¹ Vani aena beige Iesu mati au ḡamituhe ruḡa geraki koni ḡeḡe uhura oḡi otege; au ḡamituhe iaberaki ḡubu raḡohime iauki koni koboka kinivi iogevege. ² Faresia ḡaha iaberaki eragei, iauki Iesu kironu, “Eraḡa, ai ḡamituhe iabara sabadi vani aena ora iauki hosaḡi onaki kia.” ³ Iesu raki boriti ḡahigei ronu, “Iana dahida veitenu Davida mati au ḡamituhe ruḡa ḡubu raḡohi kinu? ⁴ Aukamu otime auki dubu uhura sirivare auki parao aena mi inu, eramu aena vara au se au ḡamituhe iabera beta ivara, edube dubu biava iana iavaḡu isa. ⁵ Se iana aena dahida veitenu dubu biava ḡainage aena hosa gevenu eduge iauka iaḡa be iau ada roro veitera. ⁶ Dakamu iaki roma, iaḡa aena ketake be ramu oigera beta dubu ra. ⁷ Eduge iana buka aena Dirava gare rone maka riaḡava manu, koita iaberamu vaḡahu raḡisa beta de bubu dainehe, aka beta maḡe koita be mi iau daureve roro vara. ⁸ Maka vara Koita Ḡamika vara vani aena rohi vara.” ⁹ Iesu raki ei urimime auki iau dubuve otinu; ¹⁰ eigera ata bera adakava ra hoeke, gerege koita iaberaki beraḡanu, “Ona beta aena vanu a sabadi vaniva dika maḡe ḡahare?” gerege iauka au aena dodo vane eige iauka mi aena ḡaha mohigeisa. ¹¹ Iesu raki boriti ḡahigei ronu, “Iana be na au mamoe kobuḡave sabadi vaniva oti aba uhura ariraḡare auna beta ada inuḡi mi butui hakiha vanu? ¹² Koita be maḡurive ramu beta mamoe ruta ḡereḡere veitera! Eige ḡuma ora beta sabadi vani aenava auki dodo vima edube ḡuma maḡe koita bei kiare eramu maḡera.” ¹³ Gerege Iesu raki ata e kironu, “Ai ade inuḡa.” Auki au ade inuḡare, gerege au ade raki ḡoiraḡi maḡe ḡoinu, erehuta au ade hakirava naḡate. ¹⁴ Eduge Farisea ḡaha iaberaki hakiraḡi otime iauki Iesu ḡamiḡa ḡumava iaḡovege, iauna orenaki ḡami hoekisa. ¹⁵ Iesu raki iau uhu anana iauka au ḡamiḡa ḡumava iaḡova gava ihinu, auki ḡare gevare ḡeahu otinu. Edube koita dadaḡava raki au itahe otinu, gerege auki iau dikave inuhati maḡe ḡahi gevege, ¹⁶ mati auki ḡanito ḡahigei iauka beta koita be iau au gare raḡisa. ¹⁷ Eige au onaki rone era Dirava gare rone Isaia peroveta koitava raki riaḡa ḡahanu: ¹⁸ “Ihiahe, ora da di besubesu koitave rone era, ora di moera, di soruke ra au maḡera. Daka di horuve mi au ada maemisa, gerege auka mai ḡuma gava koita nune nune inuhati boriti ḡahi geisa. ¹⁹ Auka beta enana visa se bara visa, se bera beta orogo au enoḡe ihisa. ²⁰ Auka beta tiru adaka be bokobo vara se vene agota beta ḡodo ḡahiḡa vara enakime auna ate mai ḡuma riaḡa koita iau mi oroḡisa. ²¹ Renu koita inuhati gena uhu anana maḡe riaḡa au ihehe misa.” ²² Gerege iauki Iesu gasina atabe sua daure au uhura nisiḡami oroḡanu auka ni veite mati ga veite; gerege auki maḡe ḡahanu, eige ga veite raki gavi renu niḡa niḡa vima. ²³ Koita inuhati oroḡane iaberaki ḡaḡu raḡohanu mati roege, “Ora mena Davida Moera?” ²⁴ Eduge Farisea ḡahavaia gava ihine, iauki ronu, “Ora sua daure iau baugete Belsebulo avaḡu gena sua daure oiagei hakivisa.” ²⁵ Eduge Iesu ra yau uhure dibanara eige auki kirogevenu, "Ogo bauge aubougi yavahu bebe hogagevege yauka beta kobabera, ogobe se yagabe avahu hogoiare era beta ramira