¹ Ita umadanin ti Fiesta iti Tinapay nga awan Lebadurana a maawagan iti Paskua. ² Nagnunumoan dagiti panguloen ti papadi ken dagiti eskriba no kasanoda nga ipapatay ni Hesus, gapu ta mabutengda kadagiti tattao. ³ Simrek ni Satanas ken ni Judas, isuna ti maaw-awagan nga Iskariote, maysa kadagiti sangapulo ket dua. ⁴ Ni Judas ket napan nakisarita kadagiti panguloen ti papadi ken kadagiti kapitan no kasanona nga iyawat ni Hesus kadakuada. ⁵ Naragsakanda amin ket nagnunumoanda a bayadanda isuna iti kuarta. ⁶ Immannugot isuna ket nangbirok iti gundaway tapno iyawatna kadakuada ni Hesus nga adayo kadagiti adu a tattao. ⁷ Nadanon ti aldaw ti tinapay nga awan lebadurana, nga isu iti panangidaton ti kordero para iti Paskua. ⁸ Imbaon ngarud ni Hesus da Pedro ken Juan, a kunana, "Inkayo ket isaganayo ti makan a maipaay iti Paskua, tapno mangantayo." ⁹ Sinaludsodda isuna, "Sadino ti kayatmo nga pangisaganaanmi?" ¹⁰ Simmungbat isuna kadakuada, "KItaenyo, no nakastrekkayon iti siudad, adda maysa a lalaki nga nakabaklay iti pitsel ti danum a sumabat kadakayo. Surutenyo isuna agingga iti balay nga papananna. ¹¹ Ket ibagayo iti makinbalay, 'Kuna iti Maestro kenka, "Sadino iti siled a pangsangailian, nga panganak iti Paskua a kaduak dagiti adalak?" ¹² Ipakitananto kadakayo ti naisagana a nalawa nga siled. Sadiay ngarud iti pangidasaranyo." ¹³ Napanda ngarud, ket nasarakanda amin a kas iti inbagana kadakuada. Ket insaganada ti pannangan iti Paskua. ¹⁴ Idi nadanon iti tiempo, nakitugaw kadagiti adalan. ¹⁵ Ket kinunana kadakuada, "Tarigagayak nga makipangan kadakayo iti daytoy nga Fiesta iti Paskua sakbay nga agsagabaak. ¹⁶ Ta ibagak kadakayo, saanakto a makipangan manen iti daytoy aginggana a matungpal ti pagarian ti Dios." ¹⁷ Nangala ngarud ni Hesus iti kopa, ken nagyaman, a kinunana, "Alaenyo daytoy, ken ibingayyo iti tumunggal maysa kadakayo. ¹⁸ Ta ibagak kadakayo, saanakto nga uminom manen iti bunga ti ubas aginggana nga umay ti pagarian ti Dios." ¹⁹ Ket nangala iti tinapay, kalpasan nga nagyaman, pinisi-pisina, ken inyawatna kadakuada, a kunana, "Daytoy ti bagik, a maipaay kadakayo. Aramidenyo daytoy a pananglaglagip kaniak." ²⁰ Nangala ti kopa kalpasan a nangrabii, a kunana, "Daytoy a kopa ti baro a tulag iti darak, nga isu a naibukbok a maipaay kadakayo. ²¹ Ngem dumngegkayo. Ti mangliput kaniak ket adda ita a kaduak ditoy lamisaan. ²² Ta ti Anak ti Tao ket pudno nga agturong iti nakaitudinganna. Ngem asi pay dayta nga tao a mangliput kenkuana!" ²³ Ket rinugiananda ti nagsisinnaludsod iti tungal maysa no siasino kadakuada ti mangaramid iti daytoy a banag?" ²⁴ Ket adda rimsua a panaga-apa kadakuada no siasino ti maibilang a katan-okan. ²⁵ Kinunana kadakuada, "Dagiti Ar-ari ti Hentil ket addaan turay kadakuada, ket ti siasinoman nga addaan panagturay kadakuada isu ti maawagan a naimbag. ²⁶ Ngem saan a rumbeng nga maaramid daytoy kadakayo. Ngem