¹ Dubu ḡaha iabera heḡiri bauge so mimi veite, Iesu raki subuta dibana ḡoinu au hoḡeve ramu hugure, renu auka vata ada o ḡaremare au Mame ḡasina otito vara. Aukamu au koitatuhe vata ada oi maḡe ḡahigei ate auki basu basua manu. ² Iesu mati au ḡamituhe ruta tamuta raḡege uhura, diabolo raki subuta ge auki Simona moe Iuda Isakariota uhure inu, auka Iesu bive kisa; ³ Iesu, auka uhu maemi au Mame ramu iaḡa inuhati idigei au adahe ḡosiḡanu, renu auka Dirava seni ge auki oroḡanu renu auka Dirava ḡasina ḡoiraḡira vara. ⁴ Gerege auki iau tamuta raḡege uhura urimanu, au adare ogonava mi ariḡare, renu ogona be mi au negotanehe raro vanu. ⁵ Gerege auki hodu avie be mi eiava maka kiare renu au gamituhe iau vase ketogei mati au negotane ogona au dahu gevege. ⁶ Auki Simona Petero ḡasina oroḡege, auki beraḡanu, “Di Rohite, ana di vase ketoke vanu?” ⁷ Iesu raki ronu, “Aka negubutu anana veitera dana otavadoana da kima, eduge ihiege ana ai uhurena bao raḡisa.” ⁸ Petero raki kironu, “Aka beta di vase ketoke vara.” Iesu kironu, “Da negu a ketoke veite ḡoiare, aka beta di uhura ḡoiḡo vara.” ⁹ Simona Petero raki kironu, “Di Rohite, beta di vase eḡu eduge di ade mati di omote ḡainage!” ¹⁰ Iesu raki kironu, “Koita be eagare ra beta ḡaitana eagugu vara, auka maḡera eduge au vase eḡu ge auna ketoisa. Iaka maḡera edube beta iai bouge gera.” ¹¹ Aukamu uhu kinu unuhuna au bive kiki vanu; eige auki ronu, “Iai bouge gera beta maḡera.” ¹² Iesu raki iau vase ketogoi kosai, auki au ogona adareva kiare auki ḡoiraḡi tamuta patava oti guramare, auki kiro gevenu, “Iama anaisa dana otavadoana da iai kinu? ¹³ Iaka dakera iaki da mi roia daka iai uguro koitave renu iai Rohite, eramu riaḡa vara, eramu dakaki. ¹⁴ Eige dana iai Rohite renu iai uguro koitave, daki iai vase keto gevenu, ia ḡainage iama bebe iau vase ketogeisa. ¹⁵ Dakamu o ḡumava iai kinu, gerege ia ḡainage oti be iau da iai kine ḡumava kisa. ¹⁶ Riaḡa vara, daki ia boriti ḡahi geima, iahe iahe ḡahava iabera beta iau biage soi soi vara, renu ga roro ḡahava iabera beta iau besuḡane koitava soi soi vara. ¹⁷ Ana iaḡa o iau dibane ḡoiare, aka maḡeva mimi vara a meva kiege. ¹⁸ Daka beta iai bouge iai gare daki roma; dakamu ana vima unuhuna da ronu. Eduge ora buka aena gava riaḡa ḡahiḡa vara, Daḡore naḡu kobabe tamuta vane eraki aniḡoi da enana ḡahima. ¹⁹ Eige daki negubutu ia boriti ḡahigeima, auka so ḡaḡae veite, edube au ihie ḡaḡae ḡoiare, eige iana riaḡa ḡahisa dana unuhunu. ²⁰ Riaḡa vara daki ia boriti ḡahigeima, unuhuna da besuḡane koitava maḡe ḡahima auka dakera auki maḡe ḡahima; renu unuhuna da maḡe ḡahima au tagera da besuḡane koitava auki maḡe ḡahima.” ²¹ Iesu enaki rone itaharahe au soruke raki isuhanu, gerege auki kiro gevenu, “Riaḡa vara daki ia boriti ḡahigeima, ia be raki di bive kisa vima.” ²² Au ḡamituhe iaberaki dauraḡohi be be eragei, ona unuhu garena au vima. ²³ Au ḡamite bera Iesu raki ḡahara viare ḡami vara, auka au hakirehe ge auki guramege; ²⁴ Simona Petero raki niḡahi eraḡi auka beraḡisa auna unuhu garena au vima. ²⁵ Gerege auki Iesu ḡaika kahika ḡahi otare, auki beraḡanu,” Di Rohite, unu hunu?” ²⁶ Iesu raki kironu, “Da hauhaka tinabe mi naḡu evi o taḡoare mi unuhuna da moimare koitava aukamu enu.” Gerege auki hauhaka mi evi taḡoare, auki mi Simona Iskariote moe Iuda moimanu. ²⁷ Iuda hauhaka mane itaharahe, Satani raki au uhura siri vanu. Iesu raki kironu, “Ama vaina a anavare meva kisa.” ²⁸ Koitaia tmuta raḡohege bera dibana veite otavado dainehe gena au enaki kironu. ²⁹ Eduge be iau anana vera, badiva Iuda ra muni tahaka nitabata ḡahare, eige Iesu raki enaki boriti ḡahege, “Auka oti rigi oroḡare iaḡaniva hae geisa”; se, iaḡa tinabe mi goroa mohigeisa. ³⁰ Gerege, au hauhaka mane itaharahe, auki vaina hakivi otinu. Renu va ramu hiriḡoromi. ^{33 31} Iuda hakivi otine itaharahe, Iesu raki ronu, “Negubutu koita iaberamu Koita ḡamika maḡeve ḡaḡae ḡoiare erara vara, renu Dirava maḡeve ramu au uhura gera. ³² Renu Dirava maḡeve au uhura ḡaḡae ḡoinu, gerege Dirava raki avaḡu koita iau ḡaḡae kisa Koita Ḡamika maḡeve renu auna inono veite maḡe ḡahisa. Di ḡamuhe ia, daka beta ia ruta guragu ḡamana vara. Iaka so da iaḡoia vara; renu iakera daki ia boriti ḡahigeima da Iudea ḡaha kiro gevene naḡate, “Da otare ḡumava, iaka beta riaḡahe ororo vara. ³⁴ Daka aena ga isage bera dana ia mohigeisa, iama be be iau ḡahara raḡisa. Da iai ḡahara vane nagate, ia ḡainage tage iama be be ḡahara ḡahisa. ³⁵ Onaki ḡuma oi gena koita iana anaisa iaka di ḡamituhe iabara, ia be be iau ḡahara raḡege.” ³⁶ Simona Petero raki kironu, “Di Rohite, ana oreigena a otima?” Iesu raki kironu, “Dana oreigena da otima, aka beta negubutu di itahe ororo vara; eduge ihiege ana di itahe oroḡisa. ³⁷ Petero raki kironu, “Di Rohite, dana beta negubutu ai itahe ororo vanu? Dakamu iai dainehe di maḡurive mi vata maema vara.” ³⁸ Iesu raki kironu, “Ana riaḡahe ai maḡurive di dainehe mi vata maema vanu? Riaḡa vara, daki a kiroma, aka kokorogu vara so nina veite, akamu nega abigaḡa ge aki da tarata ḡahanu.