1
Teovilasi di kakolo ata moeagaea Iesu lailoi minale aveve dua ale ke kisaialu.
2
Memila Iesu mohohoea Iesu vadeu ale ke ivai ke kisaialu ata ivale ata keali ke toleage vesulu ige data ke ivai toleai vai alu hanavalu au ata ivite kelu louivei.
3
Ige data olai aveve ke neni isi galave ke neni toleai, alu hanavai au ata kitaelu louive. Kateige da Iesu galave ke kaoai neniai ivai valivelu alu toleai hanaviva.
4
Iale au ba ko ivai dodavei ata volea louge a eviale keta huhuai uso.
5
Kini Helodi keu Diudea vata naliai uvalela malaha vole bulisiti ivivela Sekalaia, Abiada keta memila Diuia Dubu naliavale ata kitae. Ige Sekalaiau hauve ivi alu Dubule keateve keu Eloni eselega lolu ivie Elisabeta.
6
Keu avoti atau dua evievi ata Dilavau lo Basu ke lehosiva solilu isito ke naliu dua aeviva.
7
Isito eseabeu ue solilu, Elisabetau esesia au ba ese koulivelu bele ige lahaniabeu vesuilolu.
8
Sekalaiau taemiveu loige eu loi Dubu haukala alivelu Dubu uvue tilu.
9
Bulisiti kea kalaebe keu koseiva, abole gadala vole age naba keu ole vage Bulisiti keule senisi hagote ke vaitalivelu Dubu uvue batabata adale kosai vauge hagove vivie keule Dubu uvule vivia ui. Hagoai ui abo ke age sakalaia vage eu tilu.
10
Tiale Senisi hagote ke vasege ata moeagae Dubu vavae ui Guliguliava.
11
Guliguliasege Anelu voleu loaleu batabata ke ivila ada vaiteveo lavilu.
12
Ige Sakalaia ke vabuiavage lutive baiu hadahadaulu.
13
Anelu laviai avoe vabualive, ai guliguli Dilavau evilu ai ivu Elisabetaule ese vole vai, iviela Dioni.
14
Abole sisila kitae ai eseu uale kela.
15
Ese keule Dilava vileo ese kitae, auba uaini eu toela ke ilivelubelel e melite ke ilivelu bele isege Otogou Lauma Helaga keu ke vai vuvunetisi aiave gogou uvue.
16
Keule Iselaela ke neni takoveai agisi Kosive Dilava ke veleo loi.
17
Ese keule Dilavau haule unila koto vai tigei Munanau tuvu vuvule isi Ilaisau vuvunele mamuvuiabe lutiu bai ke neni takoveai agisi eseabe keta otovei koto eviesite ke agisi luleletigei kalau dua keveo ige ea lediai Kosive vou lolivelu age inohovele ui isege Iesu loi.
18
Ige Sakalaiau Anelu ke laviai avoe, 'Dale oleveo kateai ke valitisi?' Dau maku olige di keateta lahanive ta vesulu.
19
Ige Anelu keu loi avoe dau Anelu Geibolo dala kou, dale Dilavau nila lavigei kelu da havage da lolu nonau dua ko loui a lavialivelu.
20
Katealelu aba nonalivelu bele ivaga da vadeu louale keu loi vesugeto ba nonaso, aa di koto evie solialelu.
21
Ata moeagaea vatae Sekalaia inohole uvagato ba Sakalaia velevai lolu aiveu bavualeta.
22
Sakalaiau velevai loi ada ulata ata haivege ea loui avoe keu Dubu uvue hau vole ivalu ige eu vekeai meliai ada ulata haiveva.
23
Ige ke iae Dubu uvue hau vesuge eu au oe tilu.
24
Ke iae keateve Elisabetau ese valu isi amiga vai mahogovaleu bata ada vaki vole '5'.
25
Loui avoe Dilavau kuvau duala kou dalu alu, au sisila kitaele di huhui isu ke vesuiavalu ataea nile. Da matiavale ke.
26
Ige keu loi bata igaliu ue solisege Dilavau Anelu Geibolo hanavage loi Galileia siti vole Nasaleta.
27
Loi o kele velevage va vole ivivela Meli keu ulu, va Meli ke abo Diosebalu kokovalu. Dioseba keu Deividiu laini volela (beseabe) isege va ke ivila Meli.
28
Ige Anelu keu loaleu avolu loui avoe, ale duave kosiveu ati ui, a hoeaseavalu, ige au nivele duave.
29
Kateige Meli koto ke evisi tetealu isi loui avoe koto vadeula koseale kou.
30
Ige Anelu keu avolu loui avoe vabu kale Dilavau aa eahalelu.
31
Ialelu ale ba ese vole va. Ese keu uge ivihai ivive loui kosea 'IESU'.
32
Keu ui kosi kitae olige Dilavau eue uale keule loui koseai di vola keu isi Dilava Kosive keule vavivuiabe Deividi vea telona vai vavuge aule ele ugulumai.
33
Ige aule Dieikobo ese ke neni naligei ige Basileiabeu ukolikoliai ugei.
34
Meliu Anelu laviai avoe, aa louvale keu oleve kateai? da malahabe iva solilu?
35
Ige Anelu laviai avoe munana tuvuteu keule aele dobai loige Dilavau vuvuneu aa bavuge ale ese ke vaso. Katealelu Dilavaule au voo ke ivi loui koseai dii voo tuvute.
36
Ale ai aia vole Elisabeta ke huhualu keu esesia olisi loaleu ese vole vale keu unita ualeu ave bata sigisi '6' la kou.
37
Kelu malomaloalive Dilava vileo haubeu ba isualivelu bele aule nenive oligei.
