¹ Na Pol, na Yesu Kristo ra aposol, Tuwa Tutu aratamao nuka nuna gege ago yero, na gipenu na aposol nuna yewang, naneto yao naname Timoti to, ² nige Tuwa Tutu ra emo bauno Kolosi atu, Kristo tumodidi nasani mitowa, aeno imagi ewiya nenato. Tuwa Tutu mono nuna, nige eno didiye gaiti nai, moko ninage bisi bisi sero mitaise. ³ Be apakana nato isa sinasani, isa nanato aungna mokora, nato nige kotupu nasani, Tuwa Tutu eno dange sinonato, nu awiya Tuwa naname Yesu Kristo ra maung ara. ⁴ Nige Yesu Kristo tumodiro neya aungne, nupe nige Tuwa Tutu ra emo bauno gerao dubu nuna, awiya aratapu nasani neya, aungna bowi awiya mena bumi nato nigenato ara. ⁵ Aratamao awiya nige aungne mitiya aungna susuwa awiya, nige Tuwa Tutu unditi ra atu nona no nige eno korama kora yenu mitoiya, aeno nige gehera neya. Nona aungna bowi awiya nige, geme ra bowi ingwaing, ⁶ kasaye ninage hina yena, aungna atu nigiwa ara. Bowi ingwaing awiya, me iti nasani tangi zinono yao eungna atu babi niya ara. Ninage hina deka ayero kasa yena, nige gitau zayaore Tuwa Tutu ra hoamao aungna geme, awiya nigiro denewa ara. ⁷ Epapras awiya yao nanage, nupe nu awiya buro otao nanage, nupe nu awiya Kristo ra buro mani ingwaing nibaung zo ara, nu ami be nanage pungno bowi ingwaing ewiya nige gipena. ⁸ Dang Oweno zo nige eno hina aratamao nao awiya pugai, nige Tuwa Tutu ra emo bauno aratapu nasani neya, Epapras bowi awiya puro bungno nanato hina tiya. ⁹ Aratamao nao ninage aungna bowi nigiro, be aungne zayero, nato nige eno isa duwao aung, isa sao gege sinonato. Tuwa denao nuna aungna nigao aungne, kotumao ingwaing nuna aungne, Oweno nao ra zawagao ingwaing, awiya pugai ninage mokora bebumaise, nato nu atata nasani isa sinonato ara. ¹⁰ Nige nao ingwaing gabu ra atu ang naya, Tuwa nao ingwaing ninage aeno yawa yawa yaise nato Tuwa eno isa ayero sinonato ara. Nige buro ingwang waing naya, buro aungna me kasanai, nige Tuwa Tutu ra nigao moko ra bayaese, aeno nato Tuwa eno isa sinonato ara. ¹¹ Nato isa eyero sinonato ara, Tuwa Tutu ra putoung ingwaing nuna baina kama, ami nige eno putoung beraung giti pugai, nige putong aungna atu dopero tau yero mou mawe apakana awiya dipu nasani, dubo mono re mou mawe awiya besugao ra be diya mitari neya. ¹² Ayero yai nige yawa yawa re mama eno dange sari neya, nu ami nige soreungnu, nige heme tumodiyao emo bauno nuna waegao nuna aungna moko ra nowa, aungne dema tairo, nona ingwang waing korama kora niya awiya pari neya. Nato nige eno, isa ayero sinasani Tuwa atata nonato ara. ¹³ Name mume ra putoung ra hese mitauwa, nu name pungno, mani nuna arataungno baingtiti noiya, aungna waegao ra pugaina. ¹⁴ Tuwa Tutu ra mani ami, name meko ra atu zuma gaero pungno, pasena naname apakana nuwe gaina. ¹⁵ Tuwa Tutu awiya nu hungao name nu oko gosi nowa, arata mani awiya nu deka maung ine, arare nune maung ra beraung pungno kasa yena. Tuwa Tutu nona apakana yenu kasa yewa aungna gitau mani awiya nu ara. ¹⁶ Nu Tuwa