¹ Ge ewiya ge megege ara: Mani zo nu Tuwa ra buro mani yari yero giro, nu buro ingwang waing gege aratapu naise. ² Mani awiya nu nao ingwaing gege naise, nu nao meko zo oko yai emo bauno gaese, nu awiya bauno dekaka ra iu gege yero mitaise, nu kotumao ingwaing re mitasani,nao ingwaing ago nasani mitao nuna ingwaing mitasani, nu gigi esewa kora yero diya nasani, nu Tuwa ra nao ingwang waing awiya emo bauno eno gipinaise. ³ Nu ou miniro dau oko yaise, nu hinade oko yaise, nu zoma, ago eno eyare ge sinasani ago mono pupu naise. ⁴ Emo awiya nu garo moko nuna aungne, aro mani awisore nu kora yero diyanao emo yaise, mani awiso nuna ge nuna dipu nasani, nuna hese mitaese. ⁵ Ora emo awiya garo moko nuna ta aro awiso nuna oko kora yero diya nari niya, nu emo ayao, ami nono yero Tuwa ra emo bauno dubu baina ewiya kora yero diya yari niye? ⁶ Emo awiya nu suwao seka ta nupe ge nigao seka oko yaise, nu awiya mena Tuwa ra ge ra noiya , nu mani ami buro apaise, ayari niya amizo , nu sanda zo taung po hitari nete zuwero gerayao taungna aoko yari niya. ⁷ Emo bauno bautara miteya aungna beraung ra, nu awiya yazo ingwaing re gege mitaise, ayari niya ami zo, nu mega maga aung, nu sanda ra etegao daigari niya. ⁸ Deka ayero, simai dubu ago oko ewawa torato yaese. Ago oko ou haena mini nasani, nupe ago depo oko yaese. ⁹ Ago kotumao ingwaing re, geme tumodiyao ra nao awiya hingiro tauyaese. ¹⁰ Nige bere buro agera humo yero giro baingtiro, oungne sepu ago Tuwa ra buro yae, ayari neya amizo ago hisipatao ge oko pari neya. ¹¹ Asi agera deka kotumao ingwaing re mitaese, ago bauta ge oko saese, ago adungno baingtiro buro no agera tame mitiya awiya kora yero nasani mitaese. ¹² Simai nu awiya bauno dekaka ra iu gege yero mitaise, nu aro awiso nuna kora yero diya naise. ¹³ Emo nami Tuwa ra buro pungno, buro awiya kora yero samo dedu nowa, ago awiya yazo ingwaing re mitowa, anasani ago tumodiyao agera Yesu Kristo ra hina mitoiya awiya gere gari nete ago angwang oko yari neya. ¹⁴ Na imagi eungna mokora ni eno ge ena sero gainena, anasani na hemenaka bo nina hina yari nena. ¹⁵ Arata na oko mena bana yana giro, imagi ni eno gaetena awiya zaza gairo, name Tuwa Tutu ra dubu nao ingwang waing no yanemese sena awiya gi, name Tuwa Tutu ra dubu awiya, name dang garo nuna mitao gege mitoiya awiya name ara, dang garo ami ziwong tauya ine yero geme diungno mitoiya. ¹⁶ Tuwa Tutu ra nao ingwaing ra geme kere daung gaina awiya nona baina nibaung ara, mani zozo nona awiya bewa yao teng oko: "Nu tangi taung pungno kasa yenu, Tuwa ra Oweno zo nao nuna apakana ingwaing gege ayero gipe daung gainu, angelo dubu apakana ami diti teng yero gigiwa, tangi emo bowi nuna awiya pungno soma apakana aungna atu tugata yewa, Tangi emo bauno apakana nu tumodiwa, Tuwa Tutu nu pungno hiti unditi ra yenu, yazo bowi re pungna.