¹ Bena hebou taudia iboudiai e tore isi bena Pilato dekena e hakaua lao. ² Idia ese e hebadelaia, "Ai ese ina tau a davaria, emai bese lalodia e animu, bona Kaisara ena tax monina ihenina na e gwaua taomu, bona sibona danu e gwaumu ia na Keriso, pavapava ta." ³ Bena Pilato ese e nanadaia, eto, "Oi Iudea taudia edia pavapava a?" A Iesu ese e haere henia bena eto, "O ena vada o gwaumu." ⁴ Bena Pilato ese hahelaga taudia bona aru taudia, "e hamaorodia eto, "Kerere ta asiname davaria ina tau enai." ⁵ To idia na e hereva goadagoada, eto, "ia na ena hahediba herevadia ai Iudea idoinai vada e hahelogo-helogoa bona Galileia amo e hamatama, ema bona ina hanua." ⁶ Pilato ese una hereva e kamonai, ia ese e nanadaia eto, ina Galileia tauna a? ⁷ Bena ia e diba ia na Heroda ena siahu henunai, oi ese o siaia Heroda dekena bae hakaua lao, daika be una negana ai Ierusalema ai. ⁸ Bena Heroda ese Iesu e itaia, ia na e moale e urava bema itaia badina nega daudau Iesu harina e kamonaiva, bona e urava toa haida ia ese bema kara bena bema ita, ⁹ bona hereva diagau e nanadailaia, to Iesu na se haere. ¹⁰ Hahelaga taudia bona itorena taudia unuseni ai e gini, ia e habadelaia goadagoada. ¹¹ Bena Heroda bona ena tuari taudia ese e kirikirilaia bona e gonagonalaia. Dabua namohereana ta e hadokilaia, Pilato dekena ma e siaia lou lao. ¹² Una dina ai Pilato bona Heroda vada e herohemaino heheni, badina gunaguna idia raruosi e heinai heheniva. ¹³ Bena Pilato ese hahelaga taudia bona hanua lohiadia bona hanua taudia, e boiridia hegogo. ¹⁴ Bona e hamaorodia, eto, "Ina tau dekegu o mailai o tomamu taunimanima lalodia e animu, bona aitaia vairamui ai name nanadaia momo, O hahebadelaia herevadia vada name tahu, to enai kerere ta asiname davaria. ¹⁵ Heroda danu unu heto, una dainai ia ese ma e siaia lou ita dekedai, bona ba itaia, ia ese mase karana ta se karaia. ¹⁶ Una dainai lau ese ia, baina dadabaia bena baina ruhaia nege, ¹⁷ Badina be vaia ena kara una aria negana ai dibura rumana ai e noho tauna ta baine ruhaia nege. ¹⁸ A iboudiai e lolo bou, eto, "Ina tau na herevana, to Baraba hari ba henimai!" ¹⁹ (Ia na dibura rumana ai e koua badina heatu bona ala-ala hanua lalonai e havara dainai.) ²⁰ Bena Pilato ese ma e hereva henidia lou, Iesu baine ruhaia nege eto, ²¹ to idia ma e lolo, eto, "Ba hasatauroa, ba hasatauroa." ²² Bena nega ihatoina ma e hereva henidia, "eto, Ina tau enai dika be dahaka? Lau na mase badina ta ienai asina davaria. Una dainai baina dadabaia murinai lau ese baina ruhaia nege." ²³ To idia na e lolo lalo dika, eto, Ba hasatauroa bena idia eredia vada e kwalimu, ²⁴ Bena Pilato ese edia ura hegeregerena, e karaia. ²⁵ Hari heatu bona ala-ala dainai dibura ruma ai e nohova tauna e ruhaia nege, edia noinoi hegeregerena. A Iesu na e henidia edia ura bae karaia. ²⁶ Idia ese Iesu e hakaua lasi, bena Simona Kurene tauna ta gunika amo lasina ai e dabaia tao, satauro na ia pagana ai e atoa kau, baine huaia. ²⁷ Taunimanima hutuma, ia murinai e raka, bona hahine e hebogahisi bona e tai. ²⁸ Bena Iesu e gini kerehai, e hereva henidia eto, "Ierusalema