¹ Ini gau muridiai Iudea taudia edia aria ta e karaia, bona Iesu vada e dae lao Ierusalema. ² Ierusalema ai mamoe iduarana badina be digu gohuna ta, Heberu gadodiai ladana be Betesata, bona ia na mai ena ahekerukeru dehedia ima. ³ Taunimanima hutuma gogorere, mata kepulu, ae hedairiki eaiva ima heveri, ae heveri taudia unusenai ai hehekure. ⁴ Badina be aneru ta vaia e diho loulouva, una gohu e haraivaiava bena ranu iharaivana murinai e turu dae guna tauna ena gorere vada e namova. Gorere idau idau unu e namo tomava. ⁵ Tau ta na unuseni, ia ena gorere laganina be toi-ahui taurahani. ⁶ Bena Iese ese unuseni ai hekurenai e itaia bona gabeamo e diba ia na nega daudau vada unuseniai, ia ese e hamaoroa eto, "Oi ouramu banamo, a?" ⁷ Gorere tauna ese e haere henia, eto, "Lohiabada e, asi idurugu tauna ta, bema ranu na e lohilohiamu neganai, ia ese baine atogu dobi gohu lalonai. A gohu lalona ai nadihomu neganai, ta da ma vairaguai e dihomu." ⁸ Iesu ese e hamaoroa, eto, "Atoreisi, emu geda avabia-isi, bona ba raka." ⁹ Gorere tauna na e namo taku, bona ena geda eabia-isi bona vada e raka. Una dina be Dina Helagana. ¹⁰ Una dainai Iudea taudia ese e hanamoa tauna e hamaoroa, eto, "Ina na Dina Helagana bona emu geda o abia loamu na dia maoro." ¹¹ A ia ese e haere henidia, eto, "Vada e hanamogu tauna ese e hamaorogu, eto, 'Emu geda avabia-isi bona ba raka." ¹² idia ese e nanadaia, eto, "Una be edena tau ese oi e hamaoromu, 'Gau bavabi-isi bona ba raka?" ¹³ badina e hanamoa tauna na asi dibana daika badina be Iese vada hehuni ai e raka oho badina hutuma bada unuseniai dainai. ¹⁴ Gabeamo, Iesu ese tauna vada e davaria dubu lalonai bona e hamaoroa, eto, "Aitaia, oi na vada ome namo! Basio kara dika lou, bona dika badana ta emuai na basine vara.' ¹⁵ Ina tau na e raka lasi ela bona Iudea taudia e hamaorodia ia e hanamoa tauna na Iesu. ¹⁶ Badina be ini gau daidiai Iudea taudia ese Iesu vada e dagedage henia, badina be ini gau na Dina Helaga ai e karadiava. ¹⁷ A Iesu ese e haere henidia eto, "Lau Tamagu na e gaukaramu ema hari dina danu, bona lau, danu, na gaukaramu." ¹⁸ Badina be ini kara daidiai Iudea taudia ese Iesu e tahuava bae alaia mase badina be ia na dia Dina Helaga taravatuna mo e hamakohiava, a e tomava Dirava na ia sibona Tamana, sibona Dirava ida e hegeregereva dainai. ¹⁹ Una dainai Iesu e haere bona e hereva henidia, eto, "Momokani vaitani na na hamaoromuimu, Natuna na sibona gau ta se karaiamu, a Tamana e karamu gaudia mo e itamu, badina dahaka Tamana ese e karamu, ini gau na Natuna ese danu e karadiamu." ²⁰ Badina Tamana ese Natuna e lalokau heniamu bona ia sibona ese e karamu gaudia iboudiai e haheitalaiamu, bona ia ese kara badadia ini kara daediai ma baine haheitalaia unu amo umui na ba hoa. ²¹ Badina Tamana ese mase taudia e hatoredia isimu bona mauri e henidiamu, hegeregerena Natuna danu e uraheniamu taudia na mauri baine henidia. ²² Badina Tamana ese danu tau ta se hahemaoro heniamu, a ia ese hahemaoro idoinai vada Natuna e henia. ²³ Una dainai taunimanima iboudiai ese Natuna bae matauraia Tamana e matauraiamu hegeregerena. Natuna