Matthew Utube Abigaga

1 Vani kobuḡa eige Iesu raki iaga ḡaremi oti gohu ḡaika guramanu. 2 Koita dadaḡava raki au ḡasina oti bouraḡohi ge auki urimi vanaḡi ada ḡadimi guramanu, koita iabara iau bouge gohu ḡaika rahirahe. 3 Auki iaḡa dadaḡa badigomu va boriti ḡahigei, roege: “Ihiahe! Nega beige ata be raki au ḡeḡehe beḡi beḡi otinu. 4 Auka beḡi beḡi viege, iaka be iabara ḡuma eḡiahu desuraḡohi, uguha iabaraki uguraḡi iogei. 5 Be iabara vateta munima ada desuraḡi, vateta raho veite eige ḡamana veite iauki kobo raḡohanu. 6 Eduge vani ḡaravane negahe, vani hedokava raki inuhati gabu gevege iauki hoḡe raḡohanu. 7 Iaka be iabara ḡati uhura iauki desuraḡanu, gerege ḡati raki kobo raḡohi ketake ḡahima iauki daure ḡahanu. 8 Eduge iaka be iabera vata maḡe ada ge iauki desuraḡanu eige iauki maka kia, be iabara tinahuva, be iabara utu agorokiva, be iabara utu abigaḡa. 9 Iana oḡoreana iana ihikotenu ihiahe!” 10 Gerege Iesu ḡamituhe iabaraki au ḡasina oroḡime iauki beraḡanu, “Esemena a koita o badigomua gaḡa geima?” 11 Iesu raki kiro gevenu, “Dirava ramu va basileia uhuvaka iai iorena ḡaḡae kinu, eduge koita be iauge so veitera. 12 Eige iana eraḡa, ana unuhuna uhuvaka manu, Dirava ramu dadaḡa ḡahi moimo vara, mati auka raho ḡahi moimo vara: eduge unuhuna veitenu, auna tina beḡu gena Dirava ra au mi ḡoiraḡira vara. 13 Da badigomu tahu gaḡa gevare maka vara, iaukamu niḡa niḡa raḡa eduge iauka erara veite, mati iauka ihikote eduge iauka ihihi veite se iau uhure ra bao raḡira veitera. 14 Eige iauka Isaia peroveta ḡahi gavi rone: Iaka riaḡa ihisa, eduge iau uhure beta bao raḡira vara, mati iaka niḡa niḡa raḡohisa, eduge iaka beta erara vara. 15 Eige koita iau soruke ramu vadibu ḡahanu, renu iau ihikoke iabara toḡeve ḡahanu, renu iaukamu iau nie kumu gevenu; eige iauka beta iau niehe niḡa niḡa raḡisa, renu iau ihikokehe ihisa, mati iauma iau sorukehe anavare renu ḡoiraḡohisa, gerege dana maḡuri ḡahi geisa. 16 Eige Dirava maḡe ḡahisa iai nie, iamu niḡa niḡa raḡa, renu iai ihikoke, iamu iha. 17 Riaḡa vara daki ia boriti ḡahi geima, peroveta ḡaha mati koita maḡe dadaḡa ḡahi ia eraḡane iauna so eraḡare, eduge iauka erara veite, mati iauna ia ihine ihare, eduge iauka ihihi veitera. 18 “Gerege iama ḡeḡe kiki koitava badigomuve ihisa. 19 Iana oḡoreana ia basileia ga ihinu eduge iai uhurera bao raḡira veite, diabolo raki oroḡare iau sorukehe uiare vahoro mi ḡeahu otito vara, eramu ḡuma eḡiahu desuraḡane naḡatera. 20 A muni ada desuraḡane iabara Dirava gare ihare renu iauki heḡirita manu; 21 eduge koita be umuka veite, edube nega tina beḡu auna kamuisa, gerege koitaia daure ḡahi mati huhu ḡahi ga o iau dainehe, koita eramu inono veite au ihihive ramu avie ḡoiḡo vara. 22 Be iana ḡati uhura desuraḡane, o iabara au gare ihinu, eduge ahata maka iaḡaniva mati maḡuriva raki au gare daure ḡahege auki madika veite. 23 Edube negu iaka vata maḡe ada beḡene iabara, oḡore iana ga ihinu mati uhu kinu, oḡoreana riaḡa madike ḡosiḡanu, bera tinahu be, bera utu agorokiva, renu bei gera utu abigaḡa.” 24 Iesu raki badigomu be mati boriti ḡahi gevenu: “Va basileia vara erehuta ata be demaka iaka maḡe au ḡeḡehe beḡi gevenu; 25 eduge vahi beige koitaia iaḡohane uhura, koita be raki ḡati daure idigei oroḡi koni ḡeḡe uhura beḡare auki ḡeahu otinu. 26 Eige ḡeḡe kobo raḡohi maka kiege, gerege ḡati daure tage iau uhura kobo raḡohege. 27 Gerege ḡeḡe iahe iahe vare koitava raki au ḡasina oti kironu, Di biage, akamu iaka maḡe eḡuge aki ḡeḡe beḡi gevenu? Orehe genu, ḡati daure o iau uhura kobo raḡoha? 28 Auki boriti ḡahigei, Koita daure be raki onaki kinu. Au iahe iahe atave raki kironu, Gerege ana roma nona oti ḡati daure raka geisa? 29 Eduge auki boriti ḡahigei, Veitera; ia negu ḡati rakai demaka iaka ḡainage raka geime. 