¹ Po mo kwasha amashiku ghabili agha pa sakaka sona nakabalilo kakulya ichabama chochita nifilungo. Aputi abosongo nabasimbi bakalonda mumwo bangamukolela u Yesu mubuchefuchefu nukumughogha. ² Po bakatingi, ''osati pakabalilo kakusekelela, ukuti manye bise bapangishe ifyongo kubandu.'' ³ U Yesu akaba ku Betaniya munyumba ya Simoni uwa mambombo, po akanoshanga pa mesa, umukolo yumo akisa ni supa yamafuta aghakunungila akabwafula ichikupikisho chapamwana namafuta ghakamukupukila pamutu. ⁴ Lole abandu bamo wakakala. Wakayugha pabene bakati, ''choni chicho bakukomania? ⁵ Amafuta agha ngali ghaghulishiwa nindalama shakupululila amadinale fili handiledi, nukubaghabila abapina.'' Po bakamukalalila umukolo yula. ⁶ Lole uysu akati, ''muleke mwene. Chifukwa chiki mukumutamia?Abomba ifindu ifisa sana kukwangu. ⁷ Muli nabapina akabalilo koshi linga mwighanite mungababombela ifisa, lole temube nune akabalilo koshi. ⁸ Abomba fifyo enelile ukubomba. Ambakashila nganila umubili wangu mo batashilite. ⁹ Bwanaloli ngubabusha ukuti, ''muchisu moshi mumwo amashu amisa ghakulumbiliwa, fyofyo umukolo uyu abomba tifikakumbukiliwaghe. ¹⁰ Po u Yudasi isikaliyoti, yumo mwa bala twelovu(12) akabuka ku ba puti abosongo ukuti amuwike u Yesu kubabo. ¹¹ Mwo abaputi bapuli ifi, bakahoboka nukupangana nawe ukuti tibamupe indalama. Wakanda pakulonda isila iyakuti bangamupelekela linga pangaba ulusako. ¹² Pishiku ilya lusekelo ulwa chibama chochita nifilungo, pobakaghoghelagha abana ba nang'oshi ba pasaka, abafundiwa bake bakabusha bakati, ''ukulonda kughu kuko tuye tukunoshekeshele, ko ungaya ulye ichakulya icha pasaka?'' ¹³ Akatuma abafundiwa bake babili nukuti, ''muye mukaya, timuye mukumane nu mundu yo anyamwile ingumbe iya mishi mumukonge. ¹⁴ Poshi po akwingila munyumba, mumukonge muye mubushe umwenecho wanyumba, 'umumanyishi atili, ''chili kughu cho tialye upasaka nabafundiwa bake?'' ¹⁵ Tiaye abasondele ichipinda ichapanya ingani cho batendekeshishe kale kale. muye mutendekeshe fyoshi ifya utwe.'' ¹⁶ Abafundiwa bakafuma nukubuka mukaya kala. Bakagha fyoshi isa mwo akababushikisha, nukwanda ukutendekesha ichakulya chapasaka. ¹⁷ Pakanamasuba, akisa nabala twelovu(12). ¹⁸ Pomwo bikala pa mesa nukulya, u Yesu akati, ''Naloli ingubabusha, yumo mwa umwe yuyo ngulya nawe tiakambeleke kubalughu.'' ¹⁹ Woshi bakaba nichima, po yumuyuwene yumuyuwene akati, ''Naloli tenene hagha?'' ²⁰ U Yesu akabamula ukuti , ''yumuyuwene mwa umwe twelovu yo ingulya nawe imbale yimuyene. ²¹ Pakuti umwana Wamundu ti akabuke mumwo fisimbiwe ifya umwene. Lole wamukoshi yo umwana wamundu akuya pakupelekiwa. wamukoshi yuyo akwisa ukumubika umwana wamundu ku walughu! Chikapo chisa kukwake ngali atakapapiwa nukupapiwa.'' ²² Mobalipakulya, u Yesu akegha