hahinemui e, lau taigu asio tai, a sibomui hari ba hetai heheni bona natumui taidia hari ba tai. ²⁹ Badina ba itaia, negana be maimu baeto, "Gabani hahinedia bona ratadia asie topo hahinedia hari nanamo." ³⁰ Una negana ai ororo badadia bae hereva henidia, baeto "A kuremai tao," bona ororo maragidia, bae hamaorodia, baeto a gorumai tao. ³¹ Badina be au maurina, ini e karaia tomamu, o kakorona na ede bae tomaia?" ³² Kara dika taudia rarua, danu ia ida e hakaudia lasi, bae hasataurodia hebou. ³³ idia na gabu ta ia e kau, ladana na "Kwara koukouna," unuseni ai e hasatauroa, bona dika taudia danu - ta idibana ai, ta laurina kahana ai, e hasataurodia. ³⁴ Bena Iesu e guriguri eto, tamagu e, ina e karaiamu karana na asi dibadia, davadia na basio henidia, bena dabua e hari ta ta ahudia e abi. ³⁵ Hanua taudia na e gini, e herarai. Bona hanua lohiadia ese e kirikirlaia, eto, ia na idau taudia e hamauridiava, bema ia na Keriso, Dirava ena abihidi tauna, ia na sibona bema hahemauri." ³⁶ Tuari taudia ese e gonagonalaia, e raka kahira, vine ranuna iditana e duduia dae. ³⁷ Bena eto, "bema oi na Iudea taudia edia Pavapava, sibomu ba hahemauri." ³⁸ Revareva ta danu e torea, ia daenai e kapaia, eto, Iudea taudia edia Pavapava." ³⁹ Bena ia ida e hasataurodia hebou taudia ta ese e gonagonalaia, eto, "Oi na dia Keriso a? Sibomu a hahemauri, bona ai danu ba hamaurimai." ⁴⁰ A bamona ese e gwau henia, eto, "Oi Dirava garina so garimu a? Oi danu bo masemu, ia hegeregerena. ⁴¹ bona ina na maoro, badina ita raruosi baita mase eda kara dika davana. A ina tau na asi ena kerere." ⁴² Bena ia eto, "Iesu e, emu basileia bavabia negana ai, ba lalogu." ⁴³ Iesu ese e haere henia eto, "Na hamaoromu momokanimu, hari dina ai ita raruosi paradaiso ai baita vareai." ⁴⁴ Una na dina tubua, bena unu amo ela dina gelona una tano idoinai vada e dibura. ⁴⁵ Dina e dibura bona dubu helaga seseahuna na boagaragina amo e hedare parara. ⁴⁶ Bena Iesu e tai lolo, eto, Tamagu e, laumagu na oi imamu ai na atoamu." unu e gwau toma, bena vada e mase. ⁴⁷ Hari tuari biaguna ese una kara e itaia, bena ia ese Dirava e imodaia, eto, momokani ina tau na kara maoromaoro tauna." ⁴⁸ Herarai taudia hutuma, ese una e vara gaudia e ita, bena kemedia e pata, e lou. ⁴⁹ A ia bamona, bona Galileia amo e gavaia hahinedia na dauhai ginidia ai e herarai. ⁵⁰ A kaunsolo tauna ta ladana Iosepa, tau namona bona kara maoromaoro tauna, e nohova. ⁵¹ (Ia na kaunsolo edia henega ai bona edia kara ai na seura) ia na Iudea hanuana ta, ladana Arimatea, tauna, bona ia danu Dirava ena basileia e nariava. ⁵² Ia na Pilato dekena ela Iesu tauanina e noia. ⁵³ Bena e abia dobi, dabua aukana ai e kumia, bona nadi hagana ai e geia kohuana lalonai e atoa. Una kohuana matamatana, lalonai tau ta do asie guria. ⁵⁴ Una dina na e hegaegae, bona dina helagana vada e matama. ⁵⁵ Bena Galileia amo e gavaia hahinedia na idia muridia amo ela, bona kohua e itaia, bena tauanina unuseni ai e guria danu e itaia. ⁵⁶ Bena e lou lao, muramura mai bonadia bona dahudahu murammuradia e abi hegaegae. A Dina Helaga ai e lagani, taravatu dainai.