¹ Vani agorokiva uhurahe Iesu raki Lasaro oḡe Betani ge auki otinu, auki hoḡe uhura maḡuri ḡahi ḡoiraḡanu. ² Iauki auni demaka tinabe kinu. Mareta raki demaka kiege, renu Lasaro tage ramu ei iau ruta tamuta viege. ³ Maria raki damu ketake muraka ḡutika maḡete be mi otinu, auki mi Iesu vase dahuḡare mati au omo hanakehe dahuḡege. Negu iaga uhura eramu muraka ḡutika maḡe era raki tobo ḡahanu. ⁴ Eduge Iuda Iskariote, au ḡamite be (unuhuna negu au bive kiare koitava), auki ronu, ⁵ “Esemena muraka ḡutika maḡe o mi tinahu abigaḡa haeha veite, renu muni tahakava mi koita goroa mohigeige veite?” ⁶ (Au onaki rone makava ramu beta auka goroa ana gevare era, eduge auka vaho koita vara; renu auka muni tahaka nitabata ḡahima edube auka vahoro ge auki ima.) ⁷ Iesu raki kiro gevenu. “Maḡi e ḡarehiahe. Auki haevane ra auka kamui oti da abatemare vanihe gena. ⁸ Koita goroa iabera vani inuhati ia ruta gera, eduge daka beta ia ruta vani au bougera. ⁹ Iudea ḡahavaia badi ihine gerege iauka oroḡi Iesu ei eraḡisa, mati iau otine iauka Lasaro tage eraḡisa, au hoḡe uhura maḡuri ḡahane. ¹⁰ Eige dubu biava iabaki Lasaro tage ḡamiḡa ḡumava iaḡovege, ¹¹ badiva au dainehe Iudea ḡaha dadaḡava iabaraki ḡare gevare mati Iesu riaḡa ḡahege. ¹² Va tahege koita dadaḡa negu rigi meva oroḡane iabaraki ihinu Iesu tagera Ierusalema ororo vara. ¹³ Gerege iauki baḡa reta ididita oti Iesu eraḡisa, iauki bara raḡi roege, “Hosana! Rohi bauge ihehe oroḡare maḡe ḡahisa auka Isaraela iau Rohite!” ¹⁴ Iesu raki doniki ḡamika be eraḡi moroḡi gerege auki au ada ḡurami; iau bukava maemi rone naḡate: ¹⁵ Siona ḡahavaia, ia negu siḡo raḡime, Eraḡiahe, iai rohite ramu oroḡima, doniki ḡamika be ada ge auki guramanu!” ¹⁶ Au ḡamituhe iabara ḡanai iau uhure raki bao raḡira veite ḡuma o iau; eduge Iesu hoḡe uhura urimi ḡoiraḡege, gerege iau uhure raki bao raḡohi iauki gava anagei renu iau buka aenava maemi rone eraki ḡaḡae ḡahanu. ¹⁷ Gerege koitaia nega ei Iesu ruta iabaraki ga raḡi roege aukamu midava seni ge auki Lasaro ihiromi hakivi renu auki maḡuri ḡahi ḡoiraḡanu. ¹⁸ Mati koita iabaraki ḡaitana ihinu auka hedo ḡuma be kinu gava raḡohi eige iauki oti eraḡisa. ¹⁹ Gerege Faresia ḡaha iabaraki bebe kirogei, “Iana eraḡa, iaka beta iaḡa kiki vara. Eraḡiahe, vata ada ḡahavaia inuhati au itahe iauki ota!” ²⁰ Koita be ḡainage beta Iuda ḡaha iabara iau ruḡa rigi kiare erarava otinu. ²¹ Iauki Filipi ḡasina oti, auka Betsaida koita vara Galileia uhura, gerege iauki kironu, “Rohi Bauge, noka Iesu eraḡi renu au ruta ga raḡisa rome noki.” ²² Filipi raki oti Anderea boriti ḡahi; gerege iauki iau abu oti Iesu kironu. ²³ Iesu raki gavi ronu, “Negava rone auki manu Dirava raki Koita Ḡamika maḡeve ḡaḡae kisa roma. ²⁴ Riaḡa vara, daki ia boriti ḡahigeima, koni iaka kobabe vata ada desuraḡi mae raḡare, era kobuḡa beḡu; eduge au hoḡe raḡare au madike maka dadaḡa kiki vara. ²⁵ Unuhuna avahu au maḡuri guraguve vima auka basu basuva dauda vara, renu ana unuhuna vata ada maḡuriva besibe ḡahima auka maḡuri behi behive mimi vara. ²⁶ Ana unuhuna da mi au biage roma ama di itahe oḡisa, gerege ana di ḡamite dana oreigenu a tage ei da ruta