Tutu aungne tairo nona apakana awiya yenu kasa yena, nona unditi mokora miteya aungne, tangi tame miteya aungne, nona name gosi nowa aungne, nona name oko gosi nowa apakana, arita nupe angelo dubu putoungre arita, oweno beraung giti putoungre arita, taung ra diya yazo ikapariya puro nowa aungne,nona apakana awiya nune yena. ¹⁷ Arare nona apakana awiya nuna gege ara. ¹⁸ Nu awiya dang garo ra ziyo ara, ani dang garo awiya taung nuna niya. Magayao ra atu iropuro seka yao aungna gitau mani awiya nu ara, arare nona apakana aungna gitauyao awiya, nu gege ara. ¹⁹ Tuwa Tutu ra nao zo mani aungna moko ra atu bebaise arataungna, arare, mani aungna moko awiya Tuwa Tutu zo teng yena, ²⁰ Tuwa Tutu mani nuna aungna hu ipasao ra hosina, ami name mono pungna. Name Tuwa Tutu ra iwo yero mitauwa awiya, mani nuna aungna magayao ami name aungne, nupe nona apakana tangi tame, arita unditi moko ra, awiya tainu dubo dekaka kasa yena. ²¹ Gitau, kotumao ninage awiya, Tuwa Tutu aungne iwo yero mitasani nige nao memeko daigairo nasani mitauwa. ²² Arata heme awiya, Yesu ra magayao taung piti ra ami yenu, nige Tuwa Tutu aungne dubo dekaka yewa ara. Nu ayero yai nige hisipatao ge aung, nige dang yero nuna beraung ra mitaese yena, ²³ arare nige tumodiyao ra dopero tau yepu, nete nona ena zo nige unumai, nige bowi ge mena nigiro tumodiro nowa awiya doro akepari yaneya. Na Pol, na bowi ge aungna sou mani yero, nage bowi ge awiya tangi eungna emo bauno apakana aeno sinasani nonage ara. ²⁴ Na heme nige sorepu nasani mou mawe tapu nena, aeno na yawa yawa nena, na Kristo ra dang garo soremari sero nena, dang garo awiya nuka nu Kristo ra taung ara. Yang yang Kristo zo dang garo nuna soremari sero taungna awiya oko besugao mitiya, arare taung nana aungna yang yang no tapu nena awiya, yang yang Kristo zo taungna aungna ambeyang tapu nena ²⁵ Na dang garo aungna sou mani ara, Tuwa Tutu denao nuna ago yero na eno buro ge awiya pugainu, na nige sorepu nasani, Tuwa Tutu ra bowi ge awiya sinona ara. ²⁶ Gitau gatau otu, geme ewiya hungao mitaungnu owa ewowo naname ge ewiya oko nigiro zawa gaiti nauwa. Arata heme ge hungao awiya kasaye daung gai, Tuwa ra tumodiyao emo bauno giro, nigiro zawa geya ara. ²⁷ Tuwa Tutu denao nuna gege ago nasani, name dubu nuna eno, ge hungao awiya besero pu kakame gaiya era, nu ayero yai name diga moko ra atu, ge hungao eungna zamena simena awiya ganame kasa yaise yena. Ge hungao awiya era, Kristo awiya ninage moko ra atu mitiya, nu awiya unditi ra zamena simena apakana aungna iti, arare nige nu diya mitaya nu bungno nige puro bamai nige nu aungne dema unditi ra simao awiya pari neya. ²⁸ Nage Kristo ra bowi awiya emo bauno eno tugata nasani, nage kotumao ingwaing re ago gipiti nonage, anasani, nage gazao ge tau yetuga ago eno sinonage, ago suwao gabu ra dopero tauyaya, nage ago puro bung Kristo ra hina yari nenage. ²⁹ Arare Kristo nuka nune na eno putoung pugaiti noi, na buro baina nibaung nona.