¹ Timmakder ti sibubukel a bunggoy ket indatagda ni Hesus iti sangoanan ni Pilato. ² Pabpabasolenda isuna, kinunkunada, "Nakitami a mangririribuk daytoy nga tao iti pagilian tayo, mangiparparit a mangted iti pammadayaw a maipaay ken ni Cesar, ken ibagbagana pay nga isuna ti Kristo, maysa nga ari." ³ Nagsaludsod ni Pilato kenkuana, ket kinunana, "Sika kadi ti Ari dagiti Hudio?" Ket simmungbat ni Hesus, "Imbagamon." ⁴ Nagsao ni Pilato kadagiti panguloen a papadi ken kadagiti adu nga tattao, "Awan iti makitak a basol daytoy nga tao. " ⁵ Ngem ipilitda latta a kunada, "Riribukenna dagiti tattao, agisursuro iti intero a Judea, manipud Galilea ken uray pay iti daytoy a lugar." ⁶ Isunga idi nangngeg daytoy ni Pilato, sinaludsodna no taga-Galilea ti lalaki. ⁷ Ket idi naammoanna nga isuna ket adda iti turay ni Herodes, impatulodna ni Hesus ken ni Herodes, ta isuna ket adda met iti Jerusalem kadagidiay nga al-aldaw. ⁸ Idi makita ni Herodes ni Hesus, naragsakan isuna, agsipud ta nabayagen a tiempo a kayatna a makita isuna. Adda nangnangngegnan maipanggep kenkuana ken mangnamnama isuna a makakita kadagiti nakaskasdaaw nga aramidenna. ⁹ Adu dagiti saludsod ni Herodes kenni Hesus, ngem awan a pulos iti insungbatna kenkuana. ¹⁰ Timmakder dagiti panguloen a papadi ken kasta met dagiti eskriba, ket nakaro unay iti pammabasolda kenkuana. ¹¹ Ni Herodes ken dagiti suldadona ket linais ken pinag-gaangaawanda isuna. Ket kinawesanda pay iti napintas a pagan-anay, kalpasanna impasublida manen ken ni Pilato. ¹² Nagbalin nga aggayyem ni Herodes ken ni Pilato iti dayta met laeng nga aldaw, gapo ta idi ket agkabusor da nga dua. ¹³ Inayaban ni Pilato amin dagiti panguloen dagiti papadi ken dagiti agtuturay ken dagiti tattao, ¹⁴ ket kinunana kadakuada, "Indatagyo kaniak daytoy a tao nga kasla iti tao nga agar-aramid iti dakes, ken kitaenyo, Siak, nagsaludsodak isuna iti sangoananyo, awan masarakak a biddut daytoy a tao nga maipanggep kadagiti banbanag nga ipabpabasolyo kenkuana. ¹⁵ Saan, uray ni Herodes, isu nga insublina isuna kadatayo, ken kitaenyo, awan iti masarakak nga pakaigapuan iti pannakapapatayna. ¹⁶ Ngarud dusaek laeng isuna, ken sakonto palubosan." ¹⁷ Dagiti nasayaat a kadaanan nga kopya ket awan it paset ti Lukas 23:17, Ita, ni Pilato ket naobliga a palubosanna ti maysa a balud nga Hudio iti aldaw ti fiesta." ¹⁸ Ngem impukpukawda, a kunkunada, "Ipanawyo daytoy a lalaki, ket palubosanyo ni Barabas!" ¹⁹ Ni Barabas ket nakabalod gapu iti panagsukirna iti linteg ti siudad ken pammapatayna. ²⁰ Nagsao manen kadakuada ni Pilato, ta tarigagayna nga wayawayaan ni Hesus. ²¹ Ngem nagpukkawda a kunkunada, "Ilansa isuna, ilansa isuna." ²² Ket kinunana kadakuada iti maikatlo a gundaway, "Apay, ania iti dakes a naaramid daytoy nga tao? Awan iti masarakak a rason tapno madusa isuna iti pannakapapatay. Ngarud apaman a malpas ti pannakadusana, wayawayaakton isuna." ²³ Ngem impigpigsada pay ti nagpukkaw, ipapilitda a mailansa isuna iti krus. Ket ti timekda ti nangallukoy ken ni Pilato. ²⁴ Isu nga ingkeddeng ni Pilato a tungpalenna ti dawdawatenda. ²⁵ Pinalubosanna ti maysa a balud a dinawatda gapu iti panagrebelde ken panagpatayna. Ket intedna ni Hesus kadakuada tapno maaramidda ti kaykayatda. ²⁶ Iti panangipanawda kenkuana, nasabatda ti maysa a Simon a taga-Cirene, paumay a naggapu idiay pagilian, ket impabaklayda kenkuana ti krus, sada impasaruno ken ni Hesus. ²⁷ Adu a tattao, ken babbai nga agsangsangit ken agdungdung-aw para kenkuana, ti sumursurot kenkuana. ²⁸ Ngem tinalyawna ida, kinuna ni Hesus "An-annak a babbai