¹ Nega ei Galileia ni tabata ḡahege rohiva Heroda raki Iesu gare raḡege gava ihinu; ² gerege auki au ḡamituhe boriti ḡahigei ronu, “Ora Ioane Babatiso; aukamu hoḡe uhura ge auki urimi ḡoiraḡanu, eige auki hedo ruta me onaki kikive kima.” ³ Edube Heroda ramu uriḡoi Ioane mi vadibu iagava maemanu, au ḡoḡe Filipi mabare, Herodias dainehe, ⁴ badiva Ioane raki Heroda boriti ḡahege, “Ni aenave ra roma aka beta Herodias mi ai mabare kisa.” ⁵ Renu Heroda auna roma auka ḡami hoekisa, eduge auki koita iau siḡore vanu, badiva auka koita iaberaki riaḡa ḡaha roia auka peroveta koita vara. ⁶ Eduge Heroda ḡuruane heḡiri vanihe, Herodias mae raki koitaia iau vaḡotoni iavea vi Heroda tage heḡiri ḡahanu ⁷ eige Heroda raki maiaḡo e ominue ḡahi auna otavado iaḡa vana au ḡahara vima auka mi moimo vara. ⁸ Au neine raki uriḡoi uhuḡatu, gerege auki ronu, “Daka imimi vima aka Ioane Babatiso omote mereki ada maemi mi oroḡi da moimisa.” ⁹ Negu iau rohive uhure tage huhu naḡanu, eduge auki ominue vanu au deiva tuhe iau vaḡotoni, eige auki au ḡamituhe ḡanito ḡahigei iauka maiaḡo imimi vane mi moimisa; ¹⁰ auki besugei iauki oti vadibu iagava Ioane omote dodoanu. ¹¹ Iauki au omote dodoi mereki ada maemare iauki mi oroḡi negu maiaḡo e moimege, auki mi oti au neine moimanu. ¹² Ioane ḡamituhea iaberaki oti au ahata make miare iauki abatemare; iauki oti Iesu boriti ḡahanu. ¹³ Iesu negu Ioane badine ihine negahe, auki vanaḡi ḡaremi avaḡu tana koita veite gabuhe otinu. Eduge koita iaberaki ihare, iauki oḡo ḡarehime iauki au itahe vasi oḡi otinu. ¹⁴ Iesu raki tana hakivare, auki koita dadaḡa eragei; auki uhudau ḡahi gevare renu dika raḡane maḡe ḡahi gevege. ¹⁵ Va hiriḡomege, au ḡamituhe iaberaki au ḡasina otime iauki kironu, “Ora mata ḡaḡae vara, mati va ramu hiriḡoromanu; no koita besu geva iau oḡo oti geve mati iavaḡu iau debubu iaḡane hae geisa.” ¹⁶ Iesu raki kiro gevenu, “Iauka beta otito vara; iakena iaḡa be mohi gevege iauna isa. ¹⁷ Iauki kironu, “Ni ḡasina gera iaḡa veite eduge parao adakasiva mati karava abu gera.” ¹⁸ Auki kiro gevenu, “Idigei oi di ḡasina oroḡiahe.” ¹⁹ Auki koita kirogei iauka isu ada gurahisa. Gerege auki parao adakasiva mati karava abu idigevare, auki vava gagai Dirava maḡe ḡahare auki parao rehaḡare, auki idigei au ḡamituhe mohigei, iauki idigei koita mohigeisa. ²⁰ Iauki iau bouge tamuta raḡohi kosai itaharahe; au ḡamituhe iabaraki iau tamuta raḡane momonoa idigei iauki boteka utube abu toboḡa gevenu. ²¹ Gerege koitaia tamuta raḡohane iaberamu daha adakasiva naḡate, maḡi mati momono iabera iauka dahi geige veitera. ²² Gerege auki au ḡamituhea besugei iauka uriḡahi vanaḡiva gohu hakirahe otisa, auka so koita inuhati besugei oḡo oti geisa. ²³ Auki koita inuhati besugei otare, auki nimu ada oti auka avaḡu imimi visa. Va ra hiriḡoromanu auka auvaḡu eigera. ²⁴ Eduge au ḡamituhea vanaḡiva gera hurehure oroḡi vanaḡiva ḡadimege, badivara nono raho tinabe raki ḡuguige. ²⁵ Renu va tahi oroḡege uhura Iesu raki eia ada oḡi iau ḡasina otege. ²⁶ Eduge au ḡamituhe iaberaki eraḡege au eia ada oḡi oroḡoge, iauki siḡo raḡohi, roege, “Vire ramu sua ra!” Iauki siḡo raḡohi bara raḡohi. ²⁷ Eduge Iesu raki vaina gavi roege, “Uhu berebe kiahe, ora dakaki; ia negu siḡo raḡime.” ²⁸ Gerege Petero raki gavi kironu, “Rohi Bauge, ona riaḡa akenu, da ḡanito ḡaha da eia ada oḡi ai ḡasina oroḡima.” ²⁹ Iesu raki kironu, “Oroḡo.” Gerege Petero raki vanaḡi ḡaremi eia ada oḡi Iesu ḡasina otinu. ³⁰ Eduge auki nono ḡugui berebe ḡahane eraḡane, auki siḡo vanu, auki tabe-tabe eve uguhi otege, auki nivi ronu, “Di Rohite, da iaheḡa!” ³¹ Iesu raki vaina au ade inuḡi mi kamui, kiroege, “Kava ihihi avie vana anu, otavado uhu korahiva a vima?” ³² Iauka iau abu vanaḡiva ḡadihanu nono raki veavi kosavanu. ³³ Gerege au ḡamituhea vanaḡi ada e iaberaki au vasi ḡaika ḡoru raḡohi, boriti ḡahi roege, “Riaḡa aka Dirava Moera.” ³⁴ Iauki koa hakirahe otinu, Genesareta matava haki raḡohanu. ³⁵ Koita iaberaki ihie au toaḡe kiare, gerege iauki ga besuḡi mata e inuhati iau boriti ḡahigei iauka dikave idigei au ḡasina oroḡisa, ³⁶ mati dika koita iaberaki imiḡi roege, maḡenu iau au ogona bisuke tage kamuisa; gerege kamuare ḡahava ḡaitage maḡe ḡahanu.