47
1
Taita Jyje rare rybewahidỹỹmy Iòlò-ò. Tii rarybere:—Waha kia waseriòre boho ròirenyreri Kanaã su ribi, kia ratxirenyreri Gosem bede ki tabudoenireny-di, tacabrareny-di, tabrorenireny-di, kia ibutumy taaõnaõnareny ijõdirenyre-di.
2
Irahudita ridyre iruyremy taseriòre, kia Iòlò-ò tureny rarybere.
3
IòIò rỹỹraxire: —Aõbo aaõmysỹdỹỹrenyre? Tii boho rirawyònyrenyre: —Inynyrỹ,-diarỹ boho budoeni umydỹỹdureny roire, kia wahãỹna mahãdureny rỹirenyre wesemy.
4
Ròirenyreri hãwãmy ka hãwãhãkỹ-ò, kiemy dori Kanaã su ki asi bederade ihoõre iròdu mahãdureny-ò, kia ramasa kuaki inihikỹryhyreri. Txioini aõkerỹbo, wadeereny biwahinyke Gosem bede-di arahãwanyrenykemy.
5
Iòlò rarybere Jyje-ò: —Ka tahe wiji kia buu, aseriòre boho ròirenyreri awana ratxirenykremy,
6
—Egito su ibrysirenymy roire. Biwahinyke tamyreny Gosem bede, kia heka hãwãhãkỹ ki awityhy rare, kia tai rasynymy roirekre. Kia araykyki ijõreny hãbu mahãdu yky ribi ibedeery ijõdikeki, bisỹnyke wedu wesemy kia wabroreni-di tarukikremy.
7
Irahudita Jyje ridyre Ijaò tyby, kia Iòlò dee tuu rarybere. Ijaò tarybewihikỹ riwahinyre Iòlò-ò,
8
kia ritỹỹraxinyre: —Tiwesebo awyra?
9
Ijaò rirayònyre: —Kia 130-wyramy rare, kia ikiemy rariamy watximyhỹre tiribi tiribile. Wabededỹỹnana heka aõtamaõkõ rariamy rahenyre. kia tiwese wyra wyramy isiratyhymy. Kia-diarỹ ywimy aratxikemy reaõhyyre, kia wahãỹna mahãdureny wesemy, isiramy roireniyhỹ kia iwesemy-diarỹ rarmyhỹ wesemv.
10
Ijaò tarybewihikỹ riwahinyre Iòlò-ò, kia rare.
11
Kia Jyje riwahinyre tyby dee, kia taseriòre boho dee suu awihikỹ Egito bede ki roimyhỹre, Ramanasses cidade hãwã bireki roimyhỹre, kia tuu Iòlò raryberemy. Kaa suu ihõrõrenymy relere, kia tii boho tai rasỹnymy roiremyhỹ.
12
Jyje riwahinymyhỹre rỹsỹna tyby dee, taseriòre boho dee, kia tyby sỹ mahãdureny-ò, kia rỹsỹnamy rekoamyhỹrenyre mynamynamy.
Jyje Egito Wedu Wesemy
13
Kia rỹsỹ ihoõre bede bede hãwã hãwãmy, kia ramasa ire reamyhỹre ixihetyretyrele. Egito ki, Kanaã ki, hãwãdu mahãdureny ideõdeõmy relerenyre ramasa tuu risỹnyrenyre.
14
Iny mahãdu rỹsỹna riõbranymyhỹrenyre, kia Jyje tahe ibutumy nieru ributunymy, kia Iòlò aõmysỹdỹỹna heto-ò riwymyhỹre.
15
Kia ibutumy rexihureu nieru Egito ribi, Kanaã ribi, kia egítos mahãdu roirenyre Jyje-ò rybemy. Tii boho raryberenyre: —Txioini aõkerỹbo, wadeereny rỹsỹna bidiwahinyke! Uritre rubu-ò wawahidỹỹrenyõmykre kia wamerureny rexihurenyra ki!
16
Jyje rirawyònyre: —Txibo kai boho ixyby anierureny ihõreriki, abrorenireny bididydenyke, kia-diarỹ aritròanykre rỹsỹna-di.
