1
Di vasire Theophilus, Koita dadaḡava raki subuta iau vaḡotoni kiege meva eragevene iauki idigei reḡunaki bukava maemanu.
2
Erehuta au gare ḡanai mi ioa ḡahege renu eraḡane ḡahava iaberaki mi no mohi gevenu.
3
Da tage dakamu ananai, da ḡanai iaḡo iaḡo vane itaharahe, daka bukava reḡunaki ani maemisa, Teofilas di rohite,
4
eige ama anaisa, otavado na a koita iau ihinu renu dibana ḡoinu iabera riaḡa vara.
5
Heroda nega ei Iudea iau Rohive, aena atabe ihiva Sakaria, auka Abiah dubu aena ḡaha iaugera auki oroḡanu. Au mabare ihiva Elisabeta, auka Arona varavege auki oroḡonu.
6
Iauka Dirava vaḡotoni iau abu ieriri ḡaheva iabaki, iau maḡurive raḡoha iauka Rohi Bauge aenave renu au ḡumaḡe iauki ḡurahege.
7
Eduge iauka ḡamika veite, badiva Elisabeta ra gabani dainehe, edube iaukamu iau abu ate iahu ḡahanu.
8
Sakaria nega ei dubu ḡahava iau ruḡa Dirava vaḡotoni iauki me miege,
9
gerege iauki iau bouge manu, iauka dubu aena ḡaha kiege ḡumahe, ana dubu aenava gena a sirisi vanu aka meva tage kikivara, iaḡa ḡutika maḡe be mi Dirava moimisa.
10
Negu me aena kiare, koita dadaḡa gainage, itahe ge iauki imimi raḡege.
11
Gerege Rohi Bauge aneruve be raki ḡaḡae ḡoi, terona vamaḡa kasihe ramirame.
12
Sakaria raki niḡahi eraḡi soru raka; mati siḡoi.
13
Eduge negu aneru eraki ga ḡahi ronu, “Sakaria, a negu siḡoime, ai imimive aukamu ihinu. Ai mabare Elisabeta so ḡami be mimi vara, renu ama ihivami Ioane rosa.
14
Iaka heḡiri raḡira vara, renu koita dadaḡa ḡainage au ḡuruane heḡiriva raḡira vara,
15
badivara auka ihite ḡoiḡo vara Rohi Bauge vaḡotoni. Auka beta ḡadiki berebe misa; mati auka so vaḡatani, Horu Aena vara au ruta.
16
Aukena Isaraela koita dadaḡa idigei ḡoiraḡisa, Rohi Bauge iau Diravate ḡasina.
17
Auka Elia hedokehe auna Rohi Bauge vaḡotoni oti, iahu iabera iau ḡamuhe ruḡa kobua ḡahisa, renu anana daure ḡahaia iabera anana maḡe misa, mati koita be iau ḡumaḡe maḡe ḡahisa Rohi Bauge uhurehe.”
18
Sakaria raki aneru beraḡanu, “Dana orenaki riaḡa gahisa? Da di mabare ḡore nokamu iahu ḡahanu.”
19
Aneru raki kironu, “Daka Gabriela, Dirava ihehe daki oroḡanu, renu aukaki da besuḡi daka hari maḡe a boriti ḡahisa.
20
Aka di gare riaḡa ḡahiḡa veitera, eduge vaniva riaḡa miare, aka keriḡoi, mati aka beta ga be roro vara, ate iaḡa o iabera ḡaḡae ḡahiḡa vara."
21
Koita inuhati dubu itahàrahe Zechariah uhuiami gurahege auka aneru ruga ge auki dubu uhura ga ragege.
22
Au hakiha vane, auka gaḡa geige veitera, gerege iauki dibana ḡahanu auka niḡa niḡa bera auki vanu. Auka daḡedaḡe ga veitera, eduge ada tahu ge auki gaḡa gevege.
23
Au meve basu basuva miege, auki bina dubu ḡaremare au iagehe otinu.
24
Negava ḡamana veite au mabare Elisabeta ra detu ḡoinu, gerege auki bata adakasiva hatai guramege.
