¹ Po umundu yumo yuyo ingamu yake akaba wi Lazaloakisa abina. Akaba wakufumila ku Betaniya, akaya ka Maliya nuwamwabo u Malita. ² Akaba wi Maliya yuyo akamupakasha u Malafyale namafuta aghakunungila nakumupupula mutulundi niching'wili chake, yuyo umuyemba u Lazalo akabina. ³ Abayemba po bakisa batuma kwa Yesu, nukuti, ''Malafyale, tesha, yuyla yuyo umughanite abinite.'' ⁴ Bwo u Yesu apulika ishi, akati, ''Imbina iyi tayakumughogha, lole mubuyo bwake yakuti ubwikemo bwa Chala bubonekelemo nukuti u Mwana wa Chala akweshiwemo.'' ⁵ Po u Yesu akamughana u Malita nu wamwabo sona nu Lazalo. ⁶ Po mwo apulika ukuti u Lazalo abinite, u Yesu akikala amashiku aghangi mabili kubuyo bubo akaba. ⁷ Po bwo ishi shapululila, akati kubafundiwa, ''Sagha tubuke ku Yudeya sona.'' ⁸ Abafundiwa bakati kukwake, ''Mumanyishi, bwo loshi ulu aba Yuda bakughesha ukyuti bakupose namabwe uwe, po kubuka kuko sona?'' ⁹ U Yesu akamula, ''Ngimba patali ama awala twelofu aghabwe pishiku? Linga yumo akwenda mubwelu, atakwisagfha kwipunulagha, papo akutesha ukufwana nubwelu bwa chisu. ¹⁰ Lole, linga akwenda nubushiku, akwisa kwipunula papo ubwelu butali mumwake.'' ¹¹ Akayugha ifindu ifi, sona pandashi paifi, akayugha kukwabo, ''Umumanyani u Lazalo aghonite tulo, lole ingubuka ukuti inje imulamushe mutulo.'' ¹² Abafundiwa po bakati kukwake, ''Malafyale, linga apitile, tise anyamuke." ¹³ Ulu u Yesu akayughagha nisha bufwe bwake, lole bakinong'onagha ukuti akuyugha nisha kupitila pamu ukutusha. ¹⁴ Po u Yesu akababula pabwelu, ''U Lazalo afwile. ¹⁵ Ihobokite, chifukwa cha umwe, ingakabako kulakula pakuti musubalile. Sagha tubuke kukwake.'' ¹⁶ U Tomasi, yuyo akitiwanga ukuti Didimu, akati kubafundiwa abanine, ''Sagha nutwe tubuke kokuti tuye tufwe pamupene nu Yesu.'' ¹⁷ Mwo u Yesu isa, akagha ukuti u Lazalo ali kale mwipumba namashiku ghakukwana folo. ¹⁸ Apa i Betaniya yikaba papipi ni Yelusalemu, ubutali bwake bukapululilagha amakilomita ghatatu. ¹⁹ Aba Yuda abingi bakisa kwa Malita nu Maliya, pakubasubasha nisha muyemba. ²⁰ Po u Malita, bwo apulika ukuti u Yesu akwisa, akabuka pakukomana nawe, lole u Maliya akikala munyumba. ²¹ U Malita po akati kwa Yesu, ''Malafyale, linga wabangapo panu, umuyemba wangu ngali atafwile. ²² Nulu bubu, ishimenye ukuti choshi chicho linga wasuma ukufuma kwa Chala, akwisa kukupa uwe.'' ²³ U Yesu akati kukwake, ''Umuyemba wako akwisa kushuka sona.'' ²⁴ U Malita akati kukwake, Ishimenye ukutitiashuke sona nukushuka kwishiku ilya bumalilo.'' ²⁵ U Yesu akati kukwake, ''Ne kushuka sona ne bwumi; yuyo akusubalila mumwangu, napapo angafwa, akwisa kuba nubwumi; ²⁶ sona weshi yuyo mwumi inga asubalila une atakwisa kufwa lumo. Kusubalila shishishi?'' ²⁷ Akati kukwake, ''Inga, Malafyale, ngusubalila ukuti we Kilisitu, u Mwana wa Chala, yuyo akwisa mu chisu.'' ²⁸ Mwo ayugha shishishi, akisa afumapo nukumukolela uwamwabo u Maliya kulubafu. Akati, ''Umumanyishi ali panu sona akukwitisha.'' ²⁹ Bwo apulika shishishi, akanyamuka umwa lubilo lubilo nukubuka kukwake. ³⁰ Ulu u Yesu akaba akali ukwisa mukaya lole akaba akali pabuyo bubwo u Malita akakomanilana nawe. ³¹ Po mwo aba Yuda, babo bakaba nawe munyumba sona bakamusubashanga yuyo, batesha u Maliya akufumamwo mwalubilo lubilopakuya kuse, bakamukonga, bakinong'onagha