ketdi, maaramid nga ti katatan-okan kadakayo agbalin nga isu ti kasla kaubingan ken kasta met nga iti mangidadaulo ket kasla isu iti agserbi. ²⁷ Siasino kadi iti natan-ok, diay kadi nakatugaw iti lamisaan, wenno diay agidasdasar? Saan kadi nga isu diay nakatugaw iti lamisaan? Ngem addaak kadakayo a kas maysa nga agserserbi. ²⁸ Ngem nagtalinaedkayo a kaduak iti amin a pannakasuotko. ²⁹ Pagturayenkayo iti pagarian, uray piangturaydak ni Amak iti pagarian, ³⁰ tapno mangan ken uminumkayo iti lamisaan ti pagariak, ken agtugawkayo kadagiti trono nga ukomenyo dagiti sangapulo ket dua a tribo ti Israel. ³¹ Simon, Simon, agannadka, dinawatnaka ni Satanas, tapno taepannakayo a kas trigo. ³² Ngem inkararagankayo, nga ti pammatiyo ket saan nga agkapoy. Ket inton agsublika manen, papigsaem dagiti kakabsatmo." ³³ Kinuna ni Pedro kenkuana, "Apo, nakasaganaak nga sumurot kenka sadiay pagbaludan ken iti patay." ³⁴ Simmungbat ni Hesus, " Ibagak kenka, Pedro, saanto pay nga nagtaraok ti kawitan itatta nga aldaw, sakbay nga ilibaknak iti tallo a daras nga am-ammonak." ³⁵ Kalpasanna kinuna ni Hesus kadakuada, "Idi inbaonkayo nga awanan pitaka, nakasupot a makan, wenno sapatos, nagkasapulankayo kadi?" Ket simmungbatda, "Awan." ³⁶ Ngarud kinunana kadakuada, "Ngem itatta, ti addaan pitaka, alaenna latta, agraman ti nakasupot a makan. Siasinoman nga awanan kampilan ket ilakona ti kagayna ket gumatang iti maysa. ³⁷ Ta ibagak kadakayo, no ania man ti naisurat maipanggep kaniak ket masapol a matungpal, 'Ket naibilang isuna a kas maysa nga saan a nalinteg.' Ta aniaman a naipadto maipanggep kaniak ket isu iti matungpal." ³⁸ Ket kinunada, "Apo, kitaem! Adtoy ti dua a kampilan." Simmungbat ni Hesus kadakuada, "Umanayen." ³⁹ Napan ni Hesus, a kas iti kanayon nga ar-aramidenna, idiay Bantay ti Olibo, ken simmurot dagiti adalanna. ⁴⁰ Idi nakadanonda, kinunana kadakuada, "Agkararagkayo tapno dikay sumrek iti pannakasulisog." ⁴¹ Immadayo isuna manipud kadakuada iti saan unay nga adayo, ket nagparintumeng ken nagkararag, ⁴² a kinunana, "Ama, no pagayatam, ikkatem daytoy nga kopa manipud kaniak. Numanpay kasta saan nga iti pagayatak. No di ket ti pagayatam ti mapasamak." ⁴³ Ket nagparang ti maysa nga anghel a naggapu sadi langit, a nangpapigsa kenkuana. ⁴⁴ Kabayatan nga agsagsagaba, sipipinget a nagkararag isuna, ket ti ling-etna kasla dara a nagtedted iti daga. ⁴⁵ Idi timmakder isuna manipud iti panagkararagna, napan kadagiti adalan ket nasarakanna ida a matmaturog gapu iti ladingitda, ⁴⁶ ket nagsaludsod kadakuada, " Apay a matmaturogkayo? Bumangonkayo ken agkararagkayo, tapno saan kayo a sumrek iti pannakasulisog." ⁴⁷ Idi madama nga agsasao pay laeng, adtoy, nagparang ti adu nga tattao, kaduada ni Hudas, maysa kadagiti sangapulo ket dua, nga isu ti nangidaulo kadakuada. Immasideg ken ni Hesus tapno agkanna, ⁴⁸ ngem kinuna ni Hesus kenkuana, "Hudas, traydurem