25
Auki onaki ronu, “Onakime Rohi Bauge dai kinu, au da maḡe ḡahi au koita iau vaḡotoni di varivave ariḡanu.”
26
Bata agorokiva miege, Dirava raki aneru Gabriela besuḡanu Nasareta oḡo ḡamika be Galileia otinu,
27
auki mabi be ḡasina auka imiḡisa auka atabe ihiva Iosefa mobo ḡahisa, auka iau vahie Davida tene ge auki oroḡonu. Negu mabi e ihiva ramu Maria.
28
Negu aneru eraki au ḡasina ḡaḡae ḡoiare auki kironu, “Au maive ma, akera auki a maḡe ḡahima! Rohi Bauge ra aigera.”
29
Maria au gare ihinei au uhure raki isuhanu renu ananavi ona otavado maḡeve au roma.
30
Eduge negu aneru eraki kironu, “Maria a negu siḡoime, Dirava maḡeve aigera auki maemanu.
31
Aka so detu ḡoi ḡami be mimi vara, renu ama ihiva rosa Iesu.
32
Auka baugera mati iauka ihiva roro vara auka Dirava Vava Vava uiare Moe. Auka Dirava ni Rohite ena mi au koitatuhe iau Rohite kisa au tene David nagate.
33
Auka Jacob gamuhe urigatugei oti behi behi. Auka rohi goi oti behi behi!"
34
Gerege Mary raki aneru kironu, "Ona negu orenaki goigo vanu, dakamu so mobo veitera?"
35
Aneru raki kironu, Horu Aena vana ai gasina orogisa gerege Dirava hedokena a godomisa. Eige a gami karuka miare eramu aena vara, renu ama rosa Dirava Moe.
36
Elisabeta ai tate tage ramu iahu uhura gera ḡami be mimi vara, renu auka roma auka gabani edube au batake ramu agorokiva gera.
37
Dirava augera iaḡa bera beta berebere ra.
38
Gerege Maria raki kironu, "Dakamu Rohi Bauge besu besu maḡi vera, au enaki kikive ḡoiege a rone naḡate." Gerege aneru eraki ḡare manu.
39
Maria raki vani ei urimi auki Iudea nimu ḡaika oḡova bei otinu,
40
eige auki Sakaria iagehe ḡadimi auki Elisabeta maḡe ḡahanu.
41
Elisabeta raki Maria maḡe ḡahane gava ihine negahe, au ḡami karuka raki vaḡava vanu au vaḡata uhura. Horu Aena tage raki tobo ḡahanu,
42
renu nivi barai roege, “Dirava maḡeve ra aigera maḡi iau bouge iau vaḡa, renu ai vaḡata make ramu maḡera.
43
Renu esemena au onaki dai kima, riaḡa di Rohite neine ḡoiḡo aumu dai roḡonu?
44
Badiva daka ai ga enoḡe maḡeva ihinu, ḡami karuka di vaḡata uhura vaḡava vanu.
45
Maria ra Rohi Bauge raki maḡe ḡahanu badiva au rone gava aukamu riaḡa ḡahisa.
46
Gerege Maria raki ronu: “Di soruke ra Rohi Bauge auki motea ḡahima!
47
Renu di uhure tage Dirava daki heḡiri ḡahima, auka ni maguri gahiga vera.
48
Badiva daka au besubesu maḡine auki goroa uhura da vagua gahiga veite. Eige
riaḡa negu oti tau inuhati uhura koita iabera roro vara Dirava raki da mage ḡahanu.
49
Eige iauka roro varà, badiva auka iaga ketake kiogevene Dirava vara, auka Hedoka Kobuga, raki iaḡa ketake dai kinu. Au ihe ra aena!
50
Au vaḡahuve ra siḡamare ḡahavaia inuhati iaugera negu tau oti behi behive.
51
Aukamu au herove au adehe ḡaḡae kinu; iau uhurehe uhu anana nune raḡare ḡahavaia iaukamu kobakoba ḡahanu.