ukuti akuya kwipumba pakulila kulakula. ³² Mwo u Maliya afika pa buyo papo u Yesu akaba sona amutesha, akamuwila mutulundi nukumubusha ukuti, ''Malafyale, linga wabangapo kuno, umuyemba wangu ngali atafwile.'' ³³ Mwo u Yesu atesha ukulila kwake, naba Yuda babo bakisa nawe bope bakulila, akisa apalamashiwa mwa mbepo sona akidsa atamiwa; ³⁴ Akati, "Mumughonekite kughu?'' Bakati kukwake, ''Malafyale, sagha uteshe.'' ³⁵ U Yesu akalila. ³⁶ Po aba Yuda bakati, ''Tesha mumwo amughanile u Lazalo!'' ³⁷ Lole bamu mubabo bakati, ''Ngimba taweyo mundu, yuyo akamwighula amaso umundu yuyo akaba wakufwa amaso, sona nukumupela umundu yula ukuti atakafwe?'' ³⁸ Po u Yesu sona, bwo shikali shikumutamya mwene, akabuka kwipumba. Apa likaba mbako sona bakabikako ibwe kuko. ³⁹ U Yesu akati, "Fumyapo ibwe.'' U Malita umuyemba wa Lazalo, yuyo akafwa, akati kwa Yesu, "Malafyale, pakabalilo aka amubili uti wabola, pakuti mwo afwilile lishiku lyo nambala folo." ⁴⁰ U Yesu akati kukwake, "Ngimba ngayughite kukwako ukuti, linga ukusubalila tise uteshe ubwikemo bwa Chala?" ⁴¹ Po bakisa batisha ibwe. U Yesu akakwesha amaso ghake nukuti, "Tata, ngupalisha pakuti ukambulikisha une. ⁴² Ishimenye ukuti akabalilo koshi kumbulikishanga une, lole chifukwa cha chilundilo chicho chishungulile une chobene nayugha ishi, kokuti pamu bangakwitika ukuti wandumite une." ⁴³ Mwo ayugha shishishi, akisa akolela namashu agha pamwanya, "Lazalo fuma kuse!" ⁴⁴ Umundu umufwe akisa afuma kuse; utulundi nutukono fikaba fyakupingiwa nu mwenda, nakumaso kope akapinyiwa numwenda. U Yesu akati kukwabo, "Musatule sona muleke abukaghe." ⁴⁵ Po aba Yudfa abingi babo bakisa kwa Maliya sona bakatesha fifyo u Yesu akabomba, bakisa bamusubalila. ⁴⁶ Lole bamu bakabuka ku bafalisayi nukuya pakubabusha ifindu fifyo u Yesu abomba. ⁴⁷ Po abaputi abosongo nabafalisayi bakabunganika abakomiti pamupene nukuti, tubombe sha choni? Umundu uyu akubomba ifyika ifyingi. ⁴⁸ Linga twamuleka mwene isa bubu, boshi bakuya pakusubila mumwake; aba Roma bakuya kwisa nukwegfha fyoshi ubuyo bwitu nichisu chitu." ⁴⁹ Napapo, umundu yumio mumwabo, u Kayafa, yuyo akaba muputi usongo ichinja chila chila, akati kukwabo, "Mutakumanya nakamu. ⁵⁰ Mutakushaghania ukuti chisapo kukwinyu ukuti umundu yumuyuwene afwile abandu ukulusha ukuti ichisu chochi chikomanike." ⁵¹ Po ishi atakayughagha ukufuma kumwene. Mubuyo bwake, ukuba muputi usongo ichinja chila chila, akakunguluka ukuti u Yesu yoyo afwile ichisu; ⁵² sona takuchisu kwene, lole ukuti abana wa Chala babo banyambanite babungane pamupene ukuba chilundilo chimuchene. ⁵³ Po ukufuma palapala ukuya kundashi bakisa banda ukulonda isila iya kumughoghela u Yesu. ⁵⁴ Atakendelela sona u Yesu pakwenda pabwelu mukati muba Yuda, lole akafumapo pala nukubuka mukaya kupipi nichitengele cha mukaya ka Efulayemu. Kulakula akisa ikala nabafundiwa. ⁵⁵ Po u Pasaka uba Yuda akaba papipi, sona abingi bakabuka ku Yelusalemuukufuma mukaya bwo upasaka akali ukuti baye biyelufye bene. ⁵⁶ Bakamulondsagfha u Yesu, sona bakayughisania bene benebwo bikalite mu tempeli, "Kwinong'ona chonicho? Ukuti taise kulusekelo?" ⁵⁷ Po ulu abaputi abosongo nabafundiwa bakabalaghila ukuti linga yumo akumanya kuko u Yesu ali, ababule ukuti baye bamukole.