1
Bena edia amo a raka oho neganai a heau, maoromaoro bona Kosa ai a kau, bena dina gabenai ala Roda, bena unu amo ala Patara.
2
Unuseni ai Foenikia bainela kadana ta a davaria, bena a guikau a heau.
3
Kupro a itaia bena laurina kahana ai a rakatania, a heau ala Suria bena Turo ai a diho, badina be kada kohuna unuseni ai bae vaia dainai.
4
Bena una murinai hahediba a davaridia, idia dekedia ai dina hitu a noho. Lauma ena amo idia ese Paulo e hamaoroa loulouva Ierusalema basinela.
5
Unu dinadia e ore, bena emai laolao ala, idia iboudiai, mai adavadia bona natudia, e bamomai dala ai ela bona hanua isena a rakatania. Bena kone ai a hetuitui, bena a guriguri,
6
bena a hahetoni heheni. Kada ai gui, bena e lou edia ruma.
7
Emai laolao Turo ai e ore, Tolemaia ai a heau kau. Unuseni ai tadikaka a hahenamo henidia bona dina tamona idia ida a noho.
8
Bena daba ai ala Kaisarea. Filipo ena ruma ai a vareai, evanelia tauna, ia na hahituosi tauna ta, bena ia ida a nohova.
9
Ia na mai natuna ulatodia hahani e peroveta va.
10
Dina hoho unuseni ai nohomai ai, peroveta tauna ta ladana Agabo Iudea amo e diho ema.
11
Bena ema dekemai Paulo ena belta (eiava riorio dabuana aukana) e abia. Sibona aena bona imana e guidia bena eto, Lauma Helaga be ini e gwau tomamu, Iuda taudia ese Ierusalema ai ina belta (riorio dabuana aukana) biaguna ini bae guia toma, bena idau bese taudia bae henidia.
12
Una hereva a kamonai neganai na, ai bona una gabu taudia na Paulo a noiava Ierusalema ai na basine ha dara dae.
13
Bena Paulo e haere, eto, "Umui be dahaka o karamu, o taimu bona lalogu o hamakohiamu? Lau be vada name hegaegae, dia una mo bae guigu, a baina mase danu Ierusalema ai Lohiabada Iesu ladanai."
14
Paulo lalona ianina asia hegeregere dainai emai noinoi a hadokoa ato, "Lohibada ena ura mo baine karaia."
15
Unu dina muridia ai, emai kohu abidia bena ala Ierusalemai a hadara dae.
16
Hahediba haida Kaisarea amo danu ai e bamomai. Idia ese tau ta ladana Nason, tau kupro, Iesu ibadinana tauna gunana ta, ena rumai e abi mai dae baia noho.
17
Ierusalema ai a kau neganai, tadikaka ese mai moaledia ida e abimai dae.
18
Dina gabenai Paulo na ai ida ala Iakobo dekena, bona orea ita-taona taudia danu e vaira.
19
Paulo ese e hahenamo henidia, bena Dirava ese bese idau-idau taudia bogaragidiai iena hesiai amo e karava karadia iboudiai sivaraidia e gwaurai.
20
Idia na e kamonai, Dirava e heatolaia, bena idia ese ia e hamaoroa eto, "Oi itaiamu tadikakagu e, Iuda taudia daha daha ese Iesu vada e badinaiamu. Idia danu taravatu e badinaia tarika-tarikamu.
21
Idia na vada e kamonai oi ese, Iuda taudia bese idau-idau bogaragidia ai e nohomu na o hadibadiamu Mose bae rakatania, bona natudia basie peritome dia, bona sene karadia basie kara.
22
Una dainai, ede baita kara toma? Idia na momokani bae kamonai oi vada oma.
23
Una dainai ini kara ai a hamaorolaimu na ba karaia. Tatau hahani bini hehelaga edia gwauhamata dainai.
24
Oi ese bavabidia idia ida ba hahegoeva, bona edia negenege ba davanadia, bena huidia ba utu. Unu amo taunimanima iboudiai bae diba oi harimu e kamonaiva na asi anina, bae diba danu o kara maoromaoromu bona taravatu o badinaiamu.
25
A bese idau-idau taudia na emai lalo-hadai vada a tore henidia, ato, kaivakuku ihaboulaidia gaudia bona rara bona aiodia e gigi gaudia hidiodia na basie ani, bona basie heuda-hanai.
26
Una dainai, Paulo ese hari tatau na e abidia, kerukeru idia ida bae hahegoeva, dubu lalonai e raka vareai, hahelaga taudia bae ore dinadia baine gwaurai hedinarai bona boubou gaudia idia ta ta daidiai baine ato.
27
Hahegoeva dinadia hituosi kahira-kahira e ore murinai, Iuda taudia haida Asia amo ese Paulo e itaia dubu helaga lalonai, bena idia ese aru taudia lalodia e ani, bena e dabaia tao.
28
E lolo eto, "Isaraela taumui e, a durumai. Ina tau ese taunimanima iboudiai gabu idoidiai e hadibalaidiamu ita beseda, bona taravatu, bona ina gabu bae inai henidia. Ina danu, ia ese Helene taudia na dubu helaga lalonai vada e hakaudia vareai, ina gabu helagana vada e hadikaia."
29
Badina be idia ese e itadia guna Trofimo, tau Efeso ida, hanua lalonai bena banava eto Paulo ese dubu helaga lalonai vada e hakaua vareai.
30
Hanua idoinai e haraivaia, bena hanua taudia e aru ela Paulo e dabaia tao. Dubu helaga amo e veria lasi, bena iduara iboudiai e kou.
31
Idia ese bae alaia mase eto, Ierusalema idoinai e helogo-helogova harina na tuari biaguna badana e kamonai.
32
Bena ia ese tuari taudia mai biagudia ida e hakaudia haraga-haraga bena hutuma dekedia e heau lao. Aru taudia ese tuari biaguna badana mai ena orea taudia ida e itadia, bena Paulo idadabana e hadokoa.
33
Bena tuari biaguna badana e raka kahira Paulo e abia, bena ena orea taudia e haduadia gadea rua amo bae guia. Bena e nanadaia ia be daika bona ena kara be dahaka.
34
A hutuma bogaradiamo haida e hereva ta ma haida e hereva ta e lololai. Bena helogo-helogo dainai ia na hereva maorona idavarina asi dibana. Una dainai, e hahedua, Paulo na tuari kohorona lalonai bae hakaua vareai.
35
Vadavada ai e kau ai, tuari taudia ese e huaia dae badina be aru taudia na mai edia dagedage.
36
Badina be hanua taudia ibouboudiai ese e gavaia e lolo eto, "Aine mase."
37
Kohoro lalonai bae hakaua vareai eto, Paulo ese tuari tauna badana e noia, eto, "Mani bama hereva henimu a?" Tuari biaguna badana eto, Helene gadodia mai dibamu a?
38
Oi na dia hari Aigupito tauna, gunaguna ala-ala e havaraia bona ala-ala taudia daha hani tano gagaena e hakaudia lao a?"
39
Paulo eto Lau na Iuda taugu egu hanu na Taso Kilikia tanona ai, harina dia maragi hanuana. Una dainai, na noimumu, mani emu kara taunimanima aina hereva henidia.
40
Tuari biaguna badana e gwau maoro, bena Paulo na vadavada ai e gini imana ai taunimanima e taodia ahu. Idia na asi regeregedia bena ia ese Heberu gadodia ai e hereva henidia eto,