30 Ḡare geve iau kobuḡa ḡahi kobo raḡohe ate taboro negava; renu taboro nega miege dana me ḡaha boriti ḡahi geisa, Uriḡahi ḡati bougei irosi koba koba idigei vene kisa, edube koniva bougei idigei di demaka iagehe ḡosiḡisa. ” 31 Iesu raki badigomu ḡaita kiro gevenu: “Va basileia ramu erehuta idi tahaka kusinaike naḡate gerege ata be raki mi au ḡeḡehe beḡenu; 32 auka idi tahaka kusinaike vara, eduge au kobo raḡane auki idi ketane ḡoinu, eige uguha vava huraḡohi iabara au ada iaga kisa.” 33 Iesu raki ḡaitana badigomu be boriti ḡahi gevenu: Dirava aenave rone be tage ramu erehuta maḡi be parao souka mi raho ḡahiḡa ḡadikiva ruta mi kobuḡa ḡahi degide ḡahi gerege parao ramu uhu raho ḡoima. 34 Iesu raki au gare inuhati badigomua koita boriti ḡahi gevege; auka iaḡa be ena roro kava veitera. 35 Onaki ora peroveta ḡaheva iau gare riaḡa ḡahiḡa vara: “Daka badigomu tahu ge dana ga visa; Daka badigomua ge dana vata ketake o ḡanai kine iaḡa ḡaḡae ḡahiḡa veite dana gava rosa.” 36 Iesu raki koita ḡare gevare auki iagahu otinu. Gerege au ḡamituhe iabaki au itahe otime iauki beraḡi roege, “So negu a badigomu ḡati ḡeḡe uhura makava no kirogeve.” 37 Iesu raki boriti ḡahigei ronu, “Negu iaka maḡe beḡene era Koita Ḡamika vara; 38 ḡeḡe ra vata ketake ora, mati iaka maḡe vara koita Dirava aenave riaḡa ḡahare ḡahavaia; ḡati ra koitaia Dirava betia ḡahare ḡahavaia, 39 eige diabolo raki daure beḡene ḡahava iabara; taboro vara vata o netu netua gera, renu Dirava aneru iabaraki meva kikiva. 40 Negu ḡati daure idigei bouge vare kiragei vene raḡohisa, ḡuma e naḡate vata ketake o netu netua tage ena ḡoiḡo vara. 41 Koita Ḡamika ramu au aneruve besugei, gerege iauna Dirava vaḡotoni oḡore iana ḡuma daure mati maḡuri daure raḡohare kasa geisa au koitatuhe iau, 42 Mati iauna idigei vene bubuka uhura kira gevege, eige iauna niḡo raḡohi iau eḡie iana gi raḡohisa. 43 Gerege koita maḡe iana vani naḡate abaga ḡahisa erehuta iau Mame va oḡova abage naḡate. Ia ihikote ḡahege ihiahe! 44 Va basileia vara erehuta iaḡa maḡe be vata uhura abatemenu, koita be raki behuḡare; gerege auki heḡirita oti inuhati haevare mati ḡoiraḡi oti negu mata e haevisa. 45 “Riaḡa, va oḡo vara erehuta me maḡe ata be gure muni damu ketake iaḡoi haevisa; 46 gerege auki be behuḡare auki oti au ḡasina iaḡaniva inuhati haevare renu auka negu muni damu ketake auka 47 “Riaḡa, va oḡo vara erehuta reke naḡate mi eve kirai karava nune nune reke butugei; 48 gerege reke tobo raḡege, iauki butui oti gohu ḡaika gurahi, renu karava maḡeva idigei boteka bei ḡosigei edube daureva iabara idigei ḡeahu kira gevenu. 49 Eige onakime iauna netu netua kisa. Aneru iana ugu raḡohi oroḡime iauna koita maḡe iau uhura ḡuma daure ḡahavaia kasa geisa 50 renu iauna idigei vene bubuka uhura kiragei, iauna niḡo raḡohi iau eḡie gi raḡohisa. 51 Iesu raki au ḡamituhe beragei, “Iana iaḡa o inuhati iai uhure iana bao raḡohanu? Iauki ronu, ‘Erege.’ ” 52 Eige auki boriti ḡahigei ronu, “Gerege ia aena ḡaha iau ia uguro ḡahigei va basileia aena iakamu erehuta iaga biava au iaḡa maḡe ḡosiḡare ei oreana isaḡe mati oreana emene idigei hakivi ororo vara.” 53 Iesu raki badigomu rogei kosavare, auki ḡare gevenu. 54 Iesu raki ḡoiraḡi au oḡehe otime auki dubu uhura koita uguro ḡahi gevege, iauki ihi ḡaḡu raḡohi mati berabe raḡohi, “Oreigena ata o uhuvaka o mati hedo o idigevenu? 55 Ona beta iaga ḡoiare atava moenu? Au neine ihe na Maria? Mati au ḡoḡuhe iabara Iakobo, Iosepa, Simona renu Iuda? 56 Renu ona au amakine iana o no ruḡa? Gerege oreigena ata o iaḡa o inuhati idigevenu?” 57 Gerege iauki besibe ḡahanu. Eduge Iesu raki boriti ḡahigei, “Peroveta ḡahava iauka matau ḡahi gevara eduge iau oḡo riaḡahe mati au iaga ḡahatuhe iau gera veitera.” 58 Iauki ei riaḡa ḡahiḡa veite, eige auki hedo me dadaḡa kiogeige veite.