1
भैया रेओ, मए तुमके प्रचार करो सुसमाचार मए तुमके याद दिलान चाहत हौ, जौन सुसमाचार तुम ग्रहण करे, और जोमे तुम स्तिर रहतहौ ।
2
जा सुसमाचारसे तुमर उध्दार भौ हए, अगर जामे तुम अटल रहबैगे कहेसे, नत तुम व्यर्थैमे विश्वास करहौ ।
3
काहेकी मए जो पाओ बो सबसे मुख्य विषयके रुपमे तुमके सौपदाओः ,अथवा पवित्र धर्मशास्त्र अनुसार ख्रीष्ट हमरो पापके ताँहि मरो रहए ।
4
बो गणो रहए, और पवित्र धर्मशास्त्र अनुसार तिसरो दिनमे बो फिर जिन्दा भव रहए ।
5
बो केफासठीन, और बाह्र जनै चेलाठीन दिखानो रहए ।
6
पिच्छु बो एकै समयमे पाँच सयसे जद्धा भैयाठीन एकसंग दिखानो रहए, जे मैसे बेढम अभेसम्म हँएँ । पर कोइ-कोइ मरिगए हँएँ ।
7
फिर पच्छु याकूब और सब प्रेरितठीन बो दिखानो रहए ।
8
सबसे पिच्छु असमयमे जन्मो आदमीठीन जैसो मिरठीन फिर बो दिखानो रहए ।
9
काहेकी प्रेरितमैसे मए सबसे तुच्छ हौ । मए प्रेरित कहनको योग्य ना हौ । काहेकी मए परमेश्वरको मण्डलीके सताओ ।
10
पर मए जो हौँ परमेश्वरको अनुग्रहमे हौँ और मोएमे भौ बाको अनुग्रह बिना कामको ना रहए ।बरु मए बे सबसे जाधा काम करो ।तहु फिर मए ना पर मोएमे काम करनबारो परमेश्वरको अनुग्रह रहए ।
11
जहेमारे मए भव फिर अथवा बे भए फिर, हम जो प्रचार करत हँए, सो तुम विश्वास करे हौ ।
12
मरो भएनसे ख्रीष्ट पुनरुत्थान भौ कहिके प्रचार करीहए कहेसे कैसे तुमरमैसे कोइ-कोइ मरके पुनरुत्थान ना हुइहए कहिके कहन सिकैगे?
13
पर अगर मरके पुनरुत्थान ना हुइहए कहेसे ख्रीष्ट फिर मरके पुनर्जीविन ना भौ हए ।
14
अगर ख्रीष्ट मरके पुनर्जीवित ना भौ हए कहेसे हमर प्रचार व्यर्थ हए, और तुमर विश्वास फिर व्यर्थ हए ।
15
बासे जद्धा हम परमेश्वरके बारेमे झूठो साक्षी ठहरत हँएँ, काहेकी ख्रीष्टके मरके पुनर्जीवित करीहए कहिके हम परमेश्वरको बारेमे गवाही देत हँए । पर नेहत्व मरके पुनरुत्थान ना हुइहए कहेसे बो ख्रीष्टके पुनर्जीवित ना करी हए ।
16
काहेकी अगर मरो भव पुनरुत्थान नाए हुइहए त ख्रीष्ट फिर मरके जिन्दा नाए भव हए ।
17
ख्रीष्ट पुनर्जीवित ना भौ हए कहेसे तुमर विश्वास व्यर्थ हए, और तुम अभेसम्म अपन पापमे हौ ।
18
तभि त ख्रीष्टमे मरनबारे फिर नष्ट भए हँए ।
19
अगर जा जीवनके ताँहि इकल्लो ख्रीष्टमे हम आशा करेहँए कहेसे हम सबए आदमीसे जद्धा दयनीय हँएँ ।
20
वास्तवमे ख्रीष्ट मरके जिन्दा भौ हए । मरोमैसे बो त पहिलो फल बानो हए ।
21
काहेकी जैसी एक जनै आदमीसे मृत्यु आओ, अइसी मरनके पुनरुत्थान फिर एक जनै आदमीसे आओ ।
22
काहेकी जैसी आदममे सब मर हँएँ, अइसी करके ख्रीष्टमे सब जिन्दा हुइहँएँ ।
23
पर सबए बात अपनो-अपनो क्रमअनुसार हुईहएः ख्रीष्ट त अगौटे फरा हए, और पिच्छु ख्रीष्टमे भौ बाको आन बालो समयमे जिन्दा करो जए हए ।
24
तव अन्तमे आए हए, जब बाको हरेक शासन, हरेक अख्तियार और शक्ति नष्ट करके परमेश्वर, पिताको हातमे सौंपदेहए ।
25
काहेकी बो अपन सारा शत्रुके अपन पाओँ तरे ना करनतक बा राज्य करैगो ।
26
नष्ट करनबारो अन्तिम शत्रु मृत्यु हए ।
27
"काहेकी परमेश्वर सबै बात बाके पाउतरे अधिनमे धरी हए ।" पर जा त स्पष्ट हए, कि "सबै बात बाके अधिनमे धरीहए" जहेमारे परमेश्वर अपनए जा अधिनमे ना हए, जो सब बात ख्रीष्टको अधिनमे धरदै हए । "
28
जब सब बात बाके अधिनमे लातहँए, तव स्वयम पुत्र बाको अधिनमे होतहए, जो सब चिज बाके अधिनमे धरत हए, ताकि परमेश्वर सब चिज सर्वेसर्वा होबए ।
29
नत मरेभएके ताहि बप्तिस्मा लेनको अर्थ का भौ ? मरेभए जिन्दा नाए हुईके फिर त बिनके ताहि आदमी काहे बप्तिस्मा लेतहए ?
