¹ Hari Iesu na e roha-isi taga taudia e itadia edia harihari gaudia e udadiava moni mauana lalonai. ² Bena e roha-lao ogogami vabu hahinena ta e itaia moni pene rua e udadiho moni mauanai. ³ Bena e hereva eto, "Momokani, lau ese umui na hamaoromuimu ina vabu ese eme udaia monina na idia iboudiai edia eme uda gaudia e hereadiamu. ⁴ badina be edia taga amo harihari gaudia sisidia eme ato. A ina hahine na ena ogogami amo, ia baine maurilaia monina iboudiai eme ato. ⁵ Hari haida na dubu hairai nadidiai eha heraia bona mai herahia gaudia ida e herevalaidiava lalonai ia eto, ⁶ "Ini o itamu gaudia, dinadia na e maimu nadi ta na nadi ta latanai, na se makohi nadina latanai basine mia. ⁷ Bena idia ese e nanadaia eto, "Hahediba tauna e, ina be edena nega ai baine vara bona toana be dahaka ini gau do bae vara, a? ⁸ Bena ia eto, "Nahuamui ba toho ta ese basie koimui. Badina be hutuma na do baema lau ladagu ai be herevamu, "Lau na ia" bona "Nega vada eme kahira-kahira. Idia muridiai na basio raka. ⁹ Tuari bona dagedage herevadia ba kamonai negadiai basio gari, badina ini gau na do bavara guna, a ina na dia nega tamona dokona." ¹⁰ Bona ia ese e hamaorodia "Tanobada ta na toreamu tanobada ta ida bae inai heheni bona basileia ta na basileia ta ida bae inai heheni. ¹¹ Tano marere badadia bona doe bona daihanai goreredia na bavara gabu ta ta lalodiai. Hahegari karadia bona guba amo toa badadia be varamu. ¹² A ini gau iboudiai do asie vara lalonai umui na do be dabaimui-taomu be dagedage henimuimu, bena be henimui hanaimu synagogue bona dibura ruma, be laohaimuimu hanua pavapavadia bona lohia taudia vairadia badina be lau ladagu dainai. ¹³ Ina na gau ta e henimuimu iha-momokani laimui ai baela. ¹⁴ Una dainai, lalomui na ha hadai, ilao-ahumui herevadia basie ha-hegaegaelai guna, ¹⁵ badina be lau ese hereva daladia bona aonega baina henimui bona inaimui na ilao-ahumui bona igwautubumui na basie kara. ¹⁶ A umui danu do taomui ba tore tamamui, sinamui ese, bona tadimui ese, bona varavaramui ese, bona bamomui ese bona idia ese do bae hamasemui. ¹⁷ Taunimanima ese do bae inai henimui, badina lau ladagu dainai. ¹⁸ Oi kwaramu huina ta basine boio. ¹⁹ Emui haheauka dainai laumamui na bae mauri. ²⁰ Ierusalema ba itaia tuari taudia ese e ginia-hegege neganai bona badiba ia igigi-rohorohona na ema kahikahi. ²¹ Bena Iudea ai e nohomu taudia na bae heau boio ororo baela bona bogaragidiai e nohomu taudia na do bae rakatanidia bona hanua ai asie nohomu taudia na basie vareai. ²² Badina be ina na kara davadia ihaloudia negana, e tore gaudia iha gugurudia. ²³ A unu dinadiai rogorogo hahine bona mararoto hahinedia madi ihabaimui! Badina be dika badaherea ina tano ai bona badu garagara taunimanima latadiai. ²⁴ Idia na dare matanai bae hamorudia, bona haida be bae guidia hanua idau-idau bae laohaidia bona Ierusalema na Idau bese taudia ese bae moia-tao ela bona Idau bese taudia edia nega baine guguru. ²⁵ Toa haida do ba vara dina, hua bona hisiu ai, bona tanobada besedia iboudiai bae kudou hetaha bona bae gari dikadika davara hurehure edia kiriri regediai. ²⁶ Taunimanima na gari ese be haketodiamu, bona tanobadai be varamu gaudia ese, badina be guba siahudia na be heude-heudemu. ²⁷ Bena idia ese Taunimanima Natuna na do bae itaia e maimu ori latanai mai siahu-badana bona hairai badana ida. ²⁸ A ini gau e hekara matamamu neganai, ba gini tore bona vairamu bavabia-isi badina be iruhamui-nege tauna na e mai kahikahimu. ²⁹ Bena ia ese sivarai hegeregerena ta e hamaorodia "Fig (Suke) auna bona au iboudiai aitadia. ³⁰ Tuhutuhudia e varamu negadiai, sibomu ese oi itaiamu lahara negana vada eme kahikahi. ³¹ Unu hetomana danu, umui ese ini gau o itadiamu e varamu neganai, umui na o dibamu Dirava ena basileia na eme kahikahi. ³² Momokani, na hamaoromuimu, inauru na basine ore, ela bona ini gau iboudiai na ba vara. ³³ Guba bona tanobada na bae ore, a lau egu hereva na basine ore. ³⁴ A sibomui ba henahua-toho, bona kudoumui na basie metau, inuinu gaudia, bona kekero daidiai, bona emu noho ai lalomui eha-metauamu lalo hekwarahidia daidiai, bona una dina na asi vanahana emu ai baine kahira. ³⁵ Idoa na heto do baine kau ina tanobada ai e nohomu taudia iboudiai latadiai. ³⁶ A ba gima bona nega iboudiai ba guriguri bena unu amo ba goada una dika amo ba roho mauri bona Taunimanima Natuna vairanai ba gini. ³⁷ Bena unu dinadiai ia na dubu helaga lalonai eha-hedibava, bona hanuaboi ai ia na e laova ororo ta ladana Olive ai e nohova. ³⁸ Ina hari ia na taunimanima iboudiai ese emai heniamu daba kahadia ai dubu helaga lalonai ena hereva ikamonaidia.