ti Jerusalem, saankayo nga agsangit para kaniak, ngem agsangitkayo ketdi para iti bagbaggiyo ken para kadagiti annakyo. ²⁹ Ta kitaenyo, umayto dagiti al-aldaw ket kunaendanto, 'Nagasat dagiti baog ken dagiti tiyan a saan nga nagsikog, ken dagiti saan nga nagpasuso.' ³⁰ Ket kunaento dagiti tattao kadagiti bambantay, 'Tupakannakamin,' ken uraypay kadagiti turturod, 'Gaburannakamin.' ³¹ Ta no aramidenda dagitoy nga banbanag kabayatan nga naganus pay ti kayo, ania iti mapasamak no nagangonton?" ³² Adda pay sabali a lallaki, dua nga kriminal, ti maigiddan kenkuana a mapapatay. ³³ Idi makasangpetda iti lugar nga maawagan "Ti Bangabanga," idiayda nga inlansa isuna iti krus ken dagiti kriminal— maysa iti makannawanna ken ti maysa met iti makannigidna. ³⁴ Kinuna ni Hesus, "Ama, pakawanem ida, ta saanda nga ammo iti ar-aramidenda." Ken nagbibinnunotda, nagbibingayanda ti pagan-anayna. ³⁵ Sitatakder nga agbuybuya dagiti tattao kabayatan a lalaisen dagiti agtuturay isuna, kunkunada, "Insalakanna ti sabali. Bay-anyo nga isalakanna met ti bagina, no isuna ni Kristo ti Dios, ti napili." ³⁶ Pinagang-angawan pay isuna dagiti suldado, inasitganda isuna, inyawatanda iti suka, ³⁷ ken kunkunada, "No sika ti Ari dagiti Judio, isalakanmo ta bagim." ³⁸ Adda pay iti pagilasinan iti ngatoenna a kastoy, "Daytoy ti Ari dagiti Hudyo." ³⁹ Maysa kadagiti kriminal nga nailansa ti nanglais kenkuana a kunkunana, "Saan kadi nga sika ti Kristo? Isalakanmo ti bagim ken uray dakami." ⁴⁰ Ngem tinubngar ti maysa a kinunana, "Saanka kadi nga agbuteng iti Dios, ta agpapada iti naikeddeng a dusa tayo? ⁴¹ Saanta nga adda ditoy tapno agkalintegan, gapu ta rebbengna laeng nga agsagabata gapu kadagiti aramidta. Ngem awan ti madi nga inaramid daytoy nga tao." ⁴² Ken innayonna pay, "Hesus, laglagipennakto inton addaka iti pagariam." ⁴³ Kinuna ni Hesus kenkuana, "Pudno nga ibagak kenka, ita nga aldaw makipagyankanto kaniak idiay paraiso." ⁴⁴ Umadanin ti maikainnem nga oras, ken immay iti sipnget ti intero a daga agingga iti maikasiam nga oras nga ⁴⁵ saan a naglawag ti init. Ket iti kurtina ti templo, napigis iti dua. ⁴⁶ Nagsangit ni Hesus iti napigsa, ket kinunana, "Ama, kadagita imam iyawatko iti espirituk." Apaman a naibalikasna daytoy, natayen isuna. ⁴⁷ Idi makita ti kapitan dagiti suldado no ania iti napasamak, nagdaydayaw isuna iti Dios a kunkunana, "Agpayso a nalinteg daytoy a tao." ⁴⁸ Idi immay dagiti adu a tattao nga naguummong tapno mangsaksi iti daytoy banag a napasamak, nagsublida ket dinandanogda iti barukongda. ⁴⁹ Ngem amin dagiti am-amona, ken dagiti babbai nga simmurot kenkuana manipud Galilea, ket nakatakder iti saan unay nga adayo, a mangbuybuya kadagitoy a banbanag. ⁵⁰ Pagammoan, adda maysa a lalaki a managan Josef, a kameng iti konseho. Isuna ket nalinteg ken nasayaat a tao. ⁵¹ Daytoy nga tao ket saan nga imanamong kadagiti plano ken aramidda. Naggapo isuna manipod idiay Arimatea, maysa nga siudad dagiti Hudio, ken agur-uray iti iyuumay ti pagarian iti Dios. ⁵² Daytoy nga tao, ket napan kenni Pilato, ket nakitungtong nga alaenna iti bagi ni Hesus. ⁵³ Imbabana daytoy, binalkotna iti pino nga lino, ket sana impaidda iti pagitaneman a nagudwa iti bato, nga awan pay iti nangusar. ⁵⁴ Aldaw idi ti Panagsagana, ken umadanin nga agrugi ti Aldaw ti Panaginana. ⁵⁵ Dagiti babbai nga simmurot ken ni Hesus manipud Galilea ket simmaruno ken nakitada ti tanem ken no kasano ti pannakaipaidda ti bagina. ⁵⁶ Nagsublida ket insaganada dagiti bangbanglo ken lanlana. Ket iti Aldaw ti Panaginana, naginanada a kas maiyannurot iti bilbilin.