¹ Boroko, nanonamenji, nakare embo pari tewo, awo Mamo da Main da ge awa tumaina, edo duroka aina, da imonde isira angode. ² Pari tewo nakare, wasae edo beowo embo da yai awa udegare, ko berari awa tumonda aride ae. ³ Ata Mamo da Main awa tumondari be, ami piana edo dedegaina, embo binei de itera ainda. ⁴ Nakare do okain Mamo da Main da yai burera imomane awatedo, atako imete tote mi, awa edo ge ro tenakare awa matawa be eta. ⁵ Awatedo Mamo da Main mi, do itete awa piare. Mamo Siroro arida dubobari, edo kaingari Mamo da Main da ainde awa. ⁶ Boroko imonde tenakare, nanonamenji, Mamo Siroro arida Main da daoda, nanonamenji beowo wasirida itera, edo natokare piari gambari be ainde itae awa tengawate. ⁷ Ko imo akuta deve edo gido nakare amboambo ata. Nakare imondemane itenakare awa embo neta ari itae ango ae. ⁸ Nakare embo da indari orae tepo indae edenakare. Atako nakare muinya edo iji buro bajina be edenakare, okain edo inono be, ango enakare ami imondemane bouga piain yae. ⁹ Ango etenakare, awa nakare goroba itae ae. Ango etenakare awa nakare ito mane kariwa, awatedo imo nakare ambo ambo ata. ¹⁰ Ko nakare imondemane isite, ge tenakare. "Ainmi buro ari jipapa ae eira awa indari inai yae." ¹¹ Nakare gotera embo nenei buro ari tao ae, awa imondemane into era. Awamane awa burobe ae, ata tepo doda doda edera. ¹² Boroko embomai awa Mamo Siroro arida Main da dao da tenakare, damo damo be ara edo indari awamane topo be awa indara. ¹³ Ata nanonamenji, buro dave arida do dowawo woteure. ¹⁴ Edo embo awe ge oveda awa kera ae evira, awa giwogido ainde tatari awa dowawe, awo imo megare. ¹⁵ Ata gaegae edo gitopo eote, ata nanonamenji ango teio gore. ¹⁶ Boroko ango, Siroro arida Main, begada tutu ami, bega mi berari edo begata berari da piaina. ¹⁷ Eiwa nato ategari, Pol ipanato mi awa ove einda dono pitena. Ove awa engo gaguritena. ¹⁸ Mamo Siroro arida Main da tonembari berari de itare. Awara.