧ suronämä̧ jȩ'cui̧yä̧tu̧cuä̧ttö̧" ¡Jua̧u̧ surojömä̧ jȩ'cuä̧tu̧cuä̧! ttö chojusodenä̧ kö̧rö̧mä̧, ¡Ja̧u̧ surojuoepömä̧ jȩ'cuä̧tu̧cuä̧! ²⁴ Topätucui, chittiju uborö jerupajuru'i̧nä̧ ku̧nä̧rö̧sä̧. Ja̧'hua̧ta̧nö̧ chutä irecuamö̧ttö̧ ta̧ju̧ päi'önä ö̧ja̧cua̧'inä pȩnȩtä̧ kä̧ju̧. Juätörötä rädepiyä̧u̧jä̧, pä̧huä̧rö̧jo̧mȩnä̧ jȩ'cuä̧tu̧cuä̧cua̧'a̧nö̧. Ja̧'hua̧nö̧ ja̧'a̧nä̧ piderömä̧ surojömä̧ jȩ'cuä̧tu̧cuä̧. ²⁵ Ja̧'hua̧nö̧ pä'anä̧ ttä̧ju̧cui̧yo̧co̧cu̧, Leví ahuaruhuä'cotöttö ya̧tȩmä̧ irecuamö̧ttö̧ ta̧ju̧ päi'önä̧ ö̧jä̧cua̧rö̧ ȩmo̧po̧'ö̧, jahuätörö rä'epö iyinö, ja̧'hua̧nö̧ i̧yä̧u̧ jahuäjuru 'chu'ädö suronä̧ jȩpi̧nä̧tö̧ jua̧u̧ yodo 'cuäo'önä̧, mo̧ro̧ juhuo̧mȩnä̧ ki̧hua̧ pä'ö hue'ö tticuinä̧cua̧. ²⁶ Ja̧'hua̧nö̧ mo̧ro̧ päia'a bö̧o̧sa̧ ojusodenä kirecuo ö̧jo̧mȩcu̧ ichi'ö äpate ä'ca ma̧'i̧nä̧ju̧, juȩnȩmä̧ pi̧nä̧ju̧ täcö mo̧ro̧juhuome jubö päi'önä. ²⁷ Ja̧'hua̧nö̧ ja̧'a̧ kirecuomä̧ mo̧ro̧ päia'a porächi'ö rä'pächö i̧u̧ äpate bahuepomȩnä̧, irecuamö̧ttö̧ ta̧ju̧ päi'önä̧ ö̧jä̧cua̧tä̧, ku̧mu̧mä̧ äpatecu tecäcänö̧ kö̧'a̧'a̧ bahuepinä̧cua̧. ²⁸ Levitamä pä'inö̧: "Ä̧rä̧mi̧'i̧. Ti̧hua̧" Pä'anä̧, yorisotä kädätococu pinö̧. Ja̧u̧mä̧ äji Burro u̧huä̧mȩ huȩni̧pö̧ ojusodera̧'a̧ ȩpö̧ i̧hui̧nä̧cua̧. ²⁹ Levitamä̧ oju'isodera̧'a̧ 'chä̧hui̧'ö̧, irecua päjäjuru, nahuodänä̧ docenö jo̧mȩnä̧ 'cui'ö icu Israel ttö̧ja̧ tti̧rȩjä̧nä̧mä̧ o'cajuiyönä̧tä̧ hue'ä'chö icuinö̧. ³⁰ O'catoi'önä̧tä̧ jua̧u̧ topätömä̧, pä'inä̧tö̧: "Israel ttö̧ja̧ Egipto rȩjȩttö̧ rättopino̧mȩttö̧ kä̧mä̧dö̧ jitä mo̧ro̧ jubö, ji̧yȩja̧mä̧ toäcuähuoca'a jä̧'i̧ja̧'a̧. ¡Adiu a̧mu̧cuädipö! ¡Ji'ahuitö däje jȩtä̧cua̧'a̧ttö̧!