¹ Gerege Farisea mati aena ḡaha iaberaki Ierusalema seni urihime iauki Iesu ḡasina oroḡime iauki ronu, ² “Esemena ai ḡamituhea ni iahuve iau tene aenava dodova? Iauka iau ade ketoke veite iauki uriḡahi tamuta raḡoha.” ³ Iesu raki boriti ḡahigei ronu, “Gerege otavado dainehe ia Dirava Aenave hosaḡi iai tene ḡumaḡe kiogeva? . ⁴ Eige Dirava raki roma, ‘Ama ai mame mati ai neine matau ḡahigeisa,’ mati, ‘Ana unuhuna au mame renu au neine iau ada ga daure vima iauka riaḡa hoḡe raḡohira vara.’ ⁵ Eduge unuhuna au mame se au neine boriti ḡahigei, “Da ia iahe gevare dakamu Dirava moimanu, gerege koita era au iahuve matau ḡahigeige veitera. ⁶ Eige, iai tene dainehe, iama Dirava ga aenava ḡarehisa. ⁷ Tarata ḡaha ma ḡahanu! Eige riaḡa Isaiah peroveta ḡahane era iai gare auki ronu: ⁸ ‘Koita o iabara iau avaḡe ge iauki da maḡe ḡaha, eduge iau soruke ra dai ḡamana vara; ⁹ iau da maḡe ḡahare ra maka veitera, iau koita hugure ḡahi gevare erehuta Dirava aena gare raḡoha.’” ¹⁰ Gerege Iesu raki koita ihirogei au ḡasina oroḡare auki kiro gevenu, “Iama di gare ihare mati uhu maemisa: ¹¹ era beta ai avaḡehe uguhare eraki koita be daure ḡahima, eduge au avaḡehe hakivare eraki a daure ḡahima.” ¹² Gerege au ḡamituhea iabaki oroḡime iauki kironu, “Ama anavisa a ga rone eramu Farisea ḡahaia iau uhure huhu ḡahi gevenu?” ¹³ Iesu raki boriti ḡahigei ronu, “Di Mame vava uiare raki au idi beḡibe veite inuhati ḡaikahe raka geige vara. ¹⁴ Eige ena ḡare geve; iauka ni veite koitava raki ni veite ḡahava nisigeva. Renu ni veite koita be au bamode ni veite be nisiḡamare iauka iau abu dahana desuraḡira vara.” ¹⁵ Eduge Petero raki beraḡanu, “Aso a badigomu rone makava no boriti ḡahigeve.” ¹⁶ Gerege Iesu raki ronu, “Ia ḡainage iai uhure iana so bao raḡohira veitenu? ¹⁷ Iana da rone koita be iaḡa be mi iare ra au avaḡehe uguhi oti au vaḡatanehe, mati auna au ahatanahe hakivisa? ¹⁸ Eduge otavado au avaḡehe hakivare era au sorukehe uiare eige auki oroḡonu, renu eraki daure ḡahima. ¹⁹ Makava ramu koita be sorukehe hakivare eramu uhu anana daure, koita ḡahigei, ni muduka, ḡuma daure ata be mabare ruta, vaho, tarata koita, koita be iau ihe daure ḡahigeisa. ²⁰ Ḡuma daure o iaberamu koita be daure ḡahiḡa vara, eduge ada ketoke veite tamuta raḡohare ra beta a daure ḡahiḡa vara.” a ²¹ Iesu raki mata e ḡaremi auki Tairo mati Sidona iau hakirehe otinu. ²² Gerege Kanana maḡi be mata ei uiare eraki hakivi gure barai roege, “Di Rohite, Davida Moe; da vaḡahu ḡaha, di mae ramu sua daure raki au uhurehe uguhanu.” ²³ Eduge Iesu ra maḡi ḡasina ga be roro veitera. Renu au ḡamituhea iabaraki au ḡasina otime iauki imiḡi roege, “Kiro au ḡeahu ote, auka ni itahe ge auki gavi barai oroḡima.” ²⁴ Iesu raki ronu, “Iau da besuḡane ra Isaraela ḡahavaia dauraḡohane e iaḡogei gevara.” ²⁵ Eduge negu maḡi eraki oroḡi au vaḡotoni komuko daivi, roege, “Rohi Bauge, da iaheḡa.” ²⁶ Iesu raki onaki ronu, “Beta maḡera a momona iau demake mare mi totoka mohi gevara.” ²⁷ Maḡi eraki ronu, “Era riaḡa vara, Rohi bauge, eduge totoka ḡaitage iau biage tamuta vane momona desuraḡane iogei gevara.” ²⁸ Gerege Iesu raki maḡi e kironu,“Aka ihihi maḡi riaḡa vara! A ḡahara vane iaḡaniva aka mimi vara.” Tutube veite au mae raki maḡe ḡoinu. ²⁹ Iesu raki oḡi Galileia gohu eḡiahu otege auki nimu ḡadimi adahe guramanu. ³⁰ Koita dadaḡava raki au ḡasina oroḡime, iauki vasi daure, ni veite, ga veite, mati dika nune nune ḡaitage nisigei au ḡasina oroganu. Iauki au vasi ḡaika ḡosigei, renu auki maḡe ḡahi gevenu, ³¹ gerege koita iaberaki ḡaḡu raḡohi iauki eraḡege ga veite ga raḡohi, inuhati maḡe ḡahi, vasi daure oḡia, ni veite niḡa niḡa raḡoha. Gerege iauki Isaraela Dirava va motea ḡahi. ³² Gerege Iesu raki au ḡamituhe ihirogeime auki kirogei, “Daka koita o iabera daki uhudau ḡahi geima, badiva iauka da ruta oi vani abigaḡa gera renu iauka tamuta be veitera; renu daka beta ḡubuta besugei otito vara, iau negu ḡumaḡa mame raḡohime.” ³³ Au ḡamituhea iaberaki beraḡanu, “Nona orei mata ḡaḡae oi demaka dadaḡa behuḡi koita o vasi geisa?” ³⁴ Iesu raki beragei ronu, “Iana iai ḡasina gena parao esebu genu?” Iauki kironu, “Parao iatiriḡava, mati karava momona rorebe.” ³⁵ Gerege Iesu raki ḡanito ḡahigei iauka vata ada gurahisa, ³⁶ gerege auki parao iatiriḡava mati karava idigei; auki Dirava maḡe ḡahane itaharahe auki rehagei idigei au gamituhe mohi gevege iauki idigei koita mohi gevenu. ³⁷ Iauki iau bouge tamuta raḡohi netu raḡohi; renu au ḡamituhe iaberaki demaka momona idigei boteka iatiriḡa toboḡa gevenu. ³⁸ Negu koitaia tamuta raḡohane iau ate ramu daha ababu gera; ³⁹ maḡi mati momono iabera iauka dahi geige veiter