लिउ ३
1
कुर्क्यक् गलातितिवा! सि दुक्टे मिक् तिवि खिराङ्ला लाका ना ताङ्सुङ् ? काङ् खिरे मिगि दङ्ला येशु ख्रिष्ट ग्याङ्श्यिङ्ला कालुप् ताम् छ्या तेन्दुप् मिन् ?
2
ङा खिराङ् नेसुर् दि ताम क्याजिक् छ्या ङेतुप् सेम्बा किउइ । काङ् खिरेकि थुचेङिला ठिम् दगेकि लाका तिवा क्यानि ङेतुप् हिन्ना खिरेकि कोतुप् ताम्ला मोवा क्यानि ङेतुप् हिन्?
3
काङ् खिराङ् दिजो आला कुवा च्युङ्गुप् वे ? काङ् ता जुवुला सिन्दुप् सिनि खिरेकि थुला किरुप् ज्युबु हिन् ?
4
हुतुङ् ति हुतुङ् सेम् किर्मु वतुप् हन्सिन् खिरेकि तिजराङ् दिजो आला ताम् तिवा छ्या ङेतुप् ना ?
5
तिनक् हिन्सिन्, सिकि खिराङ्ला थुचेङि तेर्क्यु, खिरे पार्ला ङा छ्येकि लाका नेवा यग् किउइ, काङ् खोकि दि ठिम् दगेकि लाका तिवि किसाला क्याबु हिन्ना मोवा क्याबु कोतुप् कि किसाला?
6
अब्राहामकि "कन्ज्यकला मोवा क्यानि खो कन्ज्यककि मिङाला दिक्पा मेतुप् छ्युङ्सुङ्।"
7
दिनक् हिन्सिन्, दुक्राङ् क्यानि दि हाक् कोसा, मोवा किरुप् तिवा राङ् अब्राहामकि गिपा हिन्।
8
दिक्पा मेतुप् छ्योकि तङ्ला दि थोङ्गुप् वे, कन्ज्यककि यहुदि मिन्दुप् तिवाला मोवा नेसुर् दिक्पा मेतुप् जेउइ। अब्राहामला तङ्लाराङ् लेन् ल्यामु बिन्दुप् नक्, "ख्योङ् नेसुर् राङ् जाम्बुलिङ्ला वतुप् तेरिक् मिरिक् तिविकि मलाम् ङेक्यु।"
9
तिकिकिसाल, सु तानि मोवा वे, तिवा अब्राहाम तानि मलाम च्युङुउइ, तिराङ् अब्राहाम् तानिङ् मोवा वतुप् नक्।
10
ठिमकि लाका तिवाला रेतुप् तिवा मता सुगुउइ। चिला सिसिन् दुक् क्यानि टिबु वे "ठिमला टिबु तेरिक् ताम् तिवा मेङेन्बु तेरिक्ला मता सुगिद्।"
11
ता दि तेरिक्ला छ्या वे, कनज्यककि सुलाङ् ठिम् नेसुर् दिक्पा मेतुप् मोजोउइ, चिला सिसिन् "दिक्पा मेतुप् मि मोवा नेसुर् राङ् थार्क्यु।"
12
ठिम मोवा नेसुर् लेबु मिन्, हिन्सिनाङ् तिकि छ्याला, "सिकि ठिम्ला वतुप् ताम् तिवा किउइ तिकि ठिम् दगेराङ् मिजि क्योङुउइ।"
13
ङेराङ्ला सिनि ख्रिष्ट मता सुङ्नि खोकि ङेराङ्ला ठिमकि मता नेसुर् थारे ज्याक्सुङ्। चिला नसिसिन् दिनक् टिबु वे, "श्यिङ्ला गोरुप् तेरिक्ला मता सुगुउइ ।"
14
दिकि किचिम् क्योलुप् ति दि राङ् नक्, अब्राहामला वतुप् मलाम् ख्रिष्ट येशुनेसुर् यहुदि मिन्दुप् तिवि पार्ला हुङ् थुप्सित्, ङेरेकि मोवा नेसुर् थु चेङिकि ना ङे थुप्सित् ।
15
नुक तिवा, ङा मि तिविकि छिक्ला ताम् किउइ। खेप्चिक् टेगे च्युङ्नि सिन्दुप् मिकि जोबु सेन्गि-टिवा ना सिकि ना तोङुउइ ना तिला काङ् थि मुथुउइ।
