¹ Dina ta ai ia na dubu helaga lalonai e hahedibava sivarai namo e harorolaiava, bena hahelaga taudia bona itorena taudia bona tau-badadia ia dekena ela. ² E hereva henia, eto, "Mani a hamaoromai edena siahu ai ini gau o karamu? Eiava daika ese ina siahu e henimu." ³ Bena ia ese haere henidia, eto, Lau danu mani umui henanadai, ta aina nanadailaimui, bena ba hamaorogu. ⁴ Ioane ena bapatiso: be guba amo eiava taunimanima edia amo? ⁵ Bena sibodia e hereva heheni eto, "Bema ita baitato, 'guba amo, 'Dahaka dainai so hamomokaniamu?' ⁶ A baitato "taunimanima edia amo? taunimanima iboudia ai ese nadi amo be hododamu, badina be idia na etomu Ioane na peroveta tauna. ⁷ Una dainai idia ese e haere henia eto, ai na asi dibamai ia be ede amo. ⁸ Bena Iesu eto, "O lau danu dahaka siahu ai ini gau na karalaimu na basina hamaorolaimuimu." ⁹ Bena ia ese palabore ai e hereva henidia matama, "A tau ta ese vine imeana e hadoa, bena imea ireguna taudia eha-badinalaidia, bena hanua ta ela nega daudau e noho. ¹⁰ Huahua negana ai (horana) hesiai tauna ta e siaia lao imea ireguna taudia dekedia, vine anidia baine abi, to imea ireguna taudia ese e dadabaia, bona e siai oho ima-kavakavana ida. ¹¹ Bena hesiai tauna ta ma e siaia, to idia ese e dadabaia, e hahemaraia, ma ima kavakavana e haloua. ¹² Ihatoina danu e siaia, to ia danu ma e haberoa bena murimuri ai e tahoa lasi. ¹³ Bena imea biaguna eto, Lau be ede baina kara toma?Lau natugu egu lalokau, hari baina siaia. Reana baitaia bae matauraia. ¹⁴ To imea ireguna taudia ese e itaia, sibodia e hereva heheni eto, Dihina binai. Ai ta alaia mase, bena imea na baita abia ita eda. ¹⁵ Bena e tahoa lasi imea lalona amo bona e alaia mase. Imea biaguna be ede baine kara toma idia edia ai? ¹⁶ "Ia na bainema bena imea ireguna taudia baina aladia, Vine imeana haida baine henidia." A idia na e kamonai, bena eto, "Lasi dia unu heto." ¹⁷ A ZIesu ese e raraidia, bena eto, Buka ai torea herevana anina be dahaka? Ruma ikarana taudia ese e dadaraia nadina na daiguni nadina ai vada ela? ¹⁸ Una nadi latanai baine moru tauna na baine makohi rohoroho. A una nadi ese baine kurea tao tauna na baina hapataia." ¹⁹ Itorena taudia bona hahelaga taudia ese idabai-taona e ura una horana ai, badina idia dibadia una sivarai hegeregerena matana be idia ediai. ²⁰ Bena e itaia tao, dibaka taudia e siaidia kara maoro-maoro taudia na heheto, bae nanadaidia ena hereva amo bae idoaia bena gavana imanai bona siahuna ai bae henia eto. ²¹ Idia ese e nanadaia eto, Hahediba taumu e, ai dibamai emu hereva bona emu hahediba na mamaoro-mamaoro bona taunimanima oromadia so lalomu, a Dirava ena dala o hahedibalaia goevagoevamu. ²² Ina be maoro ai ese Kaisara ena tax baia heni, eiava lasi? ²³ A Iesu na edia koikoi dibana, bena e haere eto, ²⁴ Siliva monina ta ba haheitalaigu. Ina be daika laulauna bona ladana? Idia eto, Kaisara. ²⁵ Bena ia eto, Una dainai Kaisara ena, Kaisara ba henia, Dirava ena, Dirava ba henia. ²⁶ Bena aru taudia vairadia ai ena hereva amo e idoaia, ena haere e hoalaia, asi edia hereva ta. ²⁷ Bena Sadukea taudia haida ia dekena ela: una orea e tomava mase na basie tore isi lou, bena e nanadaia eto, ²⁸ Hahediba Taumu e, Mose ese emai taravatu e henimai eto, "Tau ta baine mase bona vabuna baine noho asi natuna, vabu na ihana ese baine adavaia natuna baine havara mase tauna ena, ²⁹ Unuhetomana tadikaka hahitu e nohova, bena tauguna ese hahine ta e adavaia, vada e mase, asi natuna. ³⁰ bona iharuana, ³¹ bona ihatoina ese adavaia; ela bona hahituosi ese vada eabia iboudia ai asi natudia, bena e mase. ³² Gabe amo hahine danu vada e mase. ³³ Toreisi lou negana ai una, na daika adavana? Badina be hahituosi ese e adavaia." ³⁴ Iesu e haere eto, ina nega (uru) taudia ese hahine eabimu bona e headavamu. ³⁵ A do baema taudia na kara maoromaoro ai mase amo bae toreisi lou, na bae headava eiava basie headava; ³⁶ bona basie mase lou, idia na aneru ida bae hegeregere; bona Dirava natuna ai baela, badina be idia na toreisi lou taudia. ³⁷ A mase amo e toreisi lou, Mose ese uda ai e haheitalaidia, ia ese Lohiabada vada e gwauraia Aberahamo ena Dirava, bona Isa'ako ena Dirava, bona Iakobo ena Dirava. ³⁸ Harihari ia na dia mase Diravana, to mauri taudia edia, badina be taunimanima iboudia ai na ia dainai e maurimu. ³⁹ Itorena taudia e haere, eto, "Hahediba taumu e, hereva maorona bena." ⁴⁰ Bena unu amo gauta asie henanadaialaia lou. ⁴¹ Bena Iesu ese e nanadaia eto, "Edeheto idia na e tomamu Keriso na Davida natuna? ⁴² Badina Davida na sibona Salamo lalonai eto, Lohiabada egu Lohia e hamaoroa eto, 'Idibagu kahana ai ba helai, ⁴³ ela bona inaimu iboudiai na oi aemu ihadaidia gaudia ai baina halaodia.' ⁴⁴ Davida una daina Keriso 'e gwauraia Lohiabada,' O ede heto ia na ia (Dirava) natuna?" ⁴⁵ Hari (Bena) taunimanima iboudia ai na e kamonaiva, ia ese ena hahediba e hamaorodia eto, ⁴⁶ "Itorena taudia nahuadia ba toho, idia na e uramu dabua latadia bae rio, bae raka loa, bona e uramu hahenamo hereadaedia bae henidia hoihoi gabudiai, dubu ai bona anibou ai gabu hereadia ai bae helai. ⁴⁷ Idia ese vabu edia ruma eha-ogogamidiamu, bona edia guriguri eha-daudaumu. Idia na dava metauna do bae abia.