52
Aukamu iau biaguhe baugeva iau guragu gabuhe vaḡava ḡahi gevenu, renu goroa idigei iage gevenu;
53
aukamu ḡubu raḡohare toboḡa gevenu iaḡa maḡe iau, mati iaḡate ḡahavaia aumu ada unaḡe ḡeahu besu gevenu.
54
Aukamu Isaraela au besubesu ḡahatuhe auki iahe gevenu, au vaḡahu ḡahi gevene iauki anavava,
55
renu au ominue kine ni vahiruhe iau,
Aberahamo renu au vahiruhea iau oti behi behi.”
56
Gerege Maria raki Elisabeta ḡasina bata abigaḡa gurami ihiege auki ḡoiraḡanu.
Ioane Babatiso Guruane
57
Elisabeta huhunaḡi ḡami misa vanihe, auka ḡami bera auki manu.
58
Au oriḡi uiare ḡahava renu au oḡo nanuhea iaberaki ihinu Rohi Bauge eramu maḡe ḡahanu, iauki au ruta heḡiri raḡoheg
59
Vani agorokiva ḡahiḡahe iauki bouraḡohi ḡami karuka ihiva kisa, renu iauka mi au mame ihiḡote kisa Sakaria rosa.
60
Eduge au neine raki ronu, “Veitera; au ihera Ioane ra.”
61
Iauki kironu, “Ora beta ai oḡo nane be ihera.”
62
Gerege iauki au mame ada tahu beraḡi auna ḡami karuka ihivana unuhu roro vanu.
63
Auki kirogei iauka iaḡa be moroḡoge auka ihiva maemisa, “Au ihera Ioane.” Gerege iauki iau bouge ḡaḡu raḡohanu.
64
Tutube viege au avaḡe raki baoraḡi renu au meine tage maḡe ḡoi, gerege auki gavare, Dirava motea ḡahege.
65
Au oriḡi ḡahava iau bouge siḡo raḡi, badiva iaḡa oramu iaumu gava raḡege Iudea matava oḡova inuhati iauki ro ioa raḡege.
66
Badi o ihine ḡahava iau bouge ga raḡi roege, “Gerege ḡami karuka ona orena kikivenu?”
Riaḡa vara, Rohi Bauge ade ramu au ada renu au ḡasina tagera.
67
Gerege Horu Aena raki ḡami karuka mame Sakaria au avaḡehe gavi roege:
68
Rohi Bauge Isaraela iau Diravate noma maḡe ḡahisa, 0badiva aukamu au koitatuhe maḡe ḡahi gevare mati maḡuri ḡahi gevenu,
69
aukamu koita be noni raho ḡahanu
Davida au besu besu atave iagehe,
70
auki subuta maḡuri raḡege peroveta aena iau avaḡehe gavi roege,
71
eige noka no enana ḡahare renu besibe ḡahare, iau adehe maḡuri raḡira vara.
72
Eige auki au vaḡahu ominue vane ni vahiruhe iau ḡaḡae kinu, mati auki au ominue aena kine anavanu,
73
au ominue rone ni tene Aberahamo ḡasina, auka no mohigeisa
74
eige nona, iau no besibe ḡahi gevare iau adehege noki maḡuri raḡanu, eige noka au meve kisa,
75
aena mati ieriri ruta au vaḡotoni ni maḡuri vaniva inuhati.
76
Renu di moe, akera iauka rosa vava vava uiare peroveta koitava; badiva aka uriḡoi
Rohi Bauge vaḡotoni oti au ḡumaḡe kiki vara,
77
maḡuri ḡuma uhu vaka koita mohigeisa
iau ḡuma daureve iau keto geisa,
78
Badiva ni Diravate vaḡahu maḡeve dainehe, aumu vava seni baoraḡi uguhi ni ada.
79
vadibu uiare ḡahava abaga ḡahi geisa mati hoḡe uhura uiare iau, mati no nisigei otisa mai ḡumava."
80
Gerege negu ḡami eraki raho ḡoi renu herote ḡoinu; mati auka mata ḡaḡaeva auki gurami ate iau vani ronei auki Isaraela iau ḡaḡae ḡoinu.