¹ Tau ta ladana be Anania, adavana Sapira ida, tano ta e hoia; ² to idia ese tano davana kahana e moia tao (adavana danu dibana), bena kahana mo e laohaia aposetolo taudia vairadia ai eatoa diho. ³ Bena Petero eto, "Anania e, dahaka dainai Satani ese lalomu e hahonua, bena Lauma Helaga o koia bena tano davana kahana o dogoatao? ⁴ Do asio hoia negana ai, tano na oiemu, bona o hoia negana ai davana na oiemu, hari ina kara be ede o lalohadailaia toma? Oi ese taunimanima some koia, a Dirava." ⁵ Una hereva e kamonaia murinai, Anania na e hekida diho bena e mase, bena harina e kamonai taudia iboudiai e gari dikadika. ⁶ Bena eregabe e toreisi, dabua ai e hiria, bena e huia lasi, e guria. ⁷ Hora toi sisivana vada ela, adavana ma e raka vareai, asi dibana dahaka e vara. ⁸ Bena Petero ese e hamaoroa eto, " Ahamaorogu umui ese tano o hoia gauna be ina." Bena ia e haere eto, oibe, davana gauna bena." ⁹ bena Petero ese e hamaoroa eto, Edeheto umui raruosi lalomui o hatamona Lohiabada ena Lauma ba dibagania oto? Adavamu igurina taudia aitadia iduara ai gigini, oi danu ma bae huamu lasi." ¹⁰ Bena ia danu e moru Petero aena badinai bena vada e mase. Hari eregabe tatau dia e vareai, masena ai e davaria, bena e huia lasi, e guria adavana dekenai. ¹¹ Una negana ai ekalesia idoinai bona harina e kamonai taudia iboudiai gari bada ese e abidia (butudia tao). ¹² Toa bona hoa karadia diagau aposetolo ese e karava taunimanima vairadiai. Idia iboudiai danu mai lalodia tamona ida Solomona ena dehe ai e hahebouva. ¹³ A taunimanima iboudia ai na asi goadadia idia ida bae hebou; Edeheto taunimanima ese e imodaidiava. ¹⁴ Dounu hutuma bada Lohiabada e abidadama heniava ena orea ai e hebouva, tatau bona hahine. ¹⁵ Gorere taudia danu e huadia lasiva edia bedi ai ariara ai e kurediava, Petero baine raka hanai negana ai ia laulauna ese haida baine hakerukerudia helaoreana. ¹⁶ Ierusalema badina hanuadia taudia hutuma bada danu e hebouva, gorere taudia bona lauma dikadia ese e bolodia taudia danu e laohaidia bena ibouboudia ai e hagoevadia. ¹⁷ A hahelaga tauna e toreisi, bona ia e bamoa taudia (Sadukea taudia edia orea); bena e mama (vagege) henidia, ¹⁸ bona aposetolo taudia e dabaidia tao, bena dibura rumana ai eatodia. ¹⁹ A hanuaboi ai Lohiabada ena aneru toi ese dibura rumana iduarana e kehoa e hakaudia lasi, bena eto, ²⁰ aola, bena ba gini dubu lalonai ina mauri herevana idoinai taunimanima iboudiai ba herevalai henidia. ²¹ Una hahedua e kamonai bena daba matanai dubu ai e dae kau e hahediba. A hahelaga tauna badana mai bamona ida ela, kaunsolo taudia bona Isaraela tau-badadia iboudiai e boiridia hegogo, bena ena hesiai taudia dibura rumana e siaiadia lao aposetolo taudia bae mailaidia (hakaudia). ²² A hesiai taudia ela to dibura rumana ai asie davaridia, bena e lou ela, e haripiu, ²³ eto, a ginidae negana ai dibura rumana vada e hekou kunuka-kunuka bona hegima taudia danu iduara badibadidiai gigini, to iduara a kehoa negana ai, ruma lalona na asi tauna. ²⁴ Hari dubu helaga biaguna bona hahelaga taudia ese ina hereva e kamonai, e daradara bada, asi dibadia unu kara anidia be dahaka. ²⁵ Bena tau ta dekedia ela bena e hamaorodia eto, "Aitaia, dibura rumana ai o koudia taudia na dubu lalonai gigini bena taunimanima e hadibadia mu. ²⁶ Bena dubu helaga biaguna ena hesiai taudia ida ela, aposetolo eha-kaudia lou, to asie dagedage henidia, taunimanima ese nadi amo ba hododia na garina. ²⁷ E hakaudia vareai, kaunsolo taudia vairadiai e haginidia. Bena hahelaga tauna badana ese e nanadaidia, eto, ²⁸ Ai ese a haduamui, ato "Una tau ladanai basio hahediba." A harihari emui hahediba herevadia ese Ierusalema vada eme hahonua bona o habadelaimaimu, una tau ena mase dainai. ²⁹ Bena Petero, aposetolo oreadia ida e haere, eto, "Ai na Dirava ikamonai henina be namo taunimanima ikamonai henia be dika. ³⁰ Tamamai edia Dirava ese Iesu vada e hatorea isi, umui ese o alaia mase satauro ai o tauadae. ³¹ Dirava ese vada e abia dae ia imana idibana ai Lohiabada bona Hahemauri tauna ai vada e halaoa, Isaraela taudia baine hahelalodia kerehai bona edia dika baine gwau tao. ³² Ai na ini gau a gwauraimu, Lauma Helaga danu e gwauraimu, Dirava ese ia ikamonai henina taudia vada e henidia. ³³ Kaunsolo taudia ese unu hereva e kamonai ai, e badu dikadika e urava aposetolo bae aladia mase. ³⁴ A kaunsolo ta Farasea tauna, ladana Gamaliel, taravatu ihahedibalaina tauna, taunimanima iboudiai ese e matauraiava e tore isi bena e haduadia (haganidia) aopsetolo na bae raka lasi nega taina murimuri ai do bae noho. ³⁵ Bena e hamaorodia eto, "Isaraela taumui e, sibomui nahuamui ba toho bena ini taunimanima ede ba karadia toma. ³⁶ Idau nega ai Theuda e ginitore sibona e gwauva ia na herea tauna, bena taunimanima sinahu-hani ia enai e tao. E alaia mase, bona ena orea taudia e hakarohodia bona e haoredia. ³⁷ Ia murinai, Iuda tau Galileia e ginitore taunimanima ladadia itoredia neganai bona taunimanima haida ienai e tao. To ia danu e alaia mase bona ena orea taudia danu e hakarohodia. ³⁸ Harihari na hamaoromuimu, ini tatau edia amo raka siri, sibodia ba rakatanidia, badina be ini hereva bona kara bema taunimanima edia amo anidia na basiema vara. ³⁹ To bema Dirava ena amo, umui na basioma haoredia diba eiava readia sibomu boma hedavari umui danu Dirava o tuari heniamu. ⁴⁰ Bena aposetolo e boiridia vareai e dadabadia bena e haganidia Iesu ladana ai basie haroro, bena e kahudia nege. ⁴¹ Una dainai, aposetolo ese kaunsolo e rakatania mai moaledia ida badina be Iesu ladana bagunai hisi e ani. ⁴² Una murinai, dina iboudia ai, dubu ai bona ruma ta ta lalodia ai, e hahedibava bona Iesu Keriso sivaraina namona iharorolaina asie hadokoa. Translation done by: Mrs. Ori. C. Kohu on Wednesday (09/08/23), time: 4.52am . Ready for quality checking.