¹ U Yesu akisa afuma ubuyo bula nukuya kuchighaba cha ku Yudeya sona ukupulila ulusoko ulwa Yolodani, nichilundilo cha bandu chikisa ku kwakwe. Akabamanyisha sona,isamwo akabombelagha. ² Po abafalisayi bakisa kukwake ukumughela nukumulalusha, ''chikwitikishiwa ukuti umulisha amuleke umukashe wake?'' ³ Akabamula, ''u Mose akabalaghilaki?'' ⁴ Wakati, ''u Mose akitikisha ukuti umulisha amulembele ukalata uwakumuleke umokolo sona nukumufumyapo.'' ⁵ ''Fikaba wubo chifukwa cha kukasha indumbula shinu pakubalembela ululaghilo isalulwo,'' u Yesu akababula. ⁶ Lole ukufuma kubwandilo bwa bupeliwa, 'u Chala akapela umulisha numukolo.' ⁷ Pachikwa ichi umulisha akwisa kumulekagha ubise wake nu ng'ina wake nukuba pamupene numukashi wake, ⁸ sona babili bakwisa kuba mubili ghumuwene. 'Po batakuba bandu babili sona, lole mubili ghumuwene. ⁹ Po linga cho uchala apinya pamupene, nayumo umundu yuyo angapaghulania.'' ¹⁰ Mobali munyumba,abafundiwa wakisa wambushikisha sona pafifi. ¹¹ akababula akati, ''weshi yuyo amuleka umukashi wake nukwegha umukolo uyungi mwo amupangila ubomalaya. ¹² Linga umukolo amuleka umulume wake nukweghiwa numulisha uyungi, mwo amupangila ubomalaya.'' ¹³ Pobakisa nutwana utunandikukwake ukuti atupalamashe ninyobe, polole abafundiwa bakabakalipila. ¹⁴ Lole mo u Yesu ashaghania atakahoboka nabo akati kukwabo, ''mubitikishe abana abanandi bise kukwangu, sona mutakabaleshe, pakuti ubunyafyale bwa Chala bwa bobali ngati bana. ¹⁵ Naloli ngubabula ukuti weshi yuyo atakwisa ukupokela ubunyafyale bwa Chala ngati twana atakwisa pakwingila. ¹⁶ Po akanyamula abana mutukono twake nukubasaya pakubika utukono twake pa babo. ¹⁷ Mwo anda ubulendo bwake umundu akisa amukindilila nukufughamila sona nukulalusha, ''mumanyishi umwisa mbombe shachoni ukuti imbwaghe ubumi bwa bwilanabwila?'' ¹⁸ U Yesu akati, ''choni chicho mukuti ne mwisa? nayumo we mwisa lole uchala mwene. ¹⁹ Ushimenye indaghilo; utakaghoghe, utakapangaghe ubo malaya, utakibaghe, utakabikilaghe ubokaboni ubwabumyashi,ubumyashi hagha, umughindike ughuso nu nyoko.'' ²⁰ Umundu uyo akati, ''manyishi fyoshi fifyo ngufikongesha ukufuma kubu keke bwangu.'' ²¹ U Yesu akamuketelesha nu lughano. Akamubula akati, ''usobelewa ichindu chimuchene. Ubaghile ukughulisha ifindu fyako fyoshi nukubapa abapina,po tiwise ube nifyuma kumwanya.Powise, ungonge.'' ²² Po chifukwa cha mashu agha akaboneka wachitima ngani nukubuka kushi ukuhoboka, chifukwa cha fyuma ifingi fyo akabanafyo. ²³ U Yesu akatesha koshikoshi nukubabula abafundiwa bake, ''chifukwa buli chipala ukuti abandu abakabi bayebingile kubunyafyale bwa Chala!'' ²⁴ Abafundiwa bakashigha namashu ghake. Lole u Yesu akati sona, ''abana chipala buleghe ukwingila kubu nyafyale bwa Chala! ²⁵ chipepe sana ukuti ingamila yingile pilyiso lya sindando nukulusha umundu umukabi ukwila kubunyafyale bwa Chala.'' ²⁶ Wakashigha leka nukuyughisania bene, ''po wini we angapokiwa?'' ²⁷ U Yesu akabaketa nukuti, ''nabandu chitangabombiwa lole nu Chala. Pakuti nu Chala fyoshi ifindu fyakubombiwa.'' ²⁸ U Peteli akanda pakuyugha kukwakwe, ''tesha , tufilekite fyoshi nukukukonga