¹ Nega eige Kaisara Augusto raki aena be besuḡi akivi roege, vata ada koitava inuhati ge ramu iau ihe bukava ḡosiḡisa. ² Ihi maema vani ḡanaiva Kurenio gure Siria rohi ḡahege negahe gera. ³ Koita inuhati geraki iau ihe bukava ḡosiḡo dainehe iauki ḡoiraḡohi iau oḡehe oti gevenu. ⁴  Iosef tage Nasareta Galilea uhura auki hakivi otinu Iudea, auki hakivi Davida matamehe ihiva Betelehema, badiva au tene guruane ra Davida au gera. ⁵  Auki Maria tage iauki ei otinu iau ihe bukava ḡosigeisa, badiva auka Maria manu au mabareni kinu, renu auka ahatate ḡoinu. ⁶  Iauka iau abu so ei uhurage, auki huhunaḡi auka ḡami misa. ⁷  Auki marai au moe hama ḡamiva manu, gerege auki ogonava ḡodomi, renu gami karuka miare iauki boromakau iau tamuta patavehe kurei, badiva guragu iaga inuhati tobo raḡohanu. ⁸  Mata eigera ata iabera iau mamoe ḡosiḡare eige iauki gurahare, iauki iau mamoe terive ni tabata ḡahigeva. ⁹  Gerege Rohi Bauge anerue raki iau vaḡotoni rami, au abage raki oriḡigei, renu iauki siḡo raḡohege. ¹⁰  Eduge aneru raki boriti ḡahigei ronu, “Ia negu siḡo raḡime; iana eraḡa—daka koita inuhati iai bouge ianige daki hari bauge maḡe bera daki moroḡanu: ¹¹  negu vani oi Davida oḡehege iai maḡuri ḡahiḡa atava be ramu varavanu, auka Keriso, Rohi Bauge vara. ¹²  Oramu au toaḡera: aka ḡami karuka be ogonava ge iauki ḡodomi renu boromakau iau tamuta patavehe iaḡiaḡe ana behuḡisa." ¹³  Ḡamana veite iau ruḡage va aneru iaberaki ugu raḡohi, Dirava moteḡahi mati roege, ¹⁴  “Dirava vava vava uiare no Moteḡaha, mati vata ada oi au maive koita iai bouge misa!” ¹⁵  Aneru iaberaki ḡaregei vava ḡoiraḡohi otinu, gerege mamoe ni tabata ḡahava iabera bebe gaḡagei, “No ota Betelehema otavadoana Rohi Bauge no kirogeima noka oti eraḡisa.” ¹⁶  Gerege iauki vaina otime iauki Maria renu Iosepa, mati ḡami karuka vara boromakau iau tamuta patavehe iaḡiage. ¹⁷  Iauki ḡami karuka eraḡare, iauki au badine iau ihine gava raḡi ioa raḡohege, ¹⁸  renu koitaia badiva mamoe ni tabata ḡahava iau gava ihinei iauki ḡaḡu raḡohanu. ¹⁹  Eduge Maria iaḡa o inuhati uhu maemi renu au uhurehe anana viege. ²⁰  Mamoe ni tabata ḡahava iabaki ḡoiraḡohi, iauki Dirava maḡe ḡahi renu moteḡahi iau ga ihine mati era gevene, aneru kiro gevene inuhati ge ramu riaḡa vara. ²¹  Vani abuḡu veite kosavege, iauki ḡami karuka ihiva kikivara; iauki ihiva ronu Iesu, au so au neine vaḡatanihe aneru raki ihiva ronu. ²²  Iauki Mose aena rone, reḡureḡu vaniva miege, iauki ḡami karuka mi Ierusalema otime iauki Rohi Bauge vaḡotoni ḡaḡae kinu. ²³  (Dirava aenave uhura maemane onakime auki ronu, “Hama ḡami mo ḡahare iabera Rohi Bauge vaḡotoni inuhati aena iabera”), ²⁴  mati iauka boubou iaḡa naḡate Rohi Bauge aenave rone, “ḡero ḡamika abu se uguha ḡamika abu." ²⁵  Ierusalema uhura gera atabe ihivara Simeona, auka ieririve mati Dirava siḡamare atava. Auka Dirava auki uhuiami orenaki auna Isaraela huhu naḡare maḡe ḡahiḡa eragisa, renu Horu Aena tage au ruta gera. ²⁶  Auka Horu Aena raki au ḡaḡae kinu auka so beta hoḡe eragisa, edube uriḡoige