¹  Koitaia dadaḡa gure bouraḡohi, renu bebe iau haiaḡahege uhura, Iesu raki au ḡamituhe uriḡoi uguro ḡahigei, "Iama Faresea ḡahe iau ga ḡumaḡe eraḡisa, eramu iau tarata ḡumaḡe iabera, ia negu iau itahe otime. ² Iaga be ḡoḡohu gena iau maemanu auka ḡaḡae ḡoiḡoara, renu iorena iaḡa be tage auka ḡaḡae ḡoiḡoara. ³  Eige ana vadibua otavado a ronu auka vani ihihi vara, renu ana iorena iaga uhura otavado a ronu iauka iagahu rahi gava raḡira vara. ⁴  “Riaḡa vara di vasiruhea, ia negu hoeke gurahare siḡa geima, iauka beta iaḡa be ihie kiki vara. ⁵  Eduge iakera daki ia huguro ḡahigei iana unuhu siḡamisa: auka hedokate koita be maḡurive misa, renu mi vene uhura kiravisa. Riaḡa vara, daki roma, iama siḡamisa! ⁶  Gerege iauna uguha adakasiva beta damunava toea abuva haevisa? Edube Dirava vaḡotonihe auka beta be vagua ḡahiḡa vara. ⁷  Edube iai omo hanakava ḡainage aukamu dahi gevenu. Ia negu siḡo raḡime; iaka au vaḡotoni iaḡa raho vara beta uguha iau naḡatera. ⁸  “Eige daka roma, iana koita be iau gena ia da riaḡa gaha, Koita Ḡamika tage Dirava aneruve iau vaḡotoni ia riaḡa ḡahiḡa vara; ⁹  edube iana unuhuna da riaḡa ḡahiḡa veitenu koita iau vaḡotoni, ia ḡainage Dirava aneruve iau vaḡotoni daka beta ia riaḡa ḡahiḡa vara. ¹⁰  Renu unuhuna Koita Ḡamika ga daure ḡahima auka au daureve vagua ḡahiḡa vara; eduge unuhuna Horu Aena ga daure ḡahima auka beta vaḡahu ḡahiḡa vara. ¹¹  Eige iauna ami orogi dubu biava iau renu aena ḡaheva iau vaḡotoni, a negu uhu korahivi ana orenaki ga visa se ana otavado rosa; ¹²  edube Horu Aena vara a huguro ḡahi ana vani ei otavado roro vanu." ¹³  Koita be raki koita iau nomuaka gavi kironu, “Di Biage, di ḡoḡe kiro au ni mame niabu noni iaḡa ḡare gevene kasave. ¹⁴  Eduge Iesu raki kironu, “Vasi, unuhuna roma daka iai berabe koitava se iai kohue biava ḡoisa?” ¹⁵  Mati auki kiro gevenu, “Iama eragisa ia negu ahata maka iaḡa nune nune raho ḡahi maḡe ḡahime; badiva koita bera beta au ada bubu maḡe maḡuriva auki vima.” ¹⁶  Gerege auki badigomu be kiro gevenu: “Ata bera ada bubu mati makava maḡeva tage dadaḡa auki kinu. ¹⁷  Gerege auki au uhurehe anana viege, Dana otavado kisa, di demake ramu ḡosiḡo iaga veitera? ¹⁸  Gerege auki ronu, “Daka onaki kiki vara: daka demaka iaga o seboḡare dana ga vara vake iaga ketake be ḡosa, eige dana di demake mati di kohue inuhati ḡosigeisa. ¹⁹  Renu dana di sorukehe onaki anai rosa, “Dakamu tau dadaḡa otine iaḡa maḡe dadaḡa daki ḡosiḡanu; eige dana deḡaia guramare, dana heḡirita iogeisa.” ²⁰  Eduge Dirava raki kironu, Ana kavadinu! Negu vahi oi dakamu ai maḡurive ai ariari vara. Renu a iaḡa bougevene, auna negu unuhu ie ḡoiḡo vanu? ²¹  Eige a iaḡa maḡe bougevene era iavaḡu aiera edube era beta Dirava auni gera." ²²  Iesu raki au ḡamituhe kiro gevenu, “Eige daki roma, ia negu maḡuri dainehe uhu korahi raḡime, ana otavado isa, se ana otavado bodivisa. ²³  Badiva maḡuri vara iaḡa raho vara beta demaka, matir ahatatane ra aena beta a ogona bodivare era. ²⁴  Iama gaioka eraḡeisa: iauka beḡibe veite mati rohiro veite, renu iauka demaka ḡosiḡo iaga veite, eduge Dirava ramu vasi geima. Akamu iaga raho vara beta uguha iabera! ²⁵  Iana bena uhu korahi vima au maḡuri tuake uhura so tinabe ege ḡahisa? ²⁶  Gerege ana beta riaḡahe iaḡa avie be vire nagate kiare, esemena a gure iaḡa be iau uhu korahiva vima? ²⁷  Ana madika maḡe vire eraḡima, orenaki gena iau raho ḡahanu: iauka vaḡava veite se me be kiki veite; eduge dakamu ia kiro geima, Solomona tage au guragu maḡe inuhati uhura auka ogona eravaḡa onakikive be bodibo veitera. ²⁸  Edube Dirava negu vata ḡati o maḡuri ḡahi gevare, auka neguge maḡurive mati vahiḡu gera auka mi vene uhura kiravisa, aka auna orenaki a maḡe ḡahisa. kava ihihi avie ianu! ²⁹  Eige a negu uhu korahi vime ana otavado iare se ana isa, renu a negu gure uhu korahiva vime. ³⁰  Era vata ada o ḡaheva iabera iaḡa o inuhati iaḡogeva, eduge iai Mame ra dibana ora ia uhu