1
पर भैया औ, समय और बेराके बारेमे तुमके कुछु लिखनके जरुरत ना हए ।
2
काहेकी तुम अपनए अच्छेसे जन्त हौ, प्रभुको दिन त रातमे चोर आत कता अबैगो ।
3
"जब आदमी "शान्ति और सुरक्षा" कहमंगे, तव गर्भवती बैयर बेथा लागो कता अचानक बिनके उपर विनाश आए लगेहए, और बे कोइ रितिसे नाबाँचपएहँए ।"
4
पर भैया औ, तुम अन्धकारमे ना हाै,और बा दिन तुमके चोर जैसो चकित ना परे हए ।
5
कहेकी तुम सब ज्योतिके सन्तान और दिनके सन्तान हौ । हम रातके और अन्धकारके सन्तान ना हए ।
6
जहेमारे और कता हम ना सोमए, पर जागे बैठए, और सचेत होमए ।
7
काहेकी सोनबारे रातमे सोतहँए, और दारु पिके नशाहोनबारे रातए मे नशाहोतहँए ।
8
पर हम त दिनके हँए बहेमारे हम सचेत होमए, और विश्वास और प्रेमको छातीको पाता और मुक्तिको आशाको टोप लगयँ ।
9
काहेकी परमेश्वर हमके क्रोधके ताहिँ ना हए पर हमर प्रभु येशू ख्रीष्टसे मुक्ति पानके ताहिँ अग्गुसे चुनि हए ।
10
येशु हमर ताहिँ मरो, ताकि हम जागे वैठए और सोन बारे हम सब, बाके साथमे जि सकएँ ।
11
जहेमारे एक दुसरेके हौसला देओ, और एक दुसरेके बलियो बनान काम करए, जैसी तुम करत फिर हौ ।
12
पर भैया रेव, हम तुमके आग्रहपुर्वक बिन्ती करत हँए, कि तुमरे बीचमे परिश्रम करन बारे, जो प्रभुमे अगुवा हँए और तुमके शिक्षा देतहँए, बिनके आदर करऔ ।
13
और बिनके कामके ताहिँ बिनके प्रेम साथ बहुत बणो आदर करऔ ।
14
भैया रेव, हम तुमके अर्ती देतहँए कि अल्छिनके शिक्षा देओ । हरेस खानबारेनके हिम्मत देओ । कमजोरनके मद्दत करऔ । बे सबके सहनशीलता दिखओ ।
15
याद राखओ, कोइ खराबीको बदलामे खराबी मत करओ, पर एक दुसरे और सबके संग सबदिन भलाइ करनके बिचार करओ ।
16
सबदिन आनन्दित रहौ ।
17
निरन्तर प्रार्थना करत रहौ ।
18
सब परिस्थितिमे धन्यबाद देओ, काहेकी ख्रीष्ट येशूमे तुमरे ताहिँ परमेश्वरको इच्छा जहे हए ।
19
पवित्र आत्माके मतनिभाओ ।
20
अगमवाणीके खराब मत ठानओ ।
21
सब बातके जाँच करऔ| जौन बात अच्छाे हए बोमे पक्के बनेरहौ ।
22
सब किसिमको खराबीसे अलग बठओ ।
23
शान्तिको परमेश्वार अपनए पुरो रुपसे तुमके चोखो बनाबए, और तुमर सबय आत्मा, प्राण और शरीर हमए प्रभु येशू ख्रीष्टको आगमनमे पबित्र राखए।
24
तुमके बुलान बारो विश्वासयोग्य हए, बा जा करैगो।
25
भैया औ, हमर ताहिँ प्रार्थना करऔ।
26
सब भैयनके पवित्र चुम्बनसे अभिवादन करऔ।
27
मए तुमके प्रभूमे अनुरोध कर्त हौ कि जा चिठ्ठि पढके सबए भैयनके सुनाए देओ।
28
हमर प्रभु येशू ख्रीष्टको अनुग्रह तुमरमे रहाबए।