30
मए काहे हरघड़ी जोखिममे पणतहौँ।
31
भैया तुम, हमर प्रभु येशूमे तुमर कारन मए गर्व करत हौ, और मए कहन सिक्त हौ, कि प्रत्येक दिन मए मरत हौ ।
32
आदमीको बात करन हए कहेसे, एफिससमे जङ्गली जनावरसंग मिर लड़ाईमे मोके का फाइदा भौ? मरोभव जिन्दा ना हुईतो तव, “हम खामै और पिमएव, काहेकी कल त हम मरजए हँए ।”
33
भ्रममे मत पणओ । खराब सङ्गत अच्छो चरित्रके नष्ट करत हए ।
34
होशमे होबौ, अब पाप मत करौ । काहेकी कित्तोके त परमेश्वरको ज्ञान ना हए । तुमके सरमबान ताँहि मए जा कहो हौ ।
35
"पर कोइ पुछैगो ""मरो भव कैसे जिन्दा हुई हए? और बे कैसो प्रकारको शरीर लैके आतहँए?”
36
तुम कित्तो अन्जान हौ! जो लगात हौ बा नमरन तक ना जमत हए ।
37
जो तुम लगात हौ बा त पिच्छु होनबारी शरीर ना हए , पर बीज इकल्लो हए ।, चाहे बो गेहूँ, अथवा और कोइ किसिमको अन्न होबए।
38
पर अपनाके खुशी लागोजैसो परमेश्वर बोके एक शरीर देतहए, और सबए किसिमको बीजके बा अपन शरीर देबैगो ।
39
सबए शरीर एक किसिमको ना होत हए । आदमीको शरीर एक किसिमको, और पशुको दुसरो किसिमको, चिरैंयाँको औरे किसिमको, और मछ्रीको औरे किसिमको शरीर होतहए ।
40
तौ शरीर फिर स्वर्गीय और मट्टीको होत हए । स्वर्गीय शरीरको तेज एक किसिमको हए, और मट्टीको शरीरको तेज औरे किसिमको होतहए ।
41
दिनको तेज एक किसिमको, जोनीको तेज दुसरे किसिमको, और ताराको तेज औरे किसिमको होत हए । काहेकी एक तारा औरो तारा से फरक तेजको होत हए ।
42
मरनके पुनरुत्थान फिर अइसी हए । जौन शरीर विनाशमे गणत हए । बो विनाशीमे जिन्दा होत हए ।
43
अनादरमे बो गणत हए, महीमामे बो जिन्दा होत हए । दुर्बलतामे बो गणत हए,शक्तिमे बो जिन्दा होतहए ।
44
प्राकृतिक शरीरमे बो गणत हए, आत्मिक शरीरमे बो जिन्दा होतहए । प्राकृतिक शरीर हए कहेसे आत्मिक शरीर फिर अवश्यक हए ।
45
जहेमारे अइसो लिखो हए, “पहिलो आदमी आदम जीवित प्राणी भौ ।” अन्तिमे आदम जीवन देनबारो आत्मा भौ ।
46
पहिलो आत्मिक नैयाँ, पर प्राकृतिक हए, और पिच्छुबारो आत्मिक रहए ।
47
पहिलो आदमी मट्टीसे बानो रहए, पृथ्वीसे हए । दुसरो आदमी स्वर्गको हए ।
48
मट्टीसे बानो आदमीजैसो रहए, मट्टीसे बने फिर अइसी होतहँए, और स्वर्गीय आदमी जैसी हए, स्वर्गके फिर अइसी होतहँए ।
49
जैसी हम मट्टीको आदमीको रूप धारन करेहँए । अइसी स्वर्गके आदमीके रुप धारण कर हँए ।
50
अब भैया , मए तुमके जा कहत हौ, कि मासु और रगत स्वर्गको राज्यको हकदार ना होत हए, नत विनाश अविनाशको हकदार हुइपए हए ।
51
देखओ, मए तुमसे एक रहस्य कहत हौँ हम सबय ना मरङगे , पर हम सबको परिवर्तन होबैगो ।
52
एकछिनमे, आँखीको एक टिमकनमे, तुरहीको आवाजमे काहेकी, तुरही बजहए, और मरेभए अविनाशी हुइके जिन्दा हुइहए । और हमर परिवर्तन हुइहए ।
53
काहेकी जा विनाशी स्वभाव अविनाशी, और जा मरनबारो शरीर अमरत्व धारन करन पणैगो ।
54
जब विनाशी अविनाशी और मरणशील अमरत्व धारण करहए, तव लिखो भौ बा वचन पूरा होबैगो, “मृत्यु विजयमे निलगओ हए ।”
55
"ए मृत्यु, तेरो विजय कहाँ? ए मृत्यु, तेरो खिला कहाँ ?”"
56
मृत्युको खिला पाप हए, और पापको शक्ति व्यवस्था हए ।
57
पर परमेश्वरके धन्यवाद होबए, जो हमके हमर प्रभु येशू ख्रीष्टसे विजय देतहए ।
58
जहेमारे प्यारे भैया तुम, स्थिर और अटल होबओ । प्रभुको काममे सबदिन व्यस्त रहौ । काहेकी तुम जानतहौ, कि प्रभुमे तुमर परिश्रम व्यर्थ ना होतहए।