17
Kia egípcios mahãdu riwyrenyre Jyje-ò awaru, budoeni, cabras, broreni e jumentos, kia ritròanymy tii tamyreny rỹsỹna riwahinyre kia wyra wyramy.
18
Kia wyra rexihure, kia ijõ wyra bedeu ròirenyre Jyje-ò rybemy:
19
—Inynyrỹ, aõ alau wawòterenyõna inatyhymy, kia wamemreny rexihura, kia wairòdureny wiji ahõrõ rare. Aõ wakireny ixyby ihoõre adee ariwahinyrenykemy, aõhebo tahe waumyreny, kia wasureny. Uritre rubu-ò wawahidỹỹrenyõmykre. Biwaóbranybenyke, kia wasureny bitròanyke rỹsỹna-di. Kia Iòlò wetxu my aròirenyrekre, kia tii tahe wasureny-dinodumykre, Wadeereny rỹsỹna bidiwahinyke kia warumy aratxirenykremy, kia tule alòbrònaty bidiwahinyleke aròbròrenykremy, kia wesemy tahe suu bederahymy ròòseòtyhy.
20
Taita Jyje ibutumy Egito suu rõbranyre Iòlò-ò. Ibutumy egípcios mahãdu tasureny-di rohonyrenyre, kia heka ramasa inihikỹmy reare. Kawesemy tahe suu Iòlò my rỹire,
21
Jyje riwinyre egípcios mahãdu Iòlò wetxumy hãwãhãkỹ ibutumy.
22
Jyje riõbranyõre Deuxu rybe-di ijohodu mahãdureny su sohojile. Tii boho tasureny-di rohonyrenyõre, kiemy dori Iòlò tamyreny riwahinymy raremyhỹ-òbitimy rỹsỹna; kia wesemy tahe tii boho ijõdirenyre aõ rirỹsỹrenyke.
23
Taita Jyje rarybere taijoi mahãdureny-ò:—Ka tahe wiii kai boho kia asureny Iòlò hõrõ rare, kia heka-diarỹ tamy reõbranyre. Bimybenyke kaki alòbrònaty bijiumy bibrònybenykremy.
24
Kia bihebenykre iruyre hynamy Iòlò-ò biwahinybenykre; kia biuhebenykre ijõ inaubiòwa hyna bibrònybenykremy, kia birỹsỹbenykre my, kia riòre boho, kia iny mahãdu awanareny rirỹsỹmy rỹimyhỹrenyre boho wana.
25
Tii bohorirawyònyrenyre: —Wanarỹ kai tiwahedỹỹnytenyta wabededỹỹnanareny ribi, kia awimy wadeereny atxite. Kia Iòlò wetxu my aroirenyrekre.
26
Kawesemy tahe Jyje riwinyre *rybewahidỹỹna, kia wiji bede hãrele tuu roimyhỹre. Rybewahidỹỹna heka myre: Kia ibutumy Egito ki, iruyre hyna alòbrònaredena IòIò hõrõ my rỹirakre. Kia Deuxu rybe ijohodu mahãdu sureny sohojile Iòlò hõrõmy rỹirenyõkre.
Ijaò Ionamy Rexitòenyre
27
Israelitas mahãdu Egito ki rasỹnymy roirenyremyhỹ, Gosem bede ki, tai suu riõbranyrenyreki, kia sõemy rariòrenyrenyre.
28
Ijaò Egito ki bede riere 17 wyramy, kia rehemynyre 147 wyra bedeò.
29
Kia rurukremy rexieryreu, Ijaò rarybere tariòre Jyje-ò kia rarybere: —Txibo aõwaxina aõkerỹbo arexitòenyke, bidilidike ebò waniti rawo-ò, kiata marybekre kia biwatyhynymy kia-òbitimy wadee tuu arexitòenykre: uritre Egito ki watuudỹỹõmykre.
30
Kia-diarỹ arurukreu, warubu bitakre Egito ribi, kia biwatuunykre wahãỹnareny wabedeki, kia-diarỹ arexielehynykremy tii boho wana. Jyje rirawyònyre: —Diarỹ ariwinykre aõmybo kai texitòenyterimy.
31
—Inatyhymybo manarybe rarybere Ijaò. Jyje inatyhymy rarybere, kia Ijaò rexiwerynyre irahyna ki, kia Deuxu-ò rexitòenyre.