¹ Harihari ini gau muridiai, Lohiabada ese danu tatau hituahui-rua vada eabidia-hidi, bona rarua-rarua amo e siaidia lasi guna baela ia sibona do bainela hanuadia bona gabudia iboudiai. ² Ia ese e hamaorodia, eto, "uma geigeina (harvest) na momo herea, a gaukara taudia na dia momo. Una dainai uma (Lohiana/Biaguna) ba noia ia ese gaukara taudia baine siaidia lasi ena geigei lalonai. ³ Vada aola. Aitaia, lau ese na siaimui lasimu mamoe natuna na heheto uda sisiadia bogaragidiai. ⁴ Moni vainana ta, e laolao tauna ena kohu uda baegena ta, tamaka danu ta basio abidia-kau bona dala ai ta basio hedavari henia. ⁵ Edena ruma lalonai o vareaimu, guna baoto, 'Maino na ina rumai baine mia.' ⁶ Bema maino natuna na unuseni, emui maino na ia latanai baine mia; a bema lasi neganai, ia na baine lou emui ai. ⁷ Una ruma tamona ai ba noho, idia ese ba henimui gaudia na bavanidia bona ba inudia, badina gaukara tauna na ena gaukara davana do baine abia. Dia ruma ta amo ruma a baola. ⁸ Edena hanua lalona ai o vareaimu, bona idia ese eabimui daemu, dahaka vairamui ai e dabaramu na bavani, ⁹ bona ruma lalonai gorere taudia ba hanamodia, bona ba hamaorodia, 'Dirava ena basileia na emu ai vada eme kahirakahira. ¹⁰ Edena hanua lalonai ba vareai, bona idia ese basie abimui dae, baola hanua daladia ai bona baoto, ¹¹ 'dounu emui hanua kahudia aemu ai e kamokau gaudia na ba dahudia ohomu umui ihabadelaimui! A ina na badiba, Dirava ena basileia na vada eme kahirakahira. ¹² Na hamaoromuimu una dina ai una hanua ese Sodoma ena dika na be hereaiamu. ¹³ Madi ihabaimui, Korasina! madi ihabaimu, Betesaida! Badina bema siahu karadia hereadia emu ai vada e vara na Tyre bona Sidono ediai bema vara neganai, idia na idau negai vada bema helalo kerehai, boroma kopidia bona kahu ai helaidiai. ¹⁴ A Tyre bona Sidono edia dika hahemaorona na umui ese bo hereaiamu. ¹⁵ Bona umui, Kaperanauma, oi na basie abimu-isi gubai, a? Oi na bae diholaimu tanobada henunai. ¹⁶ E kamonai henimuimu tauna ese lau e kamonai henigumu, bona e daradaraimuimu tauna ese lau e dadaraigumu, bona lau e dadaraigumu tauna ese e siaigu tauna e dadaraiamu. ¹⁷ Bena hitahui-rua osi e lou mai moaledia ida, etomava, "Lohiabada e, lauma dikadia ese eremai e kamonai oi ladamu dainai." ¹⁸ Unu amo ia ese e hamaorodia, eto, "Lau ese Satani guba amo e moru vada na itaia, kevaru na heto. ¹⁹ Aitaia, lau ese siahu vada na henimui gaigai bona doadoa ba moidia tao, bona inai tauna ena siahu idoinai danu, bona ma gau ta ese dala ta ai basine hahisihisimu diba. ²⁰ Vadaeni dia lauma dikadia ese e kamonai henimuimu mo daidiai ba moale, a ba moale danu ladamui gubai vada e toredia dainai. ²¹ Una nega tamonai, ia na Lauma Helaga lalonai e moale bada herea, bona eto, "Na hamaoromumu, Tamagu, guba bona tanobada Lohiana, badina be oi ese ini gau vada o hunidia aonega bona laloparara taudia edia amo, bona maragidia ediai vada o hahedinaraidia. Oibe, Tamagu badina ini na nanamo heherea oi vairamu ai." ²² Gau iboudiai na Tamagu ena amo vada e gwaurai henigu, bona ta