ichibama, akachisaya, nukuchimenyula. akabaghabila nukuti, ''egha. Ughu ghogho mubili wangu.'' ²³ Akegha ukapu, akapalisha, nukubaghabila, po boshi bakaghwa. ²⁴ akababusha akati, ''ili libanda lya lufingo lwanne. Ibanda lyo likupukile abingi. ²⁵ Naloli ngubabusha umwe, tangaghwe sona lumo numwe ichikomwa chamafilu(vine) ukufikila pishiku lyo ngwisa kughwa ifipya mubumwe bwa Chala.'' ²⁶ Bwobimba ulwimbo, bakabuka kwigha lya Oliva. ²⁷ U Yesu akababula akati, ''Mweshi umwe mukwisa pakukinda papo lisimbiwe ukuti, 'mukwisa ukughogha umutimi po ing'oshi shikwisa pakusata.' ²⁸ Lole pala nisa nashuka, ngwisa pakuwa pandashi papinyu mu galileya.'' ²⁹ U Peteli akati kukwakwe, ''napo boshi banganyokela, une hagha.'' ³⁰ U Yesu akamubula akati, ''naloli ngukubusha uwe, umusughu--inga, ubushiku bwa musughu--mwo umukolwe atabilikile kabili ukwisa ukungana katatu.'' ³¹ U Peteli akati, ''linga ningafwa pamupene nuwe,ndangise ngukane,'' Boshi bakapangana. ³² Bakisa pa bwuyo ubwa Getisemani, u Yesu akati kubafundiwa, ''ikala panupanu po une ngwiputa.'' ³³ Akamwegha u Peteli, yakobo, sona nu Yohani po akanda pakuwishiwa nukutamiwa sana mundumbula. ³⁴ Akababula akati, ''indumbula yangu yikutamiwa leka, ukfikila pafundo yakufyila.Mube panupanu muteshange.'' ³⁵ Mwo aya pandashi panandi, u Yesu akisa ikala pasi nukwiputa ukuti linga kwabaghile akabalilo kala ngali kamupululila. ³⁶ Akati, ''Abba, baba, ifindu fyoshi fipepe ku kwako. tisha ukapu uyu ukufuma kukwangu. Lole utakabombe ubwighane bwangu lole ubwako.'' ³⁷ Akisa aghaluka nukwaghe bapitile, akamusha u Peteli akati, ''Simoni,ngimba kupitila? Utangatesha pa awala limulyene? ³⁸ Mube maso nukwiputa ukuti mutakise mwingile mungelo. umbepo akulonda lole umubili ghupepu.'' ³⁹ Akabuka sona nukwiputa, nukupyanisha sona amashu ghagha. ⁴⁰ Mo isa sona, akaghe bapitile, papo amaso ghabo ghakang'wama. Batakamanyagha shisho bakayughagha kukwake. ⁴¹ Akisa ilyabutatu nukubabula ukuti, ''mukali napa mupitile nukutusha? Kakwana! akabalilo kafika. Tesha! umwana wa mundu akuya pakuwikiwa mutukono twa batulanongwa. ⁴² Nyamuka sagha tubukaghe.tesha, yuyo akuya pakumbika ku balalughu ali papipi.'' ⁴³ Mwo akali akubukilila pakuyugha, u yudasi, yumo muwa twelovu, akafika, sona ichilundilo ichilundilo ichikulu chikaba nawe nifipeni pamupene nindubu, ukufuma kubaputi abosongo, abasimbi, nabosongosongo. ⁴⁴ Yo akabaghila ukuti amuke mutukono twabo akapanga kale ichimakwilo, akati, ''yonamufyofyonaweyuyo.mumukole nukumupinya nukubuka newe kubalindilili.'' ⁴⁵ Mwo u Yudasi afika, paponapapo akisa kwa Yesu akati, ''Rabbi,'' akamufyofyona. ⁴⁶ Po bakabika utukono papake nukumukola. ⁴⁷ Lole yumuyuwene mubabo akanyamula umupeni nukumubegha umubombi wa muputi usongo ichufyo. ⁴⁸ U Yesu