kadi ti Anak ti Tao babaen iti agep?" ⁴⁹ Idi nakita dagiti adda iti aglawlaw ni Hesus no ania iti mapaspasamak, kinunada, "Apo, tagbatenmi kadi isuda iti kampilan?" ⁵⁰ Ket tinagbat ti maysa kadakuada ti adipen ti panguloen dagiti papadi, ken piningasanna ti makannawan a lapayagna. ⁵¹ Kinuna ni Hesus, "Uston dayta." Ket sinagidna iti lapayag ti adipen, ket pinaimbagna. ⁵² Kinuna ni Hesus kadagiti panguloen ti papadi, agraman kadagiti kapitan ti templo, ken panglakayen, nga immay bumusor kenkuana, "Umaykayo kadi a kas maibusor iti agtatakaw, nga adaan iti kampilan ken pang-or? ⁵³ Idi addaak kadakayo iti inaldaw idiay templo, saanyo nga impatay dagiti imayo kaniak. Ngem daytoy ti orasyo, ken iti panagturay ti sipnget." ⁵⁴ Tiniliwda ni Hesus, ket inyadayoda isuna ken impanda iti balay ti panguloen iti papadi. Ngem simmursurot ni Pedro iti saan unay nga adayo. ⁵⁵ Kalpasan a nagsindida iti apoy ti tengnga ti makinruar a paraangan ken nagtugawda a sangsangkamaysa, nakitugaw met ni Pedro iti nagtetengngaanda. ⁵⁶ Maysa nga adipen a babai ti nakakita kenkuana a nakatugaw iti masilsilawan nga apoy ket minatmatanna isuna ken kinunana, "Daytoy nga tao ket kaduana met laeng." ⁵⁷ Ngem inlibak ni Pedro daytoy, a kinunana, Babai, saanko nga am-ammo isuna." ⁵⁸ Kalpasan ti sumagmamano a kanito adda iti sabali a nakakita kenkuana, ket kinunana, "Maysaka met kadakuada." Ngem kinuna ni Pedro, "Lalaki, saan a siak." ⁵⁹ Kalpasan ti agarup maysa oras nga impapilit ti maysa pay a lalaki a kinunana, "Pudno nga daytoy a tao ket kaduana met laeng, gapu ta isu ket taga Galilea." ⁶⁰ Ngem kinuna ni Pedro, "Lalaki, saan ko nga ammo dayta ibagbagam." Ket dagus, kabayatan nga agsasao pay laeng isuna, nagtaraok iti kawitan. ⁶¹ Timmalyaw, ti Apo ket kimmita ken ni Pedro, ket nalagip ni Pedro ti sao ti Apo, idi a kinunana, "Sakbay nga agtaraok iti kawitan ita nga aldaw ket ilibaknakto iti mamitlo a daras. ⁶² Rimmuar ni Pedro ket nagsangit iti nasaem. ⁶³ Ket dagiti lalaki a nang-igem kenni Hesus iti kustodiya ket linalais ken dinangranda isuna. ⁶⁴ Kalpasan nga kinumutanda ti matana ken sinaludsodda isuna, a kinunada, "Pugtuam! Siasino ti nangdangran kenka?" ⁶⁵ Nagsaritada iti adu a banbanag nga maibusor ken ni Hesus, ken tinabtabbaawanda. ⁶⁶ Idi bumigbigaten, naguummong dagiti panglakayen ti umili, karaman dagiti panguloen a papadi ken dagiti eskriba. Impanda ni Hesus iti Pangukuman, ⁶⁷ a kunada, "No sika ti Kristo, ibagam kadakami." Ngem kinunana kadakuada, "No ibagak kadakayo, saanyo met a patien, ⁶⁸ ket no salodsudenkayo, saankayo met a sumungbat. ⁶⁹ Ngem manipud ita, agtugawto ti Anak ti Tao iti makanawan nga ima iti pannakabalin ti Dios." ⁷⁰ Kinunada amin, "Ket sika ngarud ti Anak ti Dios?" ket kinuna ni Hesus kadakuada, "Dakayo ti nangibaga a Siak." ⁷¹ Kinunada, "Apay a kasapulantayo pay laeng ti mangsaksi? Ta nangngegantayo amin manipud iti ngiwatna."