16
ता दि ना तिवा अब्राहाम ताङ् तिकि गिपातिवाला बिन्दुप् नक्। दिकि मेरा आलाला ङो श्येवा किरुप् क्यानि "गिपातिवाला" सिइ, हिन्सिनाङ् दिकि छ्यला "ख्यरे गिपाला" सिनि दिकि मेरा चिक्ला क्याजिक् ङो श्येवा किउइ, तिदि ख्रिष्ट हिन्।
17
ता ङा दि सिउइ । कन्ज्यककि तङ्लाराङ् ज्वप् ज्युवु नाला लो ४३० तिङ्ला लेबु ठिम कि ना मोतोङुउइ।
18
चिला सिसिन् तङि ओङ्ति ठिम नेसुर् लेबु हिन् सिसिन्, दि हादा ना नेसुर् मेङु हिन्। हिन्सिनाङ् कन्ज्यककि ना नेसुर् अब्राहामला दि तिजराङ् बिन्सुङ्।
19
तिनक् हिन्सिन् ठिम चिला बिन्सुङ् ते ? ति ना क्यालुप् ते अब्राहाम कि गिपा मेङु साक् मेलेवा लाकाकि किसाला ठिम थितुप् नक्। दि ठिम च्यिक् पार्कि दाल्जा कितुप् मि लाक्पानेसुर् देवाचेनकि थु तिवा नेसुर् किरु ज्युबु हुन्।
20
तान्दा पार् कितुप् तिकि मेराचिक् सिना ल्हाक्पा मिला छ्या देन्ग्यु, हिन्सिनाङ् कन्ज्यक चिक्राङ् वे।
21
तिनक् हिनसिन्, काङ् ठिम कन्ज्यककि ना तिवि खाला वे ते ? नाम्लाङ् मिन्! चिला सिसिन् हुतुङ् मिजि तेर्थुबु ठिम बिन्दुप् हिन्सिन्, हुतुङ्राङ् तिराङ् ठिम नेसुर् दिक्पा मेतुप् हुङ्गुप् नक्।
22
तिकि छ्यला, दिक्पाकि दङ्ला वतुप् तेरिक् ताम्ला दिक्पा मेतुप् छ्योकि चोन्खाङ्ला ज्याक्सुङ्। कन्ज्यककि कि क्यासुङ् चिला सिसिन् येशु ख्रिष्टला मोवा नेसुर् ङेराङ्ला थार्वा तेरुप् खोकि नाला मोवा किरुप् तिवाला तेर्थुसप्सित् ।
23
ख्रिष्टला मोवा हुङ्गुप् सिना तङ्ला मोवाकि टाक् मेङु साक् ङेराङ् ठिम नेसुर् चोन्खाङ्ला तिजोला क्याजिक् वतुप् हिन्।
24
तिकि किसाला, ङेराङ् मोवा नेसुर् दिक्पा मेतुप् च्युङ्गुप् सिनि ख्रिष्ट मेङु साक् ठिम अरे क्योर्वा च्युङ्सुङ् ।
25
ता मोवा लेम्नि ख्योलुकि किसाला ङेराङ् चिन्दिङ् क्योर्वाकि दङ्ला मेत्।
26
चिला सिसिन् ख्रिष्ट येशुला मोवा नेसुर् खिराङ् तेरिक् कन्ज्यककि पुज्युङ् तिवा हिन् ।
27
खिरे नाङ्ला तेरिक् मितिविकि ख्रिष्ट येशुला बप्तिस्मा च्युङ्सुङ्, खिराङ् दाक्पिराङ् ख्रिष्ला कोन्दुप् वे।
28
ता ना यहुदा वे ना ग्रिक्, ना यक्पु वे ना जोल्मु क्यानि ताङ्गुप्, ना पुज्युङ् वे ना पुमा, चिला सिसिन् ख्रिष्ट येशुला खिराङ् तेरिक् चिक्राङ् हिन्।
29
हुतुङ् खिराङ् ख्रिष्टकि हिन्सिन् खिराङ् अब्राहामकि गिपा तिवा हिन्, ना क्यालुप् दगे क्यानि ओङ् ङेतुप् तिवा हिन् ।