uwe.'' ²⁹ U Yesu akati, ''naloli ngubabula, patapo yumo yuyo aleketi inyumba yake pamo abakulu pamo abayemba pamo ung'ina pamo pamo uwise pamo abana chifukwa cha une nubulumbilili bwane ³⁰ batangapokekela kahandiledi tayimuzi mu chisu ichi; inyumba nabo mukulu nabomuyemba nabomayi nabana nimighunda, mukufwimiwa, nichisu chochikwisa mundashi, nubumi bwa bwilanabwila. ³¹ Loliawingi bobabwandilo basukuba babumalilo, nababumalilo kubwandilo.'' ³² Bakaba mumusebo uwakuya ku yelusalemu, u Yesu akatangila pandashi pabo. Abafundiwa bakashigha , sona nabo wakwakongagha kunyuma bakaba nilyogha. Po u Yesu akabeghela pambali abafundiwa twelovu(12) sona nukwanda ukubabula ukuti choni chicho tichimobonekele. ³³ ''keta tukulya ku yelusalema, sona umwana wa Mundu akuya pakupekiwa ku baputi nawalembi. tibamupe inongwa yakubufwe nukumupeleka kubakusi. ³⁴ Wakwisa pakumuseka, nukumufwinila amati, nukumuchapula, nukumubika kubufwe. Lole pala pakinda amashiku matatu akwisa ukushuka.'' ³⁵ U Yakobo nu Yohan, abana ba zebediya, bakisa kukwake nukuti, ''mumanyishi, tukulonda ukuti utubombele chicho tungasuma.'' ³⁶ Akababusha akati, ''mukulonda chonichicho imbabombele?'' Wakati, ³⁷ ''utwikishe ukuti twikale nuwe mukulu bwako, yumuyuwene kumwisa nuyungi kushomi.'' ³⁸ Loli u Yesu akabamula akati, ''mutakumanya fifyo mukusuma. Mungakwanisha ukung'wela ukapu yuyo ngwisa ukung'wela pamo nukuwa mu losho lwo ngwisa ukoshiwa?'' ³⁹ Bakamula bakati, ''tubaghile.'' U Yesu akababula akati,ukapu yuyo ngwisa pakung'wela numwe, timwise mung'we, nu lyosho lyo musukoshiwa, numwe timukoshiwe. ⁴⁰ Lole yuyo tiise ikale kukakono kamwisa pamo akashomi teshangu pakubika, lole fya boshi babo babatendekeshile.'' ⁴¹ Bo abafundiwa abangi teni(10) wafipulika ifi, bakanda ukumukalalila u Yakobo nu Yohani. ⁴² U Yesu akabitisha boshi kukwake nukubabula ukuti, ''mubamenye bobamanyikitwe ukuba balongoshi babandu ba kuse babikalile, nabalongoshi bapamwanya bakubalamulila babo. ⁴³ Lole tefikabe bwubo papinyu. Weshi yuyo akulonda ubosongo abe mutumwa ku banine, ⁴⁴ naweshi yuyo akulonda ukuba wabwandilo abe mutumwa wa boshi. ⁴⁵ Pakuti umwana wa Mundu atakisila ukuti bamobombelaghe lole ababombelaghe, nukubika ubumi bwake ukuba chabupe kubingi.'' ⁴⁶ Wakisa ku yeliko. mwo afuma mu yeliko nabafundiwa bake nichilundilo ichikulu, umwana wa Timeyo,Batimeyo umufwa maso uwakusumasuma akikala mumbafu mumusebu. ⁴⁷ Bo apulika ukuti wi Yesu uwa kunazaleti , akanda ukukolela nukuyugha ukuti, Yesu mwana wa davide, mbelele ichisa!'' ⁴⁸ Abandu abingi bakamukalipila uwakufwa amaso, bakamubusha ukuti abe mye. Lole po akakolela ngani , ''mwana wa davide, mbelele ichisa!'' ⁴⁹ U Yesu akabalesha nukubalamula ukuti wamwitishe. Po bakamwitisha umufwe maso ukuti, ''ubemukifu! nyamuka! Akukwitisha.'' ⁵⁰ Akatagha ichakufwala chake, nukunyela mumwanya, nukwisa kwa Yesu. ⁵¹ U Yesu akamwamula akati, ''choni cho ukulonda ingubombele uwe?'' umufwa maso akati, ''mumanyishi ngulonda ukupokela ukutesha.'' ⁵² U Yesu akamubula akati, ''buka. Ulwitiko lwako lwakuposha.''papo napapo akanda ukutesha son, nukwanda ukumukongesha mumusewu.