se matauraiamu tauna ese ia e siaia Tamana se matauraiamu. ²⁴ Momokani, momokani na hamaoromuimu, egu hereva e kamonaiamu bona lau e siaigu tauna e abiabiraiamu tauna ese mauri hanaihanai vada eabia bona hahemaoro lalonai do basie vareai, ia na vada mase amo e hanai mauri ai. ²⁵ Momokani, momokani na hamoromuimu, nega na e maimu, bona negana binai, mase taudia ese Dirava Natuna gadona bae kamonai, bona bae kamonai taudia na do bae mauri. ²⁶ Badina Tamana lalonai mauri e miamu hegeregerena, Natuna danu unu e henia toma mauri ia lalonai baine mia, ²⁷ bona Tamana ese Natuna vada maoro e henia hahemaoro gaukarana baine karaia badina be ia na Taunimanima Natuna dainai. ²⁸ Ina na basio hoa laia, badina nega ta na e maimu, gara ai e nohomu taudia iboudiai ese ia gadona do bae kamonai, ²⁹ bona bae raka lasi. E kara namo taudia ese Toreis-lou maurina bae abia, bona e kara dika taudia ese hahemaoro toreisi-louna bae abia. ³⁰ Sibogu egu amo gau ta basine karaia diba. Na kamonaimu hegeregerena amo, na hahemaoromu, bona egu hahemaoro na maoromaoro badina be lau na dia sibogu egu ura na tahuamu, a e siaigu tauna ena ura mo. ³¹ Bema lau na sibogu baina hegwaurai, egu hegwaurai herevadia na dia momokani. ³² Lau na ta ese e gwauraigumu, bona mai dibagu ia ese e gwauraigumu herevadia na momokani. ³³ Umui na o hesiaiva Ioane dekena baela, bona ia ese hereva momokani e gwauraiva. ³⁴ Harihari lau e gwauraigumu herevana na dia taunimanima edia amo. A ini hereva na gwauraimu na umui ihamaurimui. ³⁵ Ioane be lamepa ta e hururuva bona e diaraiva, bona umui danu o urava nega taina ia diarinai o moaleva. ³⁶ A lau e gwauraigumu herevana ese Ioane ena e hereaiamu, badina Tamagu ese e henigu gaukaradia do baine hagugurudia, ini na karamu gaukaradia ese lau e gwauraigumu, Tamagu ese e siaigu. ³⁷ Vada e siaigu Tamaguna sibona ese lau e gwauraigumu. Umui ese hora ta a erena do so kamonai bona oromana do so itaia. ³⁸ Ena hereva umui lalomui ai na se miamu, badina una e siai tauna, ia na asio abiabiraiamu dainai. ³⁹ Umui ese Buka Helaga Herevadia o tahumu badina be o tomamu mauri hanaihanai na lalodiai ba davaria, a ini Buka Helaga Herevadia tamodia ese na lau e gwauraigumu, ⁴⁰ bona umui na asio uramu dekegu baoma bena mauri bavabia. ⁴¹ Lau na dia taunimanima edia amo hahenamo na abiamu. ⁴² A lau na mai dibagu umui, Dirava ena lalokau sibomui lalomui ai na lasi. ⁴³ Lau be Tamagu ladanai vada nama, bona umui ese na so abigudaemu. Bema ta ma bainema sibona ladanai, umui ese bo abia daemu. ⁴⁴ Umui ese be ede bavabiabiraigu toma, umui be ta ta sibomui o heimodai hehenimu, a Dirava tamona ena amo e maimu heimodaina be so tahuamu, a? ⁴⁵ Basi laloa lau sibogu ese baina habadelaimui Tamagu vairanai. Ihabadelaimui tauna na Mose, enai emui helaro vada o atoa. ⁴⁶ Badina bema Mose vada o abiabiraia, umui ese lau bavabiabiraigu, badina be ia ese lau sivaraigu vada e torea. ⁴⁷ A bema umui ese iena toretore na asio abidaemu, egu hereva be ede bavabidae toma. Translation done by: Mr. Peter English on Wednesday (16/08/23), time: 9.04am. Ready for quality checking.