auna Rohi Bauge besu besu atave eraḡisa. ²⁷  Simeona ra Horu Aena raki nisiḡami dubu sirivi; gerege ḡami karuka Iesu iahuve iaberaki mi oroḡime iauka iau tene aenava au kisa, ²⁸  Gerege Simeona raki iau miare auki mi hodohare auki Dirava moteḡahi, roege, ²⁹  “Di Biage, ama bina ai besubesu atave besuḡisa ai maive ruta, ai gare rone naḡate; ³⁰  badiva di nie ramu ai maḡurive eraḡanu, ³¹  akamu kinu koita iau bouge iau vaḡotoni, ³²  ai abage ramu hakivanu koita inuhati iau renu ai maḡeve ramu ai koitatuhe Isaraela ḡaha iau." ³³  Negu ḡami e mame au neine ruta iauki ḡami e badine ihinei iauki ḡaḡu raḡohi. ³⁴  Gerege Simeona raki abu ruḡa maḡe ḡahi gevare, renu auki au neine Maria kironu, “Gami ora Isaraela koita dadaḡa iau ugu raḡare renu idigei iageige vera, mati auka koita iabena eraḡi au gare raḡi besibe ḡahisa. ³⁵  Eige koita dadaḡa iau uhu ananave iabera ḡaḡae ḡahiḡa vara—renu a tage avaḡu ai soruke eḡiva bisa." ³⁶  Peroveta maḡi be tage, ihivara Ana, auka Fanuela maera, Asare toneta maḡi vara. Aukamu bina maḡi iahu ḡoinu, auka mobore ruta tau iatiriḡaḡu ge iauki ḡurahanu, ³⁷  gerege au gobu ḡoi gurami ate au maguri taue ate utu iatirigava akira ababu ḡoinu. Auka guragu vaniva inuhati auka dubu ḡareḡa veite, edube oti Dirava maḡe ḡahege renu aena viare tamuta ḡaremi vani mi vahi mi imimi viege. ³⁸  Vani ei iau Iesu mi dubu aenava mi oroḡane, Ana tage raki oroḡime auki Dirava maḡe ḡahi renu ḡami karuka e gare vi roege auka Ierusalema maḡuri ḡahiḡa vara. ³⁹  Iauki Rohi Bauge aena meva kirogei kosai, iauki ḡoi raḡohi Galileia oti, iau oḡe riaḡava Nasareta. ⁴⁰  Ḡami eraki bauge ḡoi, mati herote renu uhu vaka ruta; renu Dirava maḡeve au ada gera. ⁴¹  Tau inuhati au iahue iabaki au tage iauki mi Ierusalema otege, iau Edoro-edoro rigi vaniva dainehe. ⁴²  Iesu taue utube hakira abu ḡoine, iau tau inuhati kiare naḡate, iauki Ierusalema otinu rigi dainehe. ⁴³  Rigi meva kosavege iauki ḡoi raḡohege, edube Iesu ra Ierusalema ge auki gurami, eduge au iahuve iabera dibana veite. ⁴⁴  Iau ananave auka koita ḡoi raḡohare iau vaḡa, vani uhuḡae iau oḡine. Tutube viege iauki iaḡovege iau oḡo nanuhe renu vasiruhe iau berabe raḡege. ⁴⁵  Iauki behube veite, eige iauki ḡoiraḡohi Ierusalema iaḡoisa ro otinu. ⁴⁶  Vani abigaḡa itaharahe iauki dubu uhura behuḡanu, auki dubu ḡaha iau vaḡa gura gurave, iau gare ihege mati berabe viege. ⁴⁷  Gerege au gare ihege ḡahava inuhati geraki ḡaḡu raḡohi au ga uhu vake mati au berabehe. ⁴⁸  Au iahue iabaki eraḡi heḡiri raḡi; gerege au neine raki kironu, Di Moe, esemena a onaki no kiogevenu? Eraḡa, da ai mame ḡorehege anana hoḡeva raḡime noki a iaḡova.” ⁴⁹  “Esemena ia da iaḡoa?” auki bera gevenu. “Iana dibana veitenu dakamu di Mame iagehe uvara?” ⁵⁰  Eduge iau uhurera bao raḡira veite auna otavadoana au roege. ⁵¹  Gerege auka iau ruḡa Nasareta otime renu auki matau ḡahigei. Eduge au neine ra iaḡa inuhati ge auki au sorukehe ḡosigevenu. ⁵²  Gerege Iesu raki bauge ḡoi mati uhu vaka maḡe ruta, renu Dirava mati koita iabaki au ḡahara raḡege.