1
Ijaò tariòre boho-ò rarariòwyìny kia rarybere:—Biwayrawonybenyke, kia-diarỹ adeereny ararybekre, aõhebo butỹỹnybenykre tiu bedeubo.
2
Bexibutunybenyke biwayrawonybenymy boholabenykremy, Ijaò riòre boho boholabenyke aõmybo Israel rarybere, buu.
3
Ruben, kai heka wariòre adela tate. Kai heka waruru tate, Komy bederary wabededỹỹnana, Rexityhytyhyny my, kia aruruteretyhymy wariòre boho ribi
4
Kai heka eburere bero esetere wesemy, kiaremyta ixyby atyhydỹỹnana ihoõkre, kia dori tarõte wawedena wana, ibinatyhy kawesemy tewinyte buherinaki.
5
Simeaõ kia Lev i seriòre roire; tebònareny-di aõbinabinamy rexierynanymyhỹre
6
Kia tii boho wana aratxiõkre tiu bededỹỹnana riwinyrenykreu, kia irybereny butuna-di arahỹỹnanyõkre, kia dori teburereny-di takyarareny-di hãbu mahãdureny rirubunyrenyre, kia alisimy aròti ritiòròrenyre.
7
Kia ibinare teburereny iyarareny, kia heka teburetyhyrenyre; kia ibinarenyre iyarareny, kia dori ibinatyhyre.-diarỹ ariwirareanykre Israel su ki,-diarỹ ariubỹtỹnykre iijoireny isỹreny ykyrenymy.
8
Juda, aseriòre boho umy rerinanyrenykre kia rexiyrawonyrenykre akoki. Kai bimybenykre aòludureny tòtikile.
9
Wakriòre Juda heka Leaõ riòre wesena rare, kia teery rirubunymyhỹreu; tii rexibedenymy rexilidimyhỹre, kia Leaõ riòre rere, hirari wesemy. Mobo tahe tamy rexiuarekre tamy rerikemy?
10
Juda rimykre Iòlò hojurehe, kia iriòreriòrereny ikiemy riwedunyrenykre. Kia hãwã hãwã mahãdureny aõnaõna adee idiwydenykre, kia iny mahãdureny aratyhmyrenykre.
11
Tii ritaare ajumento riòre bederade-ò, kia bederadewihikỹ rỹimyhỹreki. Tii atyy rihòmyhỹre mona besò-ò (vinho), ayhyitxena rihòmyhỹre mona besò-di (vinho) hãlubusò wesena-di.
12
Aruereny isòmy atxitenyteri mona besòmy (vinho) teõtenyteriki, kia ajureny iuramy atxitenyteri broreni huỹsymy teõtenyteriki.
13
Zebulom bero weijàtiki rasỹnykre, tai bero heòty-òròsòna ijõdikre. Ibede heka Sidõ-òhòkỹle remynykre.
14
Issacar heka jumento rurutere wesena rare, kia taitxyy tyreki roimyhỹre.
15
Kia robireu hãwãhãkỹ my awiremy kia awityhymy tai rexielehynykremy, tii rexibedenyre taitxyy tabrò-ò rilidikremy, kia aõmy rexiraõhyymy raaõmysỹdỹỹnyre wetxu wesemy.
16
Dã tasỹreny-òbitile riwedunyrenykre; kia iwitxira hãwã ludu weserenymykre Israel ki.
17
Dã, hemylala wesemykre ryweijàtiki, kia huumari wesemy ryki, kia awaru waubeki ruruakre, kia ixihewo-ò riatykre ityreki rỹdu.
18
Deuxu Tyhyhykỹ, araraokre biwahedỹỹnykremy!
19
Gade-òhòte tai rỹikre, kia wasidu mahãdu sõereny riherenykre, kia irahudita tii iheworenymy rakre.
20
Asser suu sõemy rỹsỹna-di rexijuakre, kia rỹsỹna riwahinykre, kia Iòlò-ò sohojile rawahikre.
21
Natali heka gazela wesena rare, kia tariòrereny ruxera ritxuamyhỹrenyre.
22
Jyje heka alòbròna wesena rare, kia beijarana bireki rỹimyhỹre; tii heka sõemy raratynymyhỹre, kia irurureny heto weijàtimy aòwònymyhỹrenyre.
23
Kia aòludu mahãdureny arahetenyrenyke teburereny-di, kia iheworenymy bekoabenykre awaxiahãtereny-di aryhyreny-di.
24
Kiareny awaxiahãtereny awityhymy relere, kia aaxiòreny rurureny-di ixiyrybule atxitenyte, budoeni-di aõmysỹdỹỹduni my, kia Israel manatere uramy.
25
Bu Deuxu arawiòhenanykre Jyje, ibutumy tanideheekỹmy adee riwahinykre tarybewihikỹ Tarybewihikỹ biu rarie ribi, bee rybewihikỹ su rawoki roimyhỹre, kia sõemy iròdu iròdu rybewiwihikỹ, kia sõemy iriòrereny,
26
alòbròna aõwi rybewihikỹ, kia noiròsò tule, kia hãwãlò ehetxina rybewihikỹ, aõnaõna wityhy Deuxu Tyhyhykỹ hãwãlò ludu. Kia ibutumy kaa rybewiwihikỹ rỹikre Jyje ratityremy, kia iòru tyremy kia iseriòre boho yky ribi ratare.
27
Benjami obràra debure wesena rare; kia rudi teery rirokre, kia txioromy tahe riwirareakre iuhe.
28
Ka boho heka 12 my iijoireny hãwã sõereny Israel ludu, kia heka ka rybe tybyreny rarybere tariòre boho-ò, kia tarybewiwihikỹ riwahinyreu; kia iny sohoji sohoji-ò riwahinyre tarybewihikỹ rityhynymy.