¹  Nega kobuḡa eige koita bea eige iaberaki Iesu boriti ḡahanu, Galileia ḡaheva bea Pilato ḡahi gevene iau taoke ramu iau aena ḡahane e ruta ge iauki kobuḡa ḡahanu. ²  Iesu raki bera gevenu, “Ia anavare Galileia ḡaha onaki huhu mane eige iauka iavaḡu daure ḡahe iabera edube iaka veite? ³  Akera daki aki roma veitera; eduge iama iai ḡuma daureve ḡare geisa, veite ḡoiare iakamu iau kine naḡate iai bouge veite ḡahiga vara. ⁴  Se koita utube hakira abuḡu veite hoḡe raḡohane Siloama iaga ada desu raḡohane, ia anavare iauka Ierusalema uhuḡatu uhura iau iavaḡu gera daure ḡahaia? ⁵  Akera daki aki roma veitera; eduge iama iai ḡuma daureve ḡare geisa, veite ḡoiare iakamu iau kine naḡate iai bouge veite ḡahiḡa vara.” ⁶  Gerege Iesu raki badigomu be kiro gevenu: Ata be raki au ḡeḡehe idi be beḡenu; renu auki oti eraḡi auna madika kinu edube auka so maka kiki veite. ⁷  Gerege auki ḡeḡe kiki koitava kironu, Eraḡa! Dakamu tau abigaḡa ge daki oroḡi idi o eraḡi auna madika kinu, edube auka maka kiki veitera. Ama dodovisa! Esemena auka maka veite auka mata tobo ḡahi ramima? ⁸  Auki kironu, Di Biage, da so tau kobabe tage ḡaremi, dakena ḡaikava rohi oriḡare dana vateta isaḡe be mi ḡaikahe bohuḡisa. ⁹  Au tau isaḡeva maka kiege, era maḡera; eduge au maka veite ḡoiege, iama dodovisa.” ¹⁰  Iesu raki sabadi vani bei dubu haroro viege. ¹¹  Gerege maḡi bera oḡiḡi maḡe veite tau utube hakira abuḡu veite. Auka ḡorumime auka oḡiege auka ḡereḡere veite urimi ramisa. ¹²  Iesu raki niḡahi eraḡare auki ihiromare kironu, “Di mae, ai dikave ramu maḡe ḡoinu.” ¹³  Auki au ade mi au ada maemi, auki inono veite urimi ramare auki heḡiri vi Dirava maḡe ḡahege. ¹⁴  Eduge dubu biava iabeki, hoḡahi badiva Iesu raki sabadi vaniva dika maḡe ḡahi, edube iauki gure koita gaḡagei roege, “Noka vani agorokiva ge nona me misa; vani eiau gena iana oroḡege auna ia maḡe ḡahigeisa, edube beta sabadi vaniva." ¹⁵  Eduge Rohi Bauge raki ga ḡahi onaki ronu, “Avaunage ḡahavaia! Iana beta sabadi vaniva iai ada vasivave nisigami otito vanu eia moimisa? ¹⁶  Eige maḡi ona, auka Aberahamo maera satani raki bodivanu tau utube hakira abuḡu veite, nona beta bodivi uiare iaḡaniva sabadi vani oi au vahe vanu?” ¹⁷  Iesu onaki roege, namina raḡege ḡaheva inuhati iabeki variva raḡohi; renu koita inuhati gera heḡiri ḡahege au gure me maḡe kiege dainehe. ¹⁸  Auki onaki ronu, “Dirava basileiave na orena kikivenu? Renu dana negu otavado iaḡa be ruta ḡere ḡere ḡahiḡa vanu? ¹⁹  Auka idi tahaka kusinaike naḡatera koita be ramu miare mi ḡeḡe beḡima; aukamu kobo raḡi idi ketake ḡoima, renu uguha vava huraḡohare iabera atiahe iau guragu iage kiki vara.” ²⁰ Gerege auki ḡaitana ronu, “Dana otavado be mi Dirava basileiave ruta ḡere ḡere ḡahisa. ²¹  Auka maḡi beraki bega parao ḡadikiva mi parao souka uhura bohuḡi kobuḡahi atege aumu omo raḡima.” ²²  Iesu raki Ierusalema otisa rome auki oḡo inuhati iau sirivege hari maḡe ro otege. ²³  Koita be raki beraḡanu, Rohi Bauge, ona koita rore beḡu gena maḡuri raḡisa?” Auki kiro gevenu, ²⁴  Ama hero kime ana ḡuma kibobove ei sirivisa; dadaḡa iau gera, daki roma, iauka hero kisa eduge iauka beta riaḡahe siri raḡira vara. ²⁵  Negu iaga biava urimi udua kouare, aka itahe rami to rosa, Di Rohite, ni uduane baova, gerege auka ia kiro geige vara, Daka dibana veite iana orei gena ia oroḡonu. ²⁶  Gerege iauka aki roro vara, “Nokamu aruta ge noki tamuta raḡohi, renu amu badi maḡe ni orogohe roege. ²⁷  Eduge auka aki roro vara, Daka dibana veite iana oreigena ia oroḡanu; oi ḡeahu otiahe, iaka ḡuma daure kiare ḡahava iabeki! ²⁸  Iakamu negu Dirava basileia uhura Aberahamo, Isako, renu Iakobo mati peroveta ḡaha iau bouge eragevare, iakamu niḡo raḡi mei matogei, edube iaka iavaḡuge iaki itahe raha. ²⁹  Gerege koitaia vani ḡadiḡa mati vani ugugu oroḡare, mirigini mati iaha kasiva oroḡare, iauka Dirava basileia uhura tamuta raḡira vara. ³⁰  Riaḡa, ia be ihie ḡahare iabera uri ḡahisa, renu bea uri ḡahare iabera ihie ḡahisa.” ³¹  Vani eige Faresea koita be iabeki Iesu ḡasina roḡahare kironu, “Ama oḡo o ḡaremi otisa, Heroda ramu a ḡami hoeki uhuva auki kima.” ³²  Iesu raki kiro gevenu, “Oti di gare kiro iahe, Eraḡa, daka negu mati vahiḡu dana di meve kisa sua daure oiageisa mati dika maḡe ḡahi geisa, vani abigaḡa ḡahiḡahe dana di meve kiege kosa visa. ³³  Eige negu, vahiḡu mati vahiḡu tahege dana di ioave otisa, badiva peroveta koita bera beta so Ierusalema hakiha veite auka itahe hoḡe raḡisa. ³⁴  Ierusalema, Ierusalema, peroveta ḡaha ḡahi hoeki gevege gahavaia, renu besu gevege ḡahavaia muni tahu ḡahigei oia gevege! Dana so iai ḡamuhe inuhati bougevare erehuta uguha au akahinehe bouge vare, eduge iaka enaki roro veitera! ³⁵  Eraḡa, akamu avaḡu iaga tera. Mati daki roma, aka beta da erara ate vani be roḡege ana rosa, Dirava ihehe oroḡare vire maḡe ḡahi iahe.”