asi dibana Natuna be daika Tamana sibona mo, bona Tamana be daika Natuna sibona mo, bona daika Natuna ese e gwauraia tauna ese baine hahedinaraia. ²³ Bena ia na e hegiro hahediba edia ai bona sibodia mo e hereva henidia, eto, "Ini gau o itamu taumui matamui na vada nanamo. ²⁴ Badina na hamaoromuimu, peroveta bona pavapva taudia momo eurava umui ese o ita gaudia bema ita to asi e itava, bona o kamonai gaudia bema kamonai to asie kamonaiva." ²⁵ Harihari aitaia, Iudea taravatuna dibana momo tauna ta vada e tore-isi ia baine dibagania, etomamu, "Hahediba Tauna e, lau be dahaka baina kara mauri hanaihanai baina abia? ²⁶ Ia ese vada e hamaoroa eto, "Taravatu lalonai be dahaka e tore, a? Oi ese be ede o duahia tomamu, a? ²⁷ Ia vada e haere bona eto, "Lohiabada emui Dirava ba lalokau henia mai kudoumu idoinai ida, bona mai daramu idoinai ida, bona mai goadamu idoinai ida, bona mai lalomu idoinai ida, bona dekemu tauna sibomu o helalokaumu hegeregerena." ²⁸ Ia ese vada e hamaoroa eto, "Emu haere na maoro. Ini ba kara toma, bona oi na bo maurimu." ²⁹ A sibona eurava baine maoro urana, ia ese Iesu e hamaoroa eto, "Bona lau dekegu tauna be daika, a? ³⁰ Iesu e haere bona eto, "Tau ta na Ierusalema amo Ieriko e laova. Ia na henao taudia padadiai e moru, idia ese dabuana e daredia bona eha- beroa, vada e rakatania, mokona eha-masea. ³¹ Ma ini e vara toma, helaga tauna ta una dala amo e diho laova, bona ia ese ina tau e itaia neganai, dala kahana amo e rakaia hanai. ³² Hegeregerenai, Levi tauna ta danu, ema ina gabu bona tau e itaia neganai, dala kahana amo e rakaia hanai. ³³ A Samaria tauna ta, ena laolao ai, ina tau enai e kau, bona ia ese ina tau e itaia neganai, e bogaiahisi. ³⁴ Dekena ela, ia ese dehoro bona vine ranuna amo berona e dairidia, bona e kumidia. Bena sibona ena doniki ai e hahelaia-kau, e laohaia noho rumana, bona unuseni ai eregua. ³⁵ Dina iha ruana ai, ia ese denaril (moni) rua e vaidia noho rumana biaguna e henia, bona eto, 'Ba naria namonamo, bona ma dahaka ia dainai ba hoidia, baina loumai neganai, davadia baina henimu lou.' ³⁶ Ini taunimanima tatoi-osi oi ese o laloamu edena be henao taudia ese eha beroa tauna dekena tauna na bo gwauraiamu?" ³⁷ Ia eto, "Ia e bogaia-hisi tauna." Bena Iesu ese eha maoroa eto, "Aola bona oi danu unu ba kara toma." ³⁸ Harihari idia edia laolao ai, ia na hanua ta lalonai e vareai, bona hahine ta ladana Mareta ese eabidia dae vadivadi ai e haloa. ³⁹ Ia na mai tadina ta, ladana Maria, ia danu Iesu aena badinai e helai diho bona ena hereva e kamonai. ⁴⁰ A Mareta na hegaegae karadia ese lalona eha-hekwarahiava, una dainai ia vada ema bona eto, "Lohiabada e, oi be so laloamu tadigu ese vada e rakatanigu sibogu baina gaukara, a? ⁴¹ A Lohiabada e haere bona eto, "Mareta e, oi na gau momo daidiai lalomu e metaumu bona e hisihisimu, ⁴² a gau tamona mo herea. Badina Maria ese gau namona vada e abiahidi, ina na ia ena amo basine heabi oho." Translation done by: Mrs Boio English on Friday (28/07/23), time: 4.30 pm. Ready for quality checking