mege Vivira. ²⁶ Satan avahu Satan besibe gahege, auka beta kobabera. Au negu baugevena negu orenaki ramira berebe vanu. ²⁷ Gerege ia roiare daka sua daure oia geima Belsebulo hedokehe. Ama ia iavaḡu gena iana unuhu hedokehe gena ia oia geve? Eige ia au itahe oḡiare iai gare ramu iai ḡumaḡe ḡaḡae kisa iaka beta ieriri vera. ²⁸ Eduge riaḡa vara daka Dirava Horu hedokehe daki sua daure oia gevenu. Eige noma eraḡisa Dirava basileiave ramu subuta ge auki oroḡonu. ²⁹ Se koita bera beta riaḡahe ata herote be iage hosaḡi sirivi au kohue vahoro ididi vara, se auna beta urigoi ata e raroi maema vanu? Gerege auna au iaga kohue vahoro idiḡisa. ³⁰ Unuhuna da itaḡatuima auka dakera auki da betia ḡahima, mati unuhuna da iaheḡi bougeige veite auka Dirava auge auki oia geima. ³⁶ Edube iakera daki ia kiro geima, berabe vaniva koita iaberamu Dirava vaḡotoni oroḡi iau ga maka veite ro gevenu kiroro vara; ³⁷ eige ai gare raki a maḡe ḡahisa, mati ai gare raki a daure ḡahisa.” ³⁸ Gerege aena ḡaha be ia mati Faresia ḡaha iaberaki kironu, “Ni Biage, noka gahara raḡohi akai iaḡa be kiege noma eraḡisa. ³⁹ Eduge Iesu raki kiro gevenu, “Eige ḡuma daure kiare mati ga ihihi veite tau o gahava iabera ḡahara raḡa iauka toa be eraḡisa. Eduge Dirava vara beta eravaḡa nune be kiki vara kobabe au peroveta Iona au ḡaḡae kine eḡu gera. ⁴⁰ Gerege ḡuma kobuḡa eige Iona ramu vani abigaḡa mati vahi abigaḡa ge auki karava ketake vaḡatane uhura, e naḡate Koita Ḡamika tage ramu vani abigaḡa vahi abigaḡa ge auna vata uhura guramisa. ⁴¹ Eige Nineva koitavaia mati negu tau o ḡahava iaberamu berabe vaniva urihi ia toho geige vara. Maka vara iauka Iona peroveta viege iauki iau daureve uhura ge iauki ḡoiraḡohanu. Renu eraḡiahe, oroḡare iaḡaniva ramu raho ketakera Iona variada gera! ⁴²  Mata ḡamana iau rohi maḡiva ramu ḡamanava urimi berabe vaniva oroḡi tau o ḡahava ruḡa ia toho geige vara, badiva auka mata ḡamana auki oroḡonu auka Solomona uhuvake gava ihisa. Renu eraḡiahe, iaḡa raho ketake be Solomona variada geramu onu! ⁴³ “Sua daure be koita be ḡaremare, auka eia veite matahe ioai au vaḡaroro taruhe iaḡoia vara, eduge auka beta be behube vara. ⁴⁴ Gerege auki roma, Daka ḡoiraḡi da guramege oḡohe. Auka ḡoiraḡi oḡova eraḡege ahake, momo veite, renu iaḡa inuhati ḡosigei maḡe ḡahanu. ⁴⁵ Gerege auna oti sua daure iatiriḡa au naḡate veite nisigei oroḡisa iauka au ruta ei gurahisa; renu negu ata e au uriḡoi daureve ramu avie edube ihie oramu raho ketake. Eige negu tau oi ḡuma daure oramu raho ḡoiḡo vara beta uriḡoi naḡate. ⁴⁶ Iesu gure koita gaḡa gevege uhura, au neine mati au ḡoḡuhe iabera itahe rahirahe, iauki imimi raḡi iauka ga ḡahisa. ⁴⁷ Gerege koita be raki kironu, “Ni ḡaha ai neine mati ai ḡoḡuhea vire itahe rahane, iaukamu a ga ḡahisa.” ⁴⁸ Eduge Iesu raki boriti ḡahane kironu, “Unuhuna di neine, renu oḡorea iana di ḡoḡuhea?” ⁴⁹ Gerege auki au au ḡamituhe iau ada susutemi, ronu, “Eraḡiahe o iaberamu di neine mati di ḡoḡuhe iabara! ⁵⁰ Ana unuhuna di Mame vava guramare, roiare meva kiare iaberaki riaḡa di ḡoḡe mati di amakine, mati di neine.”