¹ Njite jliaji inoparrotacada Hageo, Zacaria tsacja, Iddo irri inoparrotacada tsacja, nanoparrota lriipitana naco jliaji Iraelnai Diote narso njaji judionai Judá lricope njite Jerosalén ricope tsacja. ² Niini Zorobalel, Salatiel irri, Jesúa, Sadoc irri nainita tsenacja nadenjica jliaji Dio iipana Jerosalén rico nainai njaji inoparrotacape iáa cape narso iacoti nacjaidata carrona. ³ Njite Tatnai, lritalricanaa jliaji yacaalre Ooni Eufrate pemajle, Seter Boznai njite njaji lrikitsiñape nanao naicjaolre, naaco narso: ''¿Cocao idana iacoti itaitá carro idenjica jliaji panti njite iwayaketa carro jirretaca yacaalre lriwai?'' ⁴ Naaco pja narso: ''¿Cocao neepitana njaji atsianai idenjirri jliaji panti?'' ⁵ Mitsa Dio catsa jliaji icapalri naicawa njaji pekipenai caconaaperri judionai njite njaji nacoema corri nayaamita nadenjica. Ima nawapa nameenaca papaje paperra nadananda talricanaati irso njite Iridietantja iacoti narso lricaitecawa lrinacoapana jliaji nadenjirrina. ⁶ Paperra Tatna imenacalri, Setar Boznai njite njaji nakitsiñape caconaperri iapiya lrirso jliaji talricanaati Darío. ⁷ Nacaite talricanati Darío irso coanca nacapaca, nadana cayoji: ''Imawadaca kjeti iofaa picaolre rico.'' ⁸ Icadaotsa talricanaati ianjii waa piaca wacapa Judá lrico, lriipana lricojle jliaji Dio cjaidaadalri. Njaji inaiki ninperri, nadenjicatsa jliaji panti, njerretacan jiipada macadalripe sho njite nacadaa jaico yacaalre idana naco nadenjishopao. Nanaitja njawacatsa jliaji idenjikjeti matsia njite kjeya. ⁹ Watatja femio nainai njaji pekipenai caconaperri cocaca inaa nadenjica jliaji panti njite yacaalre idana tsacja. ¹⁰ Watatja tsacja femio nainai neepitana naco, pitaitá carro pianjica neepitana njaji atsianai cjaitenaica njaji caacolri piapiya. ¹¹ Niini naaco warso: ''Lrirsoperrica faa Jliaji Dio eenolricojlédalri njite jalredaoca lrico tsacja niini ferretaca tsenacja jliaji panti lrinaitjanda pjia oopi ate lritaitani jliaji cjaidete Irael italricanaa. ¹² Mitsa njaji waferrinaipemi nakerroata pia jliaji Dio eenolricojledalri, cayoshopa Lricadaacana Nabocodonosor, Babilonia italricanaa icaapi ricona, lripeco tsacja jliaji panti njite lridee njaji inaiki aimadan lrirsoperri carrona Babilonia lricojle. ¹³ Mitsa, lriniitaca walria nacó lricanaataca Babilonia naco jliaji talricanaati Ciro, Ciro idana iacoti wapietá carro ferretaca jliaji Dio iipana. ¹⁴ Jliaji talrianati Ciro, lridieta nja owirro njite njaji nanitidape palrataitape Dio iipana itadape Nabocodonosor idenji Jerosalén ricjoite lricadaa carrona panti macade rico Babilonia lrico. Lri dieta pjiomina Sesbasar irso, jliaji lri keepitanatalri gobernadorwa. ¹⁵ Talricanati Ciro iaco Sesbasar irso: Pidee njaji picadaa carrona Dio iipana lrico Jerosalén icojle. Jirreta tsenacjaotsa Dio iipana nirse.'' ¹⁶ Niini Sesabasar íno Jerosalén lricojle njite lricadeena jlipocoa jliaji Dio iipana; wadenjita catsa mitsa corritoa wataitacan. ¹⁷ Matsiatsantja, pjia talricanati, pinaantja naomaca talricanati dapana lrico niini cada jliaji paperra talricanati Ciro idananda lricaitecawa nadenji carro Dio iipana Jerosalén lrico. Njite wawapaotsa femi piinai pimeenaca warso iacoti coanca picaiteca warso.