¹ Bolo dala levaleva ko kisaialu dau IESU KELISO Abositolo lai lo dulugevale kosi kitae DILAVA isi lailoi inohovele uvale ata kitae IESU KELISOu louge da loviabele hauiva. ² Timoti da a haivuge au evievi ata leleve olilu iale da olale lailoi mama DILAVA isi lailoi Kosive kitae IESU KELISO kea a huhuai alu uvuai a hoeaseavage ale u dua aso. ³ Da memila Masidoniae lolivelu a laviai kosealu da olale au Ebesesie uso. Kosealelu ata volea sele nona loui ata seleaevevale kelai louge abo kalevai. ⁴ Ata ke lavigei kosea momai lai vavivuia teniteni toela ke louevegelive isi lai vavivuia ivi ke dodavei huhuaievevale kateale loui lavige, kosealelu abole ke aluaga abole volelai loui ke ula huhuai abo evievi kele melialivelu bele isi DILAVAu haule goadalivelu bele. ⁵ Da kateale louale keu kosealu da olale ea huhui huhui toela ke kalevai abo uvu hoeaseavei abo evievile meliai ui. Abo voletelai olai vole hoeaseavei ui. ⁶ Ata volea aveve dua kateale a solisi to kotou baiu ue soliale kele koto loui uva. ⁷ Ata kea abobigalai loui avoe loea DILAVAu basu loui vole haiveva isito kea abo louvale ke baive diba solisi lulele solilu, abo kateaito eve ui meliai ata haiveva. ⁸ Lailoea neniai DILAVAu talavatu ko lovaluaga lai dibage talavatuve keu duave ula. ⁹ Isito da koto vole louge eviso DILAVAu atau dualai vaeava soliu isito atau toela laigau ke vaeavalu. Ata kea kotove evie soliva isi homasiaevivw isi guliguliava soliva, isito abo olate ula ai oiva uvuiabeu toelage abo mama abo aia ke kavege abo vovova isi ata voleta kaveva. ¹⁰ Isi abo keate voleali tebai oai to abo malaha kakoluvuiali vole mudikavei voleali tebai oiva, isi ata umuvei agisi ataela maketi ai oiva isi seleai sele nona ke loui ata haiveva isi aveve toela avale keu kotou dua ke vai toelativa. ¹¹ Isito ataga DILAVA kela koto leleve ke vai damuge da lou ata haiveva. ¹² Lailoi kaka kitae IESU KELISO keu au meli damui da ivage da nivele duave olila age au da letatavage da kotove loualelu da olai ivive letatavai hoeaseavai. ¹³ Isito dau memila kate solisito kosivelu kotou toela loui atave dikaiavei ke kavevaga au dalu uvuai, huhuige dau evievi ata olie solilu isi da vadeu avale ketale da lulele solilu. ¹⁴ Da kateige au dalu uvuai au uvu bahata vai daele vaeavai da duluage da IESU KELISO kele evievi ata olige sisilave keu daele ulu. ¹⁵ Da koto leleve vole louge eviu dua ai uso IESU KELISO keu vatae dobai loaleu olai aveve toela avale ke dulugei agigei. Iale da aveve toela avale keu ata bahata toelaeabe keneni leiviatilu. ¹⁶ Isito DILAVAu dalu uvuai da duluale keu kitae da aveve toela kitae kateale avaga IESU KELISOu da homasiava solisito da malihai uloho dalu kuva age da IESU lovalu. DILAVAu kateale ai olale ataea vaoe aveve kateale ai huhuai koseai DILAVA keu toela avale inohole uvale DILAVA eu olale toela avale ke nenia avoe loi valivelu ukolikoli mauli agisi. ¹⁷ Lailoi DILAVA keu ukolikoli mauli vale ke DILAVA ugalila keu beta uesolilu voleta ue solilu avo igalila keu ukolikoli mauliu avoele uale ke igaliule vali bahata ata ko neni nimabigei ugei. Iale atabeu au niteta iva solilu ivale keule voeleai isito lai kelu guliguliai hoeaseavaeviva. ¹⁸ Bolo Timoti lavia avoe di uvu huhui vo da alu koto ko louge eviu dua aso ekalesia memila a kosive lovile haudua ale ke ivai loulu. Iale kotoea be keule avai melitige ale kele hau dua aso. ¹⁹ Isi ai evievi kele goada meliai aveve dua keula ai huhudua ai haua ata moeagaea kate solisito huhui huhui toelata huhuai abo uvu vai toelatisi evievile otolovalu. ²⁰ Kea minale ata abutita Haimeneasi isi Alekisianda ke da hanavege abo Ekalesia olie solisito seteneu vuvune ulu kateige abo valivelu DILAVAu ivi vai toelati kalevai.