¹ Na nige za yero buro eyero yaese aratapu nena, nige isa buro yepu, otao mani eno isa sinasani, nupe emo bauno apakana aeno isa sero Tuwa Tutu eno dange sepu, ² nige tangi eungna emo tuwa apakana aeno isa sinasani, nupe taung ra diya dubu, yazo ikapariya puro name diya nowa, aeno isa dema sepu, ayero narineya amizo, name Tuwa Tutu ra nao inwaing aungna moko ra atu mono re eyare gere mitari nename. ³ Tuwa ra beraung ra Isa eyao amizo ingwaing nibaung ara, Tuwa isa eyao aratapu noiya. ⁴ Tuwa ra aratamao nibaung awiya, emo bauno apakana dubo dadawa yero, bo nuna hina yero geme ra susuwa gaya zawa gaise aratapu noiya. ⁵ Tuwa Tutu nu dekaka, nupe ai mani deka dekaka gege, Tuwa Tutu mitoi tangi emo mitowa aungna mokora awiya emo dekaka gege zo ai mani yero mitoiya, emo awiya Yesu Kristo ara. Nu ami Tuwa Tutu aungne tangi emo bauno aungne awiya taiti noiya. ⁶ Tuwa Tutu mena giginu mitaungna, be aungna atu Yesu Kristo name apakana aeno taung nuna bayao yero, Tuwa Tutu ra aratamao kere daung gaina. ⁷ Susuwa aeno, Tuwa na taungnu na aposol nuna yero bowi nuna tugata nasani nona. Na geme sinena, na oko gehiwi nena. Na awiya emo diga dubu ra gipao maung, nane ago gipana, geme ra susuwa gaya zawagai ago Yesu Kristo tumodiyaese, aeno na tangna. ⁸ Arare emo soma sero miteya, awiya apakana dubo meko doro, ge matu doro, nago po hitiro Tuwa eno isa saese. ⁹ Deka ayero, mani bauno ago taung simao wosewa giro hosogairo, aka ago nata diyayao ra kotumao re naese. Ago oko ziyo ai agera nona beraung giti zo siungno, taung ra simao ena goli zo yao ami taung siungno, nupe wau ena zuma babuze ra awiya duwero, taung simao ena zuma babuze ra awiya hosogairo, taung po hitao re oko naese. Ago Tuwa ra ge ago yari yero giro, nao ingwang waing kaka waing, apakana awiya paya taung simao me agera yai, hosogairo naese. ¹¹ Bauno, nikani po hosiro, eyare mitasani Tuwa ra ge nigi. ¹² Na bauno zo, emo ra gitauyao nasani emo eno Tuwa ra bowi gipao awiya gazi nena, bauno ni be tapu dero saing yero, gege nigiti neung. ¹³ Tuwa Tutu Ada gitau yero, oungne Ewa ame yena ara. ¹⁴ Ada zo gitau sanda ra etegao ge oko nigina, aung ara, bauno zo gitau nigiro, nune pasena yena. ¹⁵ Bauno buro agera awiya, ago mani awiso pupu nasani, nupe ago be apakana Kristo tumdidi nasani, otao mani aratapu nasani, nao ingwaing ago naya giro, Tuwa ago meko ra atu pai kapete gairo bung ingwaing ra yari neya.