gera. Renu di Mame ramu a maḡe ḡahiḡa vara ana unuhuna da iaheḡima. ²⁷ “Di soruke ramu isukera. Renu dana otavado rosa, Mama, isuke oi da maḡuri ḡaha? Veite, isuka o dainehe daki onaki huhunaḡima. ²⁸ Mama, ai Moe maḡe ḡaha.” Gerege eno be raki vava seni uguhi ronu, “Dakamu maḡe ḡahanu, eduge daka ḡaitana maḡe ḡahiḡa vara.” ²⁹ Koitaia rahirahe iaberaki ihare renu roege era va raki du vanu. Be iabara roege, “Aneru be raki ga ḡahanu.” ³⁰ Iesu raki kiro gevenu, “Eno ora beta dai gera, eduge iai dainehe ge auki oroḡonu. ³¹ Negu nega oramu berabe vani vara vata ada oi; unuhuna vata ada o biava viare oiahi hakiha vara. ³² Eige da mata o garemare e, Daka koita aubougi idigei di gasina ororovara." ³³ Au enaki rone badivara, au hogeragare gumavara auki vasibava vanu. ³⁴ Koita iaberaki roege, “Nokamu aena maemane ihinu Koita Ḡamika vara maḡurivi oti behi behive. Orenaki gena a roma Koita Ḡamika iauka iagemisa? Koita Ḡamika ona unuhuna?” ³⁵ Iesu raki kiro gevenu, “Abaga vara so nega tinabe ia ruta. Abaga iai uhura iama oḡisa, badivara vadibu negu ia idi geime. Ana vadibua gena a oḡima, aka beta dibana ḡoiḡo vara ana orei gena a otima. ³⁶ Iama abaga o iai vaḡotoni riaḡa ḡahisa, gerege iama abaga uhura maḡuri raḡohare koitava ḡahisa.” Koitaia Iesu riaḡa ḡahi veite Iesu onaki rone itaharahe, auki ḡeahu oti iau hata vanu ³⁷ Orenaki gena au hedo me dadaḡa kiogevenu iau vaḡotoni, eduge iauka riaḡa ḡahiḡa veitera. ³⁸ Ḡuma onaki kikive ra Isaia peroveta gare riaḡa ḡahi vara: “Rohi Bauge, unuhuna ni gare riaḡa ḡahanu, mati unuhui gena Rohi Bauge hedoke ḡaḡae ḡoinu?” ³⁹ Eige iau riaḡa ḡahiḡa veite makava ramu, Isaia tage raki ronu, ⁴⁰ “Auki iau nie kopu ḡahi gevenu mati iau soruke berebe ḡahi gevenu, gerege auka beta iau niehe niḡa niḡa raḡohisa, eduge iauma iau sorukehe anana raḡare mati ḡoiraḡohisa, gerege dana maḡuri ḡahigeisa.” ⁴¹ Isaia onaki rone makava ramu aukamu Iesu maḡeve eraḡanu eige auki gava roege. ⁴² Eigera koita dadaḡa, renu dubu baugea, ḡainage riaḡa ḡahanu. Eduge Farisea ḡahavaia ḡainage gava raḡira veitera, badivara iauki siḡo raḡoha iau negu dubu besugei haki raḡohime; ⁴³ badivara iauka ahata maka kasihege iauki oti raho ḡaha eduge Dirava maḡeve oroḡare era iauki eraḡi avie ḡaha. ⁴⁴ Gerege Iesu raki nivi barai ronu: “Ana unuhuna da riaḡa ḡahima era beta dakera auki riaḡa ḡahima eduge da besuḡane era aki riaḡa ḡahima. ⁴⁵ Gerege ana unuhuna da eraḡima era da besuḡane eraki eraḡima. ⁴⁶ Daka vata ada o abaga vara, eige oḡoreana da riaḡa ḡahare ḡahavaia beta vadibu uhura guragu vara. ⁴⁷ Ana unuhuna di gare ihare eduge mi kamuka veite, daka beta au daureve roro vara, badiva da vata ada oi oroḡane beta ia daure ḡahigeige vara, eduge maḡuri ḡahiḡa vara daki oroḡonu. ⁴⁸ Ana unuhuna da besibe ḡahima mati di gare mimi veite daka au daureve roro vara; auka netu netua da ga rone eraki au daureve rosa, ⁴⁹ eigera daka beta davaḡu di garera daki roma, eduge di Mame da besuḡane eraki aena da boriti ḡahane dana rosa mati dana gava visa. ⁵⁰ Mati daka dibana au aena gare ra maḡuri behi behive ga vara. Dana otavado da gavi roma, eramu, di Mame da kirone ga vara daki roege.”