akababula akati, ''mukwisa ngati mwaya koku mughoghi nifipeni nindughu ukuti mungole? ⁴⁹ Pongaba numwe ishiku lyoshi sona ngamanyishagha mu tempeli, mutakangola. Lole ifi fikapangiwa ukuti amasimbo ghakwanilishiwe.'' ⁵⁰ Woshi bobakaba nu Yesu bakakinda. ⁵¹ Umulumyana yumo yuyo akipinya numwenda wene mumubili, akamukongagha u Yesu. Mwo abalisha ba mukola ⁵² akawuleka umwenda ghula nukukinda ngule. ⁵³ Wakabuka nawe ku muputi usongo. Bakabungana pamupene nawe aputi abosongo, abosongosongo, nabasimbi. ⁵⁴ U Peteli akamukongagha akba pabutili, pabuyo po abaputi abosongo bakikala. Akila pakati pabalindili, bobakaba papipi nu mulilo ukuti batukilaghe. ⁵⁵ Pakabalilo kalakala abaputi abosongo nichilundilo cha balongoshi aba chiyuda bakalondagha ulushimikisho ukuti bamughoghe u Yesu. ⁵⁶ Lole batakalwaghagha nalumo. Abingi bakisa nishimikisho ishabumyashi ishakumulonga, lole pope ishimikisho shabo shitakakolagha. ⁵⁷ Wamu wakisa nishimikisho ishabumyashi kukwae; bakati, '' ⁵⁸ tukamupulika akuti, 'Tingabongole itempile ili lyo lisengiwe nutukono, pa mashiku matatu tingasenge inine ukushita utukono.'' ⁵⁹ Lole pope ishimikisho shabo shitakakolagha. ⁶⁰ Uputi usongo akimilila pakati pabo akamubushikisha u Yesu, ''utanichakwamula? fyoshi ifi fyo abandu bakushimikisha fya uwe?'' ⁶¹ Loli akabashe myaa atakamula nachimo. Umuputi usongo akamubushikisha sona akati, ''we kilisitu umwana wa musayiwa?'' ⁶² U Yesu akati, ''Nene; sona timukateshe umwana wa mundu po ikalite kukakono akamwisa akamaka sona akwsa namabingo agha kumwanya.'' ⁶³ Umuputi usongo akanyepula imiselekesha yake akati, ''Tukali ytukulonda ubokamboni? ⁶⁴ Mwipulikila. ifundu yinu yakuti choni?'' Woshi bakamubukila ukuti yoyo akulonda ubwufwe. ⁶⁵ Bakanda pakumufwinila amati nukumushighila pamaso nukumukoma nukuyugha ukuti, ''Laghula!'' Abosongo songo bakamwegha nukuya pakumukoma. ⁶⁶ Mwo u Peteli akali mukati mubuyo mulamula, yumo umulindu wakabombelagha kwa muputi akisa kukwake. ⁶⁷ Akamuketa u Peteli akwitukisha mwene akisa amutesha papipi nukuyugha ukuti, ''Nuwe ukaba poka nu Yesu, uwa ku nazaleti.'' ⁶⁸ Lole akakana, nukuti, ''ndakumanyapo sona ndakupulikisha fifyo ukuyugha.'' Po u Peteli akafuma kusila ya kulupaso. ⁶⁹ Po lole umokolo wambombo yula akati amuketa akababusha sona bobakimilila papipi akati, ''umundu uyu ali nawe pamupene!'' ⁷⁰ Lole akakana sona. mwo pendapo akabalilo panandi boshi bo bakimilila bakayughagha kwa Peteli, ''bwanaloli wewe pakuti nuwe we Mugalilayi.'' ⁷¹ Lole akanda pakuyugha amashu aghakwitufya nukulapa ingani, ''Ndakumumanya umundu yuyo mukuyugha. ⁷² Papo napapo ubisa akalila akabubili. U Peteli akakumbukila amashu ghagho u Yesu akamubusha; ''Mwo ubisa atalilite kabili, tukangane katatu,'' Akawa pase nukwanda ukulila.