korahiva raḡare iaḡani vara. ³¹  Edube iama Dirava basileiave iaḡoisa, gerege iaḡa o inuhati gainage auna a moimisa. ³²  “Koita avie ia, ia negu siḡo raḡime, badiva ora iai Mame raki riaḡa ḡahanu au maḡeve ia mohigeisa. ³³  Iama iai kohue haegeisa, renu damunava mi goroa be mohigeisa. Iama maema iago maḡe kisa au negu dariḡohime, erehuta vava kohu ḡosiḡare iau naḡate, eigera vaho koita bera beta sirisi vara, renu pitoroko beta daure ḡahiḡa vara. ³⁴  Eige oreigena ai kohue a ḡosiḡanu, ai soruke ramu eigera. ³⁵  “Ama ai vaḡatane berebe ḡahisa renu ai ni abage ramu raḡiraḡe ḡoisa; ³⁶  erehuta iau biage uhuiami headava rigiva seni ḡoiraḡare, eige au oroḡi uduani rami toege iauna au uduane baovisa. ³⁷  Eige ni tabata ḡahevaia iaḡohia veite iau biage uhuiami gurahare iabera maḡera; riaḡa daki roma, auka so au vaḡatane berebe ḡahare iau oriḡi gurami iau ruḡa tamuta vara, renu auka roḡi iaue tage kiki vara. ³⁸  Auna nemehe se vagutu kasihe gena au oroḡimena au era gevenu, iauka maḡeva mimi vara. ³⁹  Edube iama eraḡisa: iaga biava dibana vaho koita oroḡare dibananu, aukamu au iage eraḡi eige vaho koita vara beta au iage hosaḡi ḡadiḡa vara. ⁴⁰  Eige ia negu vagua raḡime, iama gurahi Koita Ḡamika oroḡare vaniva iama uhuiamisa.” ⁴¹  Petero raki beraḡanu, “Rohi Bauge, ana nonige a badigomu oroma se koita iau bouge ḡainage?” ⁴²  Rohi Bauge raki kironu, “Gerege unuhuna ihihi mati ni tabata koita maḡe vanu eige au biage raki maemi auka au me ḡahetuhe ni tabata ḡahigeisa, renu vani inuhati iau damune demakava mohigeisa? ⁴³  Negu ni tabata koita eramu au me miare uhura au biage ramu oroḡi eraḡare auna maḡe ḡahisa. ⁴⁴  Riaḡa daki roma, enaki era auka maemi au kohue inuhati ni tabata ḡahiḡa vara. ⁴⁵  Eduge negu ni tabata koitava raki au uhurehe roege, Di biage ra so beta vaina ḡoiraḡira vara, gerege aumu urimi au me ḡahetuhe ḡahigei, atavami renu maḡiva ia, mati iaumu tamuta raḡi renu ḡadiki daure tage iare ate omo daureva ḡahisa, ⁴⁶  auka dibana veite vaniva mati negava au biage ḡoiraḡare, eige auna gami dodoi abu ḡahi, auna miare ihihi veite ḡaheva iau ḡasina maemisa. ⁴⁷  Eige negu ni tabata koita vara au biage ḡahara viare iaḡani dibanara, edube auka uhuiamia veite, eige auka huhu raho mimi vara. ⁴⁸  Eduge koita be dibana veite edube au kine huhuva mane auka huhu avieva auna misa. Eige iana unuhuna ia tina beḡu au ia mohigevenu, iaka tina beḡuge iana misa; mati unuhuna au riaḡahi dadaḡa moimanu, auka tinabe dadaḡava auna misa. ⁴⁹  “Da vata ada oi oroḡane ra vene daki moroḡanu, renu auna so raḡi bubu naḡare! ⁵⁰  Daka so babatiso mimi vara, renu daka beta guragu maḡe ate meva kosavege! ⁵¹  Iai ananave da vata ada oi oroḡane iai maive da moroḡanu? Veite, daka roma, kasa kasava daki oroḡanu! ⁵²  Negu oti iaga beige koita adakasiva gurahare iauki kasagei, abigaḡa gera abu enana ḡahisa renu abu gera abigaḡa enana ḡahisa; ⁵³  onakime iauna kasageisa: mama ramu au moe enana ḡahisa mati ḡami mova au mame enana ḡahisa, neina ra au mae enana ḡahisa renu ḡami maḡi vara au neine enana ḡahisa, varu maḡiva ramu au vare maḡiva enana ḡahisa renu varu maḡi avie ramu au vare maḡiva enana ḡahisa." ⁵⁴  Auki koita gaḡagei ronu, “Ia negu va eraḡi au vani uguhare seni dubuiamege, iaka inono veite roro vara, Veni ramu ḡoroḡo vara; gerege aumu ḡoro mima. ⁵⁵  Se ia eraḡi eve seni nono ḡuguima, Vani ramu hedoka ḡoiḡoara; gerege vani ramu hedokate ḡoima. ⁵⁶  Tarata ḡaheia! Iaka riaḡahe va mati vata ada o toaḡava eraḡare gava raḡira vara, eduge esemena ia negu nega o toaḡava gava raḡira veite? ⁵⁷  "Renu esemena ia beta iavaḡu berabe raḡi orena ieririve? ⁵⁸  Eige, a enana ḡahare koitava ruta berabe koitava ḡasina otare, iama ḡumaḡa otare iai gare ieriri ḡahisa, se veite goiege iauka ami berabe koita vaḡotoni oroḡi, veite ḡoioge iauka ami vadibu iagava a kira kira vara. ⁵⁹  Eige daki a boriti ḡahima, aka beta vadibu iagava hakiha ate a damuna inuhati kiege kosavege."