¹ una dinadia ai ibadinana taudia eha-hutumava bena Helene gado ai e hereva taudia ese Helene gado ai e hereva taudia e maumauraidia matama badina be edia hahine vadodia na dina iboudiai aniani iharina ai e dabu loulouva. ² Bena aposetolo ese Iesu ibadinana taudia hutuma e haboudia eto, Ai ese Dirava ena hereva iharorolaina baia hadokoa aniani iharina totona na dia namo. ³ Una dainai varavaramai e, umui na taumui hahitu avabidia hidi haridia namodia taudia Lauma bona aonega ai e honumu taudia bena ina gaukara ba henidia. ⁴ A ai ese nega idoinai guriguri bona haroro baia goadalaia. ⁵ Ina hereva na iboudiai ese e abiadae bena haida e gwauraidia hidi Stefano abidadama bada bona Lauma Helaga ese e rohea tauna Pilipo bona Prokoro bona Nikodemo bona Timona bona Pamena bona Nikolao ia na tau Anitioka Iuda tauna ai e halaoa. ⁶ Unu hahituosi na idia ese aposetolo vairadiai e haginidia. Bena aposetolo na e guriguri guna bena imadia latadiai e ato kau. ⁷ Bena Dirava ena hereva e piua rohoroho bona Iesu ibadinana taudia Ierusalema ai eha-hutumadiava bona hahelaga taudia hutuma ese danu e abiabiraia. ⁸ Stefano na harihari-bada ai bona siahu ai e honu bona ia ese hoa karadia bona toa badadia taunimanima vairadia ai e karava. ⁹ Bena e ruhadia nege oreana edia dubu taudia haida bona Kurene bona Alesanderea bona Kilika bona Asia taudia haida ese Stefano ida e hepapa-ahuahu. ¹⁰ To idia na asi siahudia bae gwau-tubu badina be ena hereva na aonega bona Lauma ai e hahonua. ¹¹ Una dainai idia ese haida lalodia e ani baeto Ai na ena hereva a kamonai Mose bona Dirava e hadikalaidia. ¹² Unu amo idia ese hanua taudia bona heitatao taudia bona Itorena taudia e haherou-heroudia bena ia dekena e heau lao vada e dabaia tao Kaunsolo taudia vairadiai e laohaidia. ¹³ Bena idia ese hahebade koikoi e haginidia tore, idia eto, Ina tau ese ina gabu helagana bona taravatu ihadika laina herevadia na se hadokomu. ¹⁴ Ai ese danu ena hereva a kamonai, eto Iesu, tau Nasareta, ese ina gabu baine rohoa, bona Mose ese e henida karadia danu baina ha-idau." ¹⁵ Bena Kaunsolo gabunai e helaiva taudia iboudiai ese e raraia tao, vairana e itaia, aneru ta vairana na heto. Translation done by: Mrs. Ori. C. Kohu on Sunday (13/08/23), time: 12 midday. Ready for quality checking.