¹ Da luta alaviai bai bahata aa noinoia lugaga ata bahata kelai noinoia isi ai olatalu loui DILAVA laviai sisilaveta age. ² Vatau loia isi kosive volea vatau ata naligevale kelai noinoia ige lai kele sekiai udua ai DILAVA igali huhuai aveve dua ula agei. ³ Ige DILAVAule ke ivai sisilai DILAVA kela lailo agigevale kosive. ⁴ Iale keu olale ata bahataea kotove evisi kele lulele dua agisi. ⁵ DILAVA keu DILAVA dua igali ige IESU KELISOu dobai loaleu ata olisi ata bahata toelaeabe ibilalu voeleai agigei abo DILAVA luvita igali toai uveve kuva ke alavalu. ⁶ Iale DILAVAu IESU voeleve vali letatavale kele lai luleleige au olale ata bahata kea ukolikoli mauli agisi. ⁷ Katealeluga DILAVAu da hanavai olale da hauve avale ata vole olisi valevelu Diuia ata olie soliale ke koto leleve loui haivege abo evievi ata olisi da louale keu sele olie solilu isito koto lelevela da ke loui a lavialu. ⁸ Da olale vatavau ata bahata kea abo avale toela ke kalevai volelai tuvue solisi kotou toela loue solivale kea kome bokoai vata bisi guliguliagei. ⁹ Isi da olale keatea ataea nile ogona egete ke ula kolovui isi abo kine bisi hau moeagaele otovevale ke huhu moeaga kalevai. Isi ogona dua ibilave kitaeale keta huhu moeaga kalevai. ¹⁰ Isi to da olale DILAVA lova vale kea aveve dua ula huhuagei. ¹¹ Isi keatea la bea momai lamiga letatava gelive, isito sekiai ui koto ula evisi uevegeve. ¹² Da ola solialela keatea malaha haivei abole siaualivelu isito abo kotoeabe evisi sekiai uevigei. ¹³ Kosealelu DILAVAu luta Adamu alu isito ba vaoe Ivi alu. ¹⁴ Ige segeneu Adamu seleava solilu isito Ivi lau seleavage Iviu DILAVA basuale ke kosalu. ¹⁵ Katealuga keateale ese agiluaga vateabeule tuvuagei. Isito abole abo evievile meliai ui vole dulugei aveve dua ula age DILAVAule vateu tuvu kele duluge dua agei vali bahata.