38
Kateige Meliu Anelu Geibolo laviai avoe dau Dilavau hau avale ata vole dala kou, au vadeu dalu louale keu nenive. Kateai louge Anelu evisi kalei tilu.
39
Vali kele Meliu au hau bevuai agisi talau visoe ovole Diuda vatae tilu.
40
Tialeu tai Sakalaia oe tilu, tai Elisabeta vai sisila tilu.
41
Kateisege eseu Elisabeta uvue vitoi hadalu, avota sisilaive. Ige Elisabetau Otogo Munanau tuvu loi avoe ililohoi ulu.
42
Ige Elisabetau genuhamai salasalai lou avoe, a keu keatea dua ke uvule keateu dua igali. Duave kitaeu aele ulu isi ai uvu baiu dua keta bai dua kitae.
43
Ige keu oleve kateai dii Kosive kitaeu, aiaiu loale daela velevalu?
44
Iva, ai sisila nonau dua keu dii golemau evisege eseu di uvue vitoi hadalu sisilaive.
45
Katealelu sisila kitae Dilavau alu louale keule leleve olisi.
46
Kateige Meliu loui avoe daa dii uvule Dilava hoeaseavale keu kitae daele.
47
Dilavau da hoeaseavale kele da sisila kitaealu dii Dilava vileo.
48
Dau Dilavau nile ivie solilu isoto eu da huhualu katealelu ata moeagaeale loui koseai Dilavau keate ke hoeaseavalu.
49
Kosealelu Kosive keu ivi kitaete kelu loui dalu hau kiitae ko alu ivive keu ivi tuvute.
50
Katealelu ole oleu Dilava vabuiage uvuveule aboele ui, ige aule vali baita ata keta eseabe keta hoeaseavagei.
51
Ige adave keule vaveve melite ke ai isi olea abobiga letatavalivelu age aule huhuiabe agisi katui.
52
Keule vatau ata kitae ke letolevegei to olea uveve dua avale ke letatavagei.
53
Keule loviu dua ke vagala valeke vavei isito lovi moeagate ke hanavege ada ulale taevei.
54
Dilavau au ata Iselaela ke dulugei ke nimabigei kaleve solilu abolai uvuale kelu louive.
55
Memila atate isi Eibolahamu ta lavia avoe dale vali bahata la huhuevegei vale vile ke nenile.
56
Meliu Elisabetati ualeu bata abutita igalita '3' vesusege au oe lolu.
57
Vali volele Elisabetau eseu ulivelu valive niu loige voveu ulu.
58
Voveu uge kakoluvuia be nenia ke evisi avolu sisila kitae aevelu, ea huhuage Dilavala avolu kuva ke alu ige eu ese ke valu.
59
Valini eiti '8' vesusege atave ke nenia loi sisilave ai olai veuivale vateve ke letulie vei isi ivive loui. Ataeau ivage Ebolahamu vileo ata kea loaleala kea letulige vesusege olai mamave Sekalaia ivita ivihai.
60
Isege aiaveu loui avoe be, ivivela Dioni.
61
Kateai louge ata kea loui avoe aa oleveoga ivi ke vai lolu, keu vamilia ivi olie solilu.
62
Isi loui ada ulale mamave laviava isivia ivivelu vadeu loui.
63
Beba vole vai vavuge eu kisaiai avoe ivivela Dioni, ige ataea ke ivai tetehamalu.
64
Isege solekata aiveu alavasege eu loui avoe ivivela Dioni.
65
Ige vabu kitaeau ata ke nenile dobage ata ke belala vai Diudea talau visoe uale ke lavigei oige ataea evisi vabuiai loui avoe ese volela keu, keule vaoe vadeu kitae ai.
66
Ata olea ke eviale kea koto ke neni abo uvue otovei huhuai uevelu.
67
Ige mamave Sakalaiau munana tuvu avoele vuluai uale keta Belovetai loui avoe.
68
Dilava hoeasea vave, Dilava keu Iselalaea Dilavala keu loi au ata mauliavelu isi au huhuale kela keu alu.
69
Eu kauda volelau vai velevalu lailo ko neni maulia velivelu mauli vavei au haukala ata Deividi ou uvule.
70
Ceu nonaiau beloveta kea aile louale memila voleo.
71
Lailo mauli vavelivelu lailoi baoea adale ata kea lailo ko agisi toelativale kea adale.
72
Aule ko late ai isi aule lailoi mamuvulai uvuai au basuta huhuai.
73
Au memila lailo vavivutelai nona vaevalu, Eibolahamulu koto tuvute louive.
74
Au koto tuvute louale kela aule lai lolai tuvui vale kea adale lailo hoeaseavei ige lai ba vabualivelu bele isito hauve ai.
75
Isi ata tuvute olisi vali baita aveve dua ula volelai ai, Dilavau nona louale keu katealu lailolai.
76
Iale di voo, ataeale alu loui koseai Dilavau eue uale ke beloveta ala keu iale ale luta tai kosive kuva loisege aule ba loi.
77
Aleba ksiveu toelale au ata agiveve koto ke loui ata haivege abole abo aveve toela kalevage Dilavaule kea toela totoai.
78
Kosealela Dilava keu lailolai uvuavale Dilavala, keule valibaita lailolai uvuage isi lailo dulugeva iale va alavale kelate Kosiveu atagaveule lailoele kalui.
79
Lailoele kaluge oleuoleu vaviu aveve avale kele kea vovolivelu uvale ke Kosiveule kelohomegei agisi uveve dua kuvala tai. Sekalaia kotouloi kele vesulu.
80
Igeto voveu kitaea bosialu isege uvuveu huhui keu avoele meliage o kalei botoe tialeu ataea uesite keveo tai ulu, ui tialeu vali voleu loige loaleu Iselala ata haivelu.