¹ Apolo na Korinto ai e nohova negana ai, gunika kahana amo e lasi Efeso ai e kau, Iesu ibadinana taudia haida unuseni ai e davaridia. ² Paulo ese e nanadaidia eto, Iesu o abiabiraia negana ai Lauma Helaga danu oabia a? Idia e haere eto, "Lasi, Lauma Helaga herevana ta asia kamonaia." ³ Bena Paulo eto, "Dahaka bapatisona o abia?" Idia eto, Ioane ena bapatiso." ⁴ Bena Paulo eto, Ioane ese helalokerehai bapatisona mo e heni. E hamaorodia danu ia murina amo bainema tauna danu bae abiabiraia, Iesu bunai." ⁵ Una hereva e kamonai, bena Lohiabada Iesu ladanai bapatiso ma e abia. ⁶ Bena Paulo ese imana na idia latadiai e ato kau, Lauma Helaga na idia latadiai vada e diho, bena idia na gado idauidau ai e hereva bona e peroveta danu. ⁷ Taudia iboudiai gwauta rarua sisivana. ⁸ Bena Paulo na dubu ai e dae kau hua toi davana, e haroro loulouva mai haheaukana ida Dirava ena basileia herevana e hahedibalaiava taunimanima lalodiadia e aniva. ⁹ A haida ese lalodia e ha-aukadia e gwau ede-ede, bona dala matamatana e gonagonalaia hutuma vairadiai. Una dainai Paulo ese e rakatanidia Iesu ibadinana taudia danu e hakaudia oho, bena dina iboudiai Turano ena hahediba rumana ai e hahedibava. ¹⁰ Lagani rua unu e kara tomava, una dainai Asia tanona ai e nohova taudia Lohiabada ena hereva e kamonaiva, Iuda taudia bona Helene taudia danu. ¹¹ Dirava ese siahu karadia hereadia danu Paulo imana amo e karava, ¹² bena unu amo muko bona rami Paulo tauanina e dogotao ena amo e laohai gorere taudia dekedia edia gorere e ore bona lauma dikadia ese e rakatanidia. ¹³ A Iuda taudia haida vaia lauma dikadia ilulu-ohodia karadia e laoalaiva taudia danu una gabu ai. Idia ese Iesu ladana e hatoa matama lauma dikadia ese e bolodia taudia latadiai eto,Paulo ese Iesu e harorolaia tauna ladanai a haganimuimu a raka lasi. ¹⁴ Skeva, Iuda tauna bona hahelaga tauna ta, natuna mamaruanedia hahituosi unu e kara tomava. ¹⁵ Bena lauma dikana ese e haere henia eto. "Iesu na mai dibagu, bona Paulo danu dibagu; a umui be daidia?" ¹⁶ Bena hari lauma dikana ese e boloa tauna na idia latadiai e roho kau e hadareredia bona e dadabadia. Ela bona idia na una ruma amo e heau lasi asi dabua dia bona mai berodia ida. ¹⁷ Iuda taudia bona Helene taudia Efeso ai e nohova ese harina e kamonai. Bena gari ese iboudiai e butudia tao, bena Lohiabada Iesu ladana e imodaia. ¹⁸ Bona kamonai taudia hutuma danu iboudiai ema edia kara e gwaurai hedinarai. ¹⁹ Bona babalau taudia dia gagadoi edia buka e habou taunimanima iboudiai vairadia ai e gabu. Buka davadia e hagaudia, bona e davariadia siliva monidia gerebu (daha) ima. ²⁰ Una dainai Lohiabada ena hereva vada e vara rohorohova bona e kwalimuva. ²¹ Paulo na ena gaukara e hagugurua Efeso ai, bena lalona Lauma enai e hadaia Makedonia bona Akaia tanodia amo baine raka hanai Ierusalema bainela; eto, "Unu bainala guna, gabeamo Roma baina ha-itaia." ²² Bena ia ese iduruna taudia rarua Timoteo bona Erasto, Makedonia e siaidia lao. A ia sibona Asia kahana ai e nohova. ²³ Una negana ai helogo-helogo dia maragi e vara, Iesu ena dala dainai. ²⁴ Badina tau ta ladana be Demetrio, siliva igaukaralaina tau, Artemis, ena siliva dubu-dubudia e karava unu amo ena gaukara oreana taudia ese moni diagau e abiva. ²⁵ Ia ese idia bona gaukara hegeregeredia e karava taudia e haboudia, eto, "Tatau e, dibamui ina gaukara amo eda moni ta abimu. ²⁶ O itaiamu bona o kamonamu danu, dia Efeso ai mo, to Asia tanona idoinai danu, ina tau Paulo ese taunimanima hutuma bada lalodia e animu. E tomamu taunimanima imadia ese e karamu diravadia na dia dirava korikoridia. ²⁷ Ina na ita e hadikadamu, eda moni idavarina gaukarana taunimanima ese bae dadaraia, bona dia una mo a Artemisi (Diana) ena dubu danu bae dadaraia. Oibe, Asia idoinai bona tanobada taudia ibouboudiai e toma henia dihomu diravana dagina herea-daena baine heabi oho." ²⁸ Idia ese unu hereva e kamonai negana ai e badu dikadika, e lolo loulou, eto, "Efeso diravana herea mikamika." ²⁹ Hanua idoinai helogo-helogo vada e bada, bena idia iboudiai e heau ela, herarai rumana. Idia ese Paulo e bamoava taudia Gaio bona Aristako Makedonai amo ema e guidia. ³⁰ Paulo ena ura baine raka vareai hanua taudia dekediai, to Iesu ibadinana taudia ese e ru-ua. ³¹ Asia lohiadia haida Paulo turana ese danu gwaukau e siaia e noia herarai rumana ai basine raka vareai eto. ³² Haida ese hereva ta e lololaiava, ma haida hereva ta, bena hebou na e helogo ahuahuva dainai hutuma na hebou badina asi dibadia. ³³ Bena hutuma bogaradia amo Alesana ema, Iuda taudia ese taunimanima vairadiai e doria laova. Una dainai Alesana ese imana ai taodia ahu, taunimanima baine haere henidia eto. ³⁴ To idia ese e itaia ia na Iuda tauna, bena iboudiai hereva tamona e lololaia loulouva ela bona hora rua sisivana eto, "Efeso diravana Artemisi (Diana) na herea mikamika. ³⁵ Bena hanua ena toretore tauna ese hutuma e hatuidia, eto, Efeso taumui e, daika tanobada ai asi dibana Efeso na Artemisi (Diana) badana ena dubu igimana, bona deo (heaven) ena amo e moru gauna danu igimana. ³⁶ Ini hereva be asi igwau-tubudia, una dainai ba noho namonamo basio kara havara-havara una be namo. ³⁷ Badina be ini o hakaudia mai taudia na dia dubu ai asie dadidadi eda dirava hahinena danu asie hadikaia. ³⁸ Una dainai, Demetrio mai ena gaukara taudia ida lalodia baeto tau ta ese vada e hadikadia, hahemaoro rumadia vada eme hekeho gavana danu noho. Benaini bae hahebade heheni. ³⁹ A bem idau hereva ta mia, hebou korikori ai bae herevalai. ⁴⁰ A hari dina ena helogo-helogo dainai bae hahebadelaida be baita kerere. Badina be ina helogo-helogo dainai bae habadelaida na asi anina bona ina hebou badina na basita gwauraia diba. ⁴¹ Ia e